ATENDELO 25 - Embimbiliya - Bíblia Sagrada em Umbundu

¹ Osimbu va Isareli va kala ko Sitimi va fetika oku linga ukahonga lomãla vakãi va va Moavi.

² Akãi vaco va laleka va Isareli oku kalako eci va lumbila olosuku viavo ovilumba. Kuenje va Isareli va lialia ovilumba viaco loku fendela olosuku viavo.

³ Oco va Isareli va tiama ku Baale ya Peore, kuenje onyeño ya Yehova ya wengukila va Isareli.

⁴ Oco Yehova wa popia la Mose hati, Kuata ovasongui vosi va va Isareli. Osimbu utanya wa tua va nyengeleka kovaso a Yehova, okuti onyeño ya kãla ya Yehova yi tunda ku va Isareli.

⁵ Kuenje Mose wa popia lolonganji via va Isareli, hati, Omunu omunu a ipaye omanu vaye ava va tiama ku Baale ya Peore.

⁶ Osimbu va kala loku lilila kuvelo wombalaka yoku ñualehela la Yehova oco umue u Isareli wa nena kepata liavo ukãi waye u Midiane. Mose la va Isareli vosi va ci mõla.

⁷ Finehase, omõla a eleasa, omõla ocitunda Arone, eci a ci mõla oco wa votoka, wa tunda pokati komanu, wa nyañula onjelia,

⁸ kuenje wa landula ulume u Isareli te vombalaka. Wa va toma kavali kavo, ulume u Isareli lukãi. Ukãi wa tomiwa olusõle vimo liaye. Oco efengi lia imũha ku va Isareli.

⁹ Haimo lumue ava va fa lefengi liaco akuĩ avali kolohũlũkãi kolohũlũkãi vikuãla.

¹⁰ Oco Yehova wa popia la Mose, hati,

¹¹ Finehase, omõla a Eleasa, omõla ocitunda Arone, wa tiula onyeño yange ku va Isareli, omo wa suvuka ekandu lia kala pokati kene ndeci ame nda li suvuka. Oco sia nyõlele va Isareli lesepa liange.

¹² Oco u sapuila, huti, Tala, ndi lisila laye ocisila cange combembua.

¹³ Kokuaye kuenda kombuto yaye ci linga ocisila cutunda ka u pui, omo wa kuatela Suku yaye esepa, kuenje wa tuvika ekandu lia va Isareli.

¹⁴ U Isareli wa ipaiwa, okuti wa ipaiwila kumue lukãi a Midiane, onduko yaye Simiri. Eye omõla a Salu, usongui kocikoti colosekulu via va Simeone.

¹⁵ Ukãi u Midiane wa ipaiwa onduko yaye, Kocivi. Eye omõla a Curu, ukulu wepata liocikoti colosekulu via va Midiane.

¹⁶ Yehova yu wa popia la Mose hati,

¹⁷ Yaka la va Midiane, va ipaya.

¹⁸ Momo vo sakalaisi latutu avo. Vo kembisi lao kondaka ya Peore, ndaño kondaka yu Midiane, Kocivi, omõla ombuale yimue ya va Midiane, una wa ipaiwa eteke efengi lieyilila ahuku a kala ko Peore.