ATENDELO 22 - Embimbiliya - Bíblia Sagrada em Umbundu

¹ Noke va Isareli vamako, va tunga ovilombo kanyala a Moavi, kekulo lia Yordão, oku imba ovaso ko Yeriko.

² Balaka, omõla a Cipora, wa mõla cosi va Isareli va linga va Amori.

³ Va Moavi va yokokela calua omanu vaco omo va lua. Va Moavi va kuatela va Isareli usumba.

⁴ Oco va Moavi va popia lolosekulu via va Midiane, vati, Kaliye owiñi u wa lua u kelula cosi ca tu ñuala, ndomo ongombe yi kelula owangu wovusenge. Kotembo yaco Balaka, omõla a Cipora, wa kala soma ya Moavi.

⁵ Wa tuma olomunga oku kovonga Baliame, omõla a Beore, ko Petore, imbo li kasi ocipepi l' Olui vofeka ya va Amoni. Wa popia hati, Tala, kueya, omanu va tunda ve Egito, lofeka yosi ye yuka omanu vaco. Oku tunga va suñama lame.

⁶ Kaliye enju, ndo siñalẽle omanu vaco momo va nulamela. Mbi nẽla oku va yula loku va tundisa vofeka; momo ndi ci okuti u ove o sivaya o sumũlũha, lu o siñala o sumua.

⁷ Oco olosekulu via va Moavi lolosekulu via va Midiane va enda longanda povaka avo, kuenje veya ku Baliame, vo sapuila olondaka via Balaka.

⁸ Baliame wa popia lavo hati, Lali kulo uteke ulo oco ndu sapuili noke ondaka ndomo Yehova a popia lame. Oco olombuale via Moavi via tumãla la Baliame.

⁹ Oco Suku weya ku Baliame, wo pula hati, Ovalume va sikĩla konjo yove velie?

¹⁰ Baliame wa kumbulula Suku, hati, Balaka, omõla a Cipora, Soma ya Moavi, wa tuma kokuange hati,

¹¹ Tala! Kueya omanu va tunda ve Egito, ve yuka vofeka yosi. Enju handi o va siñalele. Mbi nẽla oku yaka lavo loku va tundisa.

¹² Suku wa popia la Baliame hati, Ku ka ende lavo. Ku ka siñale omanu vaco momo vakuesumũluho.

¹³ Baliame yu wa pinduka omẽle, wa popia lolombuale via Balaka hati, Tiukili kofeka yene momo Yehova ka tava okuti ngenda lene.

¹⁴ Oco olombuale via Moavi via katuka, vieya ku Balaka, vio sapuila viti, Baliame ka tavele oku iya letu.

¹⁵ Oco Balaka wa katula vali olombuale via lua haivio via sumbiwa ca lua okuti viatete ci sule.

¹⁶ Kuenje via enda ku Baliame via popia laye, viti, Ca popia Balaka, omõla a Cipora, ceci, hati, Lacimue ka ci ka ku tateke oku iya kokuange,

¹⁷ omo hu muĩsa esumbilo lia lua. Cosi o popia lame ndi ci linga. Oco nda ku pinga, enju, ndo siñalele omanu vaco.

¹⁸ Puãi Baliame wa kumbulula, wa popia lakuenje va Balaka hati, Ndaño Balaka o nyiha onjo yaye ye yuka opalata lulu, ame si tẽla oku hukila ondaka ya Yehova, Suku yange, ndaño oku tepululako ndaño oku vokiyako.

¹⁹ Kaliye, ndo pingi siti, Lali kulo uteke ulo, oco ndimbuke eci ci popia vali Yehova lame.

²⁰ Oco Suku weya ku Baliame uteke, wa popia laye hati, Nda alume vaco veyilila oku ku upa, pasuka, kuende lavo, haimo lumue o linga lika eci mopia love.

²¹ Oco Baliame wa votoka omẽle, wa kapa oseleyi kocimbulu caye, wa enda lolombuale via Moavi.

