ATENDELO 28 - Embimbiliya - Bíblia Sagrada em Umbundu

¹ Yehova wa popia la Mose hati,

² Imba onumbi va Isareli. Popia lavo, huti, Ovilumba viange vi sokiyi lutate loku vi lumba koloneke via tukuiwa. Ovilumba vioku yoka ovio okulia kuange, elemba lavio li pepa kokuange.

³ Popia lavo huti, Ocilumba coku pia elisi vu lumbila Yehova ceci: Eteke keteke vu lumba olomeme vivali vialume via tẽla unyamo, evi ka vi kuete etondelo. Oco ocilumba coku pia elisi cenda ño hũ.

⁴ Omẽle vu lumba omeme, oñolosi vu lumba omeme yikuavo.

⁵ Vu lumbavo onepa yekui yefa liosema ya fina, ya tengiwa lonepa yakuãla yohine yulela. Oco ocilumba colomema.

⁶ Eci oco ocilumba coku pia elisi coloneke viosi, haico ca tukuiwa komunda Sinai omo ci kuete elemba li pepa. Ci linga ocilumba coku pia elisi ci lumbiwila Yehova.

⁷ Ocilumba caco cokunyua ci kala onepa yakuãla yohine komeme omeme. Vocitumãlo ci kola omo vu pesila Yehova ocilumba cimue cevi vi koluisa omanu.

⁸ Omeme yikuavo vu yi lumba oñolosi. Vu yi lumba ndeci vu lumba ocilumba colomema comẽle locilumba caco cokunyua. Yi linga ocilumba coku caco cokunyua. Yi linga ocilumba coku pia elisi ci kuete elemba li pepa ku Yehova.

⁹ Ocilumba ceteke liesambata ceci: olomeme vivali vialume via tẽla unyamo, evi ka vi kuete etondelo, kuenda olonepa vivali viekui viefa liosema ya fina ya tengiwa lulela. Oco ocilumba colomema. Vu lumbavo ocilumba caco cokunyua.

¹⁰ Eci oco ocilumba coku pia elisi cesambata esambata. Ci vokiyiwa kocilumba coku pia elisi coloneke, kuenda ocilumba caco cokunyua.

¹¹ Kokumõleha kuolosãi vu lumbila Yehova ocilumba coku pia elisi. Ocilumba caco ceci, olonale vivali locitupi comeme lolomeme epanduvali vialume via tẽla unyamo, evi ka vi kuete etondelo.

¹² Vu lumbavo olonepa vitatu viekuĩ viefa liosema ya fina ya tengiwa lulela. Eci oco ocilumba colomema. Ocilumba caco vu lumba onale lonale. Ocitupi vu ci lumba kumosi lolonepa vivali viekui viefa liosema ya fina ya tengiwa lulela. Oco ocilumba colomema.

¹³ Omeme lomeme vu yi lumba kumosi lonepa yimosi yekui yosema ya fina ya tengiwa lulela. Oco ocilumba colomema. Ci linga ocilumba coku pia elisi ci kuete elemba li pepa, haico ocilumba ca yokiwila Yehova.

¹⁴ Ovilumba viaco viokunyua vi kala ndomo: Onale va yi lumbila kumosi lomeyu yohine yovinyu, ocitupi va ci lumbila kumosi lonepa yatatu yohine yovinyu. Omeme va yi lumbila kumosi lonepa yakuãla yohine yovinyu. Eci oco ocilumba coku pia elisi cosãi kosãi, olosãi viosi viunyamo.

¹⁵ Va lumbavo ocitupi cohombo ha ci lingi ocilumba cekandu coku Yehova. Ci lumbiwa oku vokiya kocilumba coku pia elisi coloneke viosi loku vokiyavo kocilumba caco cokunyua.

¹⁶ Eteke liekuĩ lakuãla liosãi yatete li linga eteke lio Pascoa ya Yehova.

¹⁷ Keteke liekuĩ latãlo kosãi yaco ku kala ofesta. Oloneke epanduvali va lialia olombolo ka vi kuete etumbisa.

¹⁸ Keteke liatete ku kala efendelo liowiñi wosi. Keteke liaco ka ci tava oku linga upange wovaka.

¹⁹ Eteke liaco vu lumbila Yehova ocilumba coku pia elisi. Evi vu lumba vievi, olonale vivali, locitupi comeme, kuenda olomeme epanduvali vialume via tẽla unyamo. Cinene okuti vievi ka vi kuete etondelo.

²⁰ Ocilumba colomema lacovo ci lumbiwila kumosi lavio. Ci kala cosema ya fina ya tengiwa lulela. Oku yonga kuaco ku kala ndomo: Konale lonale olonepa vitatu viekui viefa; kocitupi olonepa vivali viekui viefa;

²¹ komeme lomeme onepa yimosi yekui yefa.

²² Vu lumbavo ocitupi cohombo. Ci linga ocilumba cekandu coku tuvika akandu ene.

²³ Ovina evi vu vi lumba oku vokiya kocilumba coku pia elisi comẽle, momo comẽle ci kasi ale oloneke viosi.

²⁴ Haico muẽle vu lumba lumba ocilumba coku pia elisi eteke keteke oloneke viaco epanduvali. Ocilumba caco oco okulia kua Yehova haico ci kuete elemba li pepa. Ci lumbiwila oku vokiya kocilumba coku pia elisi coloneke viosi loku vokiya kocilumba cokunyua.

²⁵ Keteke liepanduvali ku kala efendelo liowiñi wosi. Eteke liaco ka ci tava oku linga upange wovaka.

²⁶ Koloneke viofesta yolosemana, keteke lioku lumbila Yehova ocilumba colomema viovaima atete, vu kala lefendelo liowiñi wosi. Eteke liaco ka ci tava oku linga upange wovaka.

²⁷ Puãi vu lumba ocilumba coku pia elisi ci kuete elemba li pepa ku Yehova. Evi vu lumba vievi: olonale vivali, locitupi comeme, kuenda olomeme epanduvali vialume via tẽla unyamo.

²⁸ Ocilumba colomema lacovo ci lumbiwila kumosi lavio. Ci kala cosema ya fina ya tungiwa lulela. Okuyonga kuaco ku kala ndomo: Konale lonale olonepa vitatu viekui viefa; kocitupi olonepa vivali viekui viefa;

²⁹ komeme lomeme onepa yimosi yekui yefa.

³⁰ Vu lumbavo ocitupi cohombo coku tuvika laco akandu ene.

³¹ Ovina evi vu vi lumbila kumosi lovilumba vioku nyua via tukuiwa ale oku lumbiwila kumosi lavio. Vu vi lumba oku vokiya kocilumba coku pia elisi leci colomema vina violoneke viosi. Cinene oku kulĩhisa lutate ovinyama viaco okuti ka vi kuete etondelo.