ATENDELO 20 - Embimbiliya - Bíblia Sagrada em Umbundu

¹ Osãi yatete, owiñi wa va Isareli weya kekalasoko lie Cina, kuenje va tumãla ko Kadesi. Miriama oko a fila, haiko vo kuenda.

² Ka kua kaile ovava kuenje omanu vongoloka ha va lisiõsuĩla Mose la Arone.

³ Omanu va hoya la Mose, vati, Nda tua file cina vakuetu va fila kovaso a Yehova!

⁴ Omãla va Yehova wa va nenela nye vekalasoko lilo okuti tu filamo, etu lovinyama vietu?

⁵ Nye wa tu upila ve Egito, loku tu nena mũlo mũvi? Ka muli osi yolombuto ndaño yakuyu pamue ayuva pamue oloromeira. Ndaño ovava oku nyua ka muli.

⁶ Mose la Arone va tunda kowiñi, va enda kuvelo wombalaka yoku ñualehela la Yehova va wila posi loku lituvikapo. Kuenje ulamba wa Yehova wa mõleha kokuavo.

⁷ Yehova yu wa popia la Mose hati,

⁸ Nyañula ombueti. Love la huvove Arone, ongololi omanu. Sapuila esenje li kasi kovaso yavo, huti, Eca ovava. Oco o vopila ovava vesenje okuti o nyuisa omanu lovinyama viavo.

⁹ Kuenje Mose wopa ombueti kocitumãlo cayo kovaso ya yehova ndeci Yehova o sapuila.

¹⁰ Mose la Arone vongoluila omanu kovaso yesenje, Mose wa popia lavo hati, Kaliye yeveleli, avakuahuku, tu vu upila hẽ ovava vesenje lilo?

¹¹ Oco Mose wa tulika eka liaye, wa veta vesenje lombueti yaye olonjanja vivali. Mua tunda ovava a lua, kuenje omanu va nyua lovinyama viavo.

¹² Yehova yu wa popia la Mose kuenