ATENDELO 27 - Embimbiliya - Bíblia Sagrada em Umbundu

¹ Oco kueya omãla vakãi va Celofelada, omõla a Hefere, omõla a Gileada, omõla a Makiri, omõla a Manase, okuti epata lia Manese, omõla a Yosefe. Olonduko viomãla vaye vakãi vievi: Mahila la Nahoa la Hogila la Milika, kuenda Tirica.

² Veya kuvelo wombalaka yoku ñualehela la Yehova. Va talama kovaso a Mose locitunda Eleasa kuenda asongui la va Isareli vosi, vati,

³ Isietu wa fila vekalasoko. Ka kaile pokati komanu va liongoluila oku tamãlala la Yehova la va Kora. Eye wa fa ño ndeci wosi ukuakandu; ka kaile lomãla valume.

⁴ Onduko ya isietu yi fila nye pokati kepata liavo omo ka kaile lomõla ulume? Tu ihe onepa pokati kavamanji a isietu.

⁵ Mose wa tuala ondaka yavo ku Yehova.

⁶ Yehova wa popia la Mose hati,

⁷ Omãla vakãi va Celofehada va popia esunga. Va avela muẽle onepa yocipiñalo pokati kavamanji a isiavo. Va tepisila ocipiñalo ca isiavo.

⁸ Sapuila va Isareli huti, Eci omunu a fa kuenje ka kuete omõla ulume, oco weci ocipiñalo caye komõlaye ukãi.

⁹ Nda ka kuete omõla ukãi ocipiñalo caye vu ceca ku vamanjaye.

¹⁰ Nda ka kuete vamanjaye oco ocipiñalo caye vu ceca ku vamanji a isiaye.

¹¹ Nda isiaye ka kuete vamanjaye, oco ocipiñalo caye vu ceca ku ngandi yepata liaye, eye o ci liapo. Eci ci linga ocihandeleko ci kola ku va Isareli, ndomo Yehova a sapuila Mose.

¹² Oco Yehova wa popia la Mose hati, Londa komunda eyi ya Avirame. Vanja ofeka nda eca ku va Isareli.

¹³ Eci okuti wa yi mõlale oco wendavo kolosekulu viove ndeci huvove Arone a enda.

¹⁴ Momo, vekalasoko lia Cina, eci owiñi wa kala loku yuela, leci ene wa talami kovava aco, oco ene, wa sini ondaka yange, ka wa sumbisili kovaso omanu. Ovava aco ovava a Meriva ko Kadesi, vekalasoko lia Cina.

¹⁵ Mose wa popia la Yehova hati,

¹⁶ Yehova, Suku yovilelembia viomanu vosi, a tukuile omanu valo usongui,

¹⁷ a nõle umue o ñuala ñuala pokati kavo, haeye o va songuila nda va tunda loku va iñisa okuti omanu va Yehova ka va kala ndolomeme ka vi kuete ungombo.

¹⁸ Yehova wa kumbulula Mose hati, Pañinya Yehosua, omõla a Nune, haeye omunu o kuete Espiritu. Kapa eka liove kokuaye.

¹⁹ U nena loku u talamisa kovaso ocitunda Eleasa, lo kovaso omanu vosi. U kundikila kovaso avo.

²⁰ O wiha onepa yomoko yove okuti va Isareli va pokola kokuaye.

²¹ Yehosua iya oku pula kocitunda Eleasa. Eleasa u pulila ku Yehova onimbu yu Urimi. Yehosua lowiñi wosi wa va Isareli va pokola kondaka ya Eleasa, ci kale ondaka yoku tunda, ci kale ondaka yoku iñila.

²² Mose yu wa linga ndeci Yehova o sapuila, wa pañinya Yehosua, wo nena kuenje wo talamisa kovaso ocitunda Eleasa lo kovaso omanu vosi.

²³ Mose wo kapa ovaka aye, wo wiha ocikundi ndeci Yehova o sapuila.