²² Puãi onyeño ya Suku yo wengukila omo a enda, kuenje ungelo wa Yehova wo lavekela vonjila ndunyali. Eye wa endela kocimbulu caye, lakuenje vavali kumue laye.

²³ Ocimbulu ca mõla ungelo wa Yehova o tai vonjila, losipata yaye peka, wa yi somõla ale vocilalo. Kuenje ocimbulu ca yapuka vonjila, ca enda vusenge. Baliame wa veta ocimbulu oku ci kondoluila vonjila.

²⁴ Oco ungelo wa Yehova wa talama vonjila ya sukatela pokati koviumbo viayuva, kondio ocimbaka, kepĩli lakovo ocimbaka.

²⁵ Eci ocimbulu ca mõla ungelo wa Yehova, oco ca likulumbala kocimbaka kuenje ca punyuluila omãi ya Baliame kocimbaka, oco wa ci veta vali.

²⁶ Kuenje ungelo wa Yehova wa pita vali kovaso, wa talama apa pa sukatela, ka pa kaile eyapukilo ndaño kondio ndaño kepĩli.

²⁷ Eci ocimbulu ca mõla ungelo wa Yehova ca wila posi, Baliame wa ci yangalala. Oco onyeño ya Baliame ya wenguka, wa veta ocimbulu lombueti.

²⁸ Oco Yehova wa situlula omẽla wocimbulu. Ca popia la Baliame citi, Nye nda ku linga omo wa mbeta olonjanja evi vitatu?

²⁹ Oco Baliame wa popia locimbulu hati, Momo wa nomba. Nda nda kaile losipata peka nda nda ku ipaile.

³⁰ Oco ocimbulu ca popia la Baliame, citi, Sicimbulu coveko hẽ-e? Sia ku ambataele hẽ omuenyo wove wosi toke ketaili lilo? Nda la ku linga ale ndeci? Yu wo kumbulula hati, Kotoko.

³¹ Oco Yehova wa patulula ovaso a Baliame kuenje Baliame wa mõla ungelo wa Yehova o tãi vonjila, osipata yaye wa yi somõla ale yi kasi peka. Yu wa petamisa somõla ale yi kasi peka. Yu wa petamisa utue, wa wila posi, wa lituvikapo.

³² Oco ungelo wa Yehova wo pula hati, Nye wa vetela ocimbulu cove olonjanja vitatu? Tala, nda tunda oku linga unyãli wove momo onjila yove ya muiya.

³³ Ocimbulu ca mõla, ca njapukila olonjanja vitatu. Nda ka ca njapukilile nda nda ku ipãla okuti ocimbulu nda ca siala lomuenyo.

³⁴ Oco Baliame wa popia lungelo wa Yehova hati, Nda linga ekandu. Sia limbukile okuti wa kala vonjila oku nateka. Kaliye nda ka ca sungulukile kokuove niukila.

³⁵ Oco ungelo wa Yehova wa popia la Baliame hati, Kuende lomanu vaco, puãi ondaka mopia love oyo lika o popia. Oco Baliame wa enda lolombuale via Balaka.

³⁶ Eci Balaka a yeva okuti Baliame weya, oco wa enda oku ñualehela laye kimbo lia Moavi li kasi kekulo lie Arinone apa pa suliya ongave yofeka.

³⁷ Balaka wa pula Baliame hati, sia tumile hẽ oku ku kovonga? Nye kueyilile kokuange? Si ci tẽla hẽ oku ku sumbisa?

³⁸ Oco Baliame wa kumbulula Balaka hati, Ame ulo, ndeya kokuove. Cilo hẽ nẽla oku popia cimue? Ondaka Suku a nyiha oyo mopia, si yuhila.

³⁹ Kuenje Baliame wa enda la Balaka, va enda ko Kiriate-hisote.

⁴⁰ Balaka yu wa lumba olongombe lolomeme kuenje wa tuma olonepa vimue ku Baliame lolombuale via kala laye.

⁴¹ Oco omẽle Balaka wa pitula Baliame, wa enda laye toke kolonumbuko via Baale. Oku talamako onele yimue yocilombo ca va Isareli yi mõleha.