ATENDELO 23 - Embimbiliya - Bíblia Sagrada em Umbundu

¹ Oco Baliame wa popia la Balaka hati, Nungile kulo ovitala epanduvali. Mbanjele olongombe epanduvali lovitupi violomeme epanduvali.

² Balaka wa linga ndeci ca popia Baliame. Oco Balaka la Baliame va lumbila, kutala ongombe locitupi, kutala ongombe locitupi.

³ Baliame wa popia la Balaka hati, Cilo, ove kala ocipepi locilumba cove coku pia elisi, oco ame ngenda. Mbi Yehova iya, o ñualehela lame. Cosi a ndekisa hu sapuila. Oco Baliame wa londa konumbuko kua tapika.

⁴ Suku wa ñualẽhela la Baliame kuenje Baliame wa sapuila Suku, hati, Nda sokiya ovotala epanduvali, nda lumbila, kutala ongombe locitupi, kutala ongombe locitupi.

⁵ Yehova yu wa lomboluila Baliame eci a ka popia, hati, Tiukila ku Balaka, popia ndomo.

⁶ Oco Baliame wa tiukila ku Balaka kuenje wa sanga Balaka lolombuale viaye va talama konẽle yocilumba caye coku pia elisi.

⁷ Oco Baliame wa sapula ondaka yaye hati, Balaka wa njupa va Arama, Soma ya va Moavi wa njupa kolomunda viokutundilo, hati, Enju, ndo siñalẽle va Yakoba. Enju, ndo temẽle va Isareli.

⁸ Siñala ndati ava Suku ka siñalele? Nemẽla ndati ava Suku ka temẽlele?

⁹ Oku talama kilu lionumbuko ndi va lete. Oku talama kowulu nela oku va vanja. Ndimbuka okuti omanu vaco va likasilili. Ka va tava oku tendiwa kumosi lolofeka vikuavo.

¹⁰ Helie o tẽla oku tenda ombuto ya Yakoba? Helie o tẽla oku tenda olohuluwa viepata lia Isareli? Ame nda livela okufa ndokufa kukuesunga. Nda livela nda esulilo liange li lisoka leli liavo.

¹¹ Balaka yu wa popia la Baliame hati, Wa ndinga nye? Nda ku kovongelele oku siñala ovanyali vange, puãi ove wa va sivaya ca piãla.

¹² Baliame wa kumbulula, hati, Si lunguka hẽ leci Yehova a sapuila oku popia?

¹³ Oco Balaka wa popia la Baliame hati, Enju, tu ende kumue kuiñi oko o tẽla oku va mõla. O mõla lika onepa yavo, ku va mõli vosi. Ka va siñalẽle oko.

¹⁴ Oco wo tuala kepia liolondavululi, kilu liomunda ya Pisiga. Wa tunga ovotala epanduvali, yu wa lumbila, kutala ongombe locitupi, kutala ongombe locitupi.

¹⁵ Baliame wa popia la Balaka hati, Ove o kala kulo ocipepi locilumba cove coku pia elisi osimbu ame ha ñualehela la Yehova oko.

¹⁶ Oco Yehova wa ñualehela la Baliame, kuenje wo sapuila eci a ka popia, hati, Tiukila ku Balaka, popia ndomo.

¹⁷ Yu Baliame weya ku Balaka kuenje wo sanga, o tãi konẽle yocilumba caye coku pia elisi kumosi lolombuale via Moavi. Balaka yu wa pula Baliame hati, Yehova wa popia nye?

¹⁸ Oco Baliame wa imba owanji waye hati, A Balaka, votoka, yevelela. Njevelele, amõla a Cipora.

¹⁹ Suku hamunuko okuti o kemba, pamue omõla omunu okuti o pongoloka. Eci a popia ka ci lingi hẽ?

²⁰ Wa popia lame, hati, Sumuluĩsa. Wa numa oku sumuluĩsa, si tẽla oku ci pongolola.

²¹ Va Yakoba ka va mõli ongongo. Ohali ka yiya ku va Isareli. Yehova, Suku yavo, o kasi lavo. Va sambiliya Soma yavo.

²² Suku wa vopa ve Egito. Ongusu yaye kokuavo ya soka ndeyi yolombinga vionyani.

²³ Va Yakoba ka va taha taha. Va Isareli ka va imbi ovaso kovimbanda. Eci Suku a linga ci sapuiwa ku va Yakoba, ci situluiwa ku va Isareli.

²⁴ Omanu vaco va pama. Va votoka ndohosi yomange. Va somboka ndohosi. Ka va pekela te va lia kohuta, loku nyua kosonde yeci ca ipaiwa.

²⁵ Balaka yu wa popia la Baliame hati, Ka ka va sinãle ndaño oku va sumuluisa.

²⁶ Puãi Baliame wa kumbulula Balaka hati, sia ku sapuilile hẽ siti, Cosi Yehova a popia oco ndinga?

²⁷ Balaka yu wa popia la Baliame hati, Tu ende, hu tuala kumue kuiñi. Mbi Suku o tava okuti oko o va siñalẽla.

²⁸ Kuenje Balaka wa tuala Baliame kilu liomunda ya Peore, oko ekalasoko lia mõlẽha.

²⁹ Baliame wa popia la Balaka hati, Nungile kulo ovotala epanduvali. Mbanjele kulo olongombe epanduvali lovitupi violomeme epanduvali.

³⁰ Oco Balaka wa linga ndeci ca popia Baliame, wa lumbila, kutala ongombe locitupi, kutala ongombe yocitupi.