ATENDELO 21 - Embimbiliya - Bíblia Sagrada em Umbundu

¹ Soma ya Arade, u Kanana, haeye wa tunga ko Sul, eci a yeva okuti va Isareli va kasi loku iyilila vonjila ya Atarimi oco wa katukila va Isareli kuenje wa kuata valua.

² Oco va Isareli va lisila ocisila la Yehova vati, Nda weca omanu ava povaka etu, etu tu nyõla pe ovaimbo avo.

³ Yehova wa tava kondaka ya va Isareli, kuenje wa eca va Kanana povaka avo. Va va nyõla pe, ovo lovaimbo avo. Oco usenge waco vo luka vati, Horima, ca lomboloka Enyolẽho.

⁴ Oku tunda komunda ya Horo va wila vonjila yenda ko Kalunga Kakusuka, oku ñuala ofeka ye Edome. Omanu va fetika oku nyumãlẽla ungende waco.

⁵ Omanu va lisiõsuĩla Suku, va lisiõsuĩlavo Mose vati, Nye wa tu upila ve Egito okuti tu fila vekalasoko? Momo ka muli okulia ndaño ovava. Tu nyãle okulia kuaco kuvi.

⁶ Oco Yehova a tuma pokati komanu olonyõha via tema, kuenje via lumana omanu okuti va Isareli valua va fa.

⁷ Oco omanu veya ku Mose, va popia vati, Tua linga ekandu omo tua lisiõsuĩla Yehova kuenda ove, oco likutilila ku Yehova okuti o tu upa olonyõha. Kuenje Mose wa likutilila omanu.

⁸ Yehova yu wa sapuila Mose hati, tunga onyõha ya tema, yi tulika kuti. Oco wosi wa lumaniwa, nda o yi vanja o kala lomuenyo.

⁹ Mose yu wa tunga onyõha yosipi, wa yi tulika kuti. Oco nda onyõha yimue ya lumana umue omunu o vanja konyõha yosipi o pepeliwa.

¹⁰ Oco va Isareli va tundako, va tunga ovilombo ko Ovote.

¹¹ Oku tunda ko Ovote va tunga kowulu wa Avarime, vekalasoko lia imba ovaso ko Moavi kutundilo wekumbi.

¹² Oku tundako va tunga vomuva ya Cereda.

¹³ Oku tunda ko Cereda va tunga kesinya lia Arinone. Olui Arinone lu kasi vekalasoko hailuo lua linga ongave yofeka ya va Amori, momo Arinone oluo ongave ya Moavi pokati ka Moavi la va Amori.

¹⁴ Elivulu li Ovita via Yehova li tukula Arinone, liti, Tua pita vo Vaheve vo Sufa, lovolomuva via Arinone.

¹⁵ Tua pita kociloka colomuva cina ca enda toke ko Are haico ca loña kongave ya Moavi.

¹⁶ Eci va tundako va enda ko Bere, ca lomboloka Ocisimo. Ocisimo caco oco Yehova a sokolola eci a popia la Mose hati, Ongolola omanu, ndi va iha ovava.

¹⁷ Kuenje va Isareli va imba ocisungo eci, vati, Acisimo tumũha! Imbili ocisungo

¹⁸ ocisimo ca fẽla olosoma. Olombuale viomanu via ci fẽla lapangati kuenda olombueti viavo. Eci va tunda kekalasoko va enda ko Matana.

¹⁹ Oku tunda ko Matana va enda ko Nahaliyele. Oku tunda ko Nahaliyele va enda ko Bamote.

²⁰ Oku tunda ko Bamote va enda komuva yi kasi vanyãla a Moavi, ocipepi lomunda ya pisiga. Oku kala komunda ya Pisiga ekalasoko li mõleha.

²¹ Oco va Isareli va tuma olomunga ku Sihoni, Soma ya va Amori, hati,

²² Tua ku pinga oku pita vofeka yove. Ka tu pambukila vepia ndaño vocumbo cayuva. Ovava ovisimo ka tu nyui. Tu endela lika velila lia Soma te tua pita vofeka yove.

²³ Puãi Sihoni ka tavele okuti va Isareli va pita vofeka yaye. Sihoni wongolola asualali vaye vosi, kuenje wa enda kekalasoko oku liyaka la va Isareli. Weya ko Yahaca, wa liyaka la va Isareli.

²⁴ Va Isareli vo wipãla losipata. Va kuata ofeka yaye tunde ka Arinone toke ko Yavoka, toke kofeka ya va Amoni, momo Yahaca olio ongave yofeka ya va Amoni.

²⁵ Va Isareli va kuata ovaimbo aco osi. Kuenje va tunga vovaimbo osi a va Amori, vo Hesibone lovikanjo vialio viosi.

²⁶ Momo Hesibone lia kala imbo lia Sihoni, Soma ya va Amori, una wa liyaka losoma yale va Moavi kuenje wo nyeha ofeka yaye yosi, toke ko Arinone.

²⁷ Oco vakuakuta olosapo va kuete ocisungo citi, Enjui ko Hesibone, li tumbuluiwe. Imbo lia Sihoni li tungiwe.

²⁸ Momo ondalu ya tunda ko Hesibone. Ulienge wondalu wa tunda kimbo lia Sihoni, wa lia Are lia va Moavi, loku nyõla toke koviwulu via Arinone.

²⁹ A Moavi, ngongo yove! Amanu va fendaila Kemosi, wa nyõlehi. Kemosi wa eca omãla vaye valume okuti va tila., Lomãla vaye vakãi va linga olomandekua via Sihoni, Soma ya va Amori.

³⁰ Oco ombuto yavo ya taka tunde ko Hesibone toke ko Divone, Tua va nyõla toke ondalu ya pitila ko Medeva.

³¹ Oco va Isareli va tunga vofeka ya va Amori.

³² Noke Mose wa tuma oku lavulula Yaseri, kuenje va Isareli va kuata ovaimbo aco loku tundisa va Amori va kalamo.

³³ Oco va ñualãko, va enda lonjila yenda ko Basiane. Oge, Soma ya Basiane, wa va katukila, eye lasualali vaye vosi. Va yakela vo Edirei.

³⁴ Yehova wa popia la Mose hati, Ku ko lulumile, momo eye lomanu vaye vosi kuenda ofeka yaye, cosi nda ceca povaka ove. Kuenje o linga laye ndomo wa linga la Sihoni, Soma ya va Amori, wa tunga vo Hesibone.

³⁵ Oco va va ponda vosi, eye lomãla vaye kuenda omanu vaye vosi. Lomue wa puluka. Oco va kuata ofeka yaye.