ATENDELO 24 - Embimbiliya - Bíblia Sagrada em Umbundu

¹ Eci Baliame a limbuka okuti Yehova wa yongola oku sumuluisa va Isareli, oco ka tahele ndeci a linga olonjanja vikuavo, puãi wa imba ovaso kekalasoko.

² Oco Baliame wa petula ovaso aye, wa mõla va Isareli okuti va tunga epata epata. Kuenje Espiritu lia Suku lio wila.

³ Oco wa imba owanji waye, hati, Ocinjoinjoi ceya ku Baliame, omõla a Beore. Ocitumasuku ceya komunu wa patuluka.

⁴ Ocinjoinjoi ceya kukuakuyeva olondaka via Suku, haeye o muĩla muĩla ale kotulo ovinjoinjoi vi tunda ku Ukuonenewosi.

⁵ A Yakoba, olombalaka viove via posoka cimue, haico olosinge viove, a Isareli!

⁶ Via tanda ndovimbota pamue ndolonaka. Via posoka ndoviti via peka Yehova, pamue ndolo-cedro kohulo yolui.

⁷ Ovava a tunda tunda koviyenjo viaye. Ombuto yaye yi kala vovava a lua. Osoma yaye yi piãla, Agage o sule. Usoma waye u kemãla.

⁸ Suku wo wupa ve Egito. Ongusu yaye ya soka leyi yolombinga vionyani. O lia ño olofeka via linga anyali vaye. O teya akepa avo. O va asa lovisongo viaye olusole.

⁹ Wa litutila, wa vutama ndohosi, pamue ndomange yohosi. U sanumula helie? Wosi o ku sivaya a sumulũhe. Wosi o ku siñala a siñaliwe.

¹⁰ Onyeño ya Balaka ya wengukila Baliame oco wa pandula peka lonyeño; kuenje Balaka wa popia la Baliame hati, Nda ku kovongela oku siñala ovanyali vange, kuenje tala, wa va sivaya muẽle lutatu.

¹¹ Oco, tiukila kofeka yene. Nda sokele oku ku sumbisa ca lua, puãi Yehova wa ku pumbisa esumbilo liaco.

¹² Baliame wa kumbulula Balaka hati, Siti nda sapuilale olomunga viove wa tumile siti,

¹³ Ndaño Balaka o nyiha onjo yaye ye yuka opalata kuenda ulu, ame si tẽla oku hukila ondaka ya Yehova, oku linga ciwa pamue cĩvi locipango cange muẽle. Eci Yehova a sapuila oco mopia.

¹⁴ Kaliye ngenda komanu vange. Njevelele, hu sapuila ndeci omanu vaco va linga lomanu vove koloneke viya.

¹⁵ Oco wa imba owanji waye, hati, Ocinjoinjoi ceya ku Baliame, omõla a Beore. Ocitumasuku ceya komunu wa patuluka.

¹⁶ Ocinjoinjoi ceya kukuakuyeva olondaka via Suku, haeye wa kulĩha ovilongua via Tõlo, kuenje o muĩla muĩla ale kotulo Ukuonenewosi, ovinjoinjoi vi tunda ku Ukuonenewosi.

¹⁷ Ndu mõla puãi handopuiloko. Ndu vanja puãi hacipepiko. Olumbungululu lu tunda ku Yakoba. Epangati liosoma li katuka vi Isareli. Li veta kutue wa Moavi, kuenje li nyõla omanu vaco vosi vakuakulituna.

¹⁸ Va Edome va kuatiwa. Seire layovo yi kuatiwa la va Isareli, omo va Isareli va yaka yaka lutõi.

¹⁹ Yakoba o yula ovanyali vaye, ndaño ocisupe covovaimbo anene o ci kundula.

²⁰ Baliame wa vanjavo va Amaleke, kuenje wamisako lowanji waye, hati, Amaleke wa piãlele olofeka, puãi esulilo liaye oku nyõlẽha.

²¹ Noke wa vanja va Keni kuenje wamisako lowanji waye, hati, Ocitumãlo cene ca pama, lovianju viene vi kasi kesenje.

²² Haimo lumue Keni yi nyõlẽha. Okukoka kuene ka ku kala osimbu. Ndopo Asiure o wambati umandekua.

²³ Wamisako vali owanji waye, hati, A mai we! Nda Suku o linga ndomo helie o kala lomuenyo?

²⁴ Puãi awato a tunda ko Kupro a talisa ohali Asiure kuenda Everi. Layevo o nyõlẽha.

²⁵ Eci Baliame a mala wa votoka, wa enda, wa tiukila kofeka yaye, Balaka wa enda lonjila yaye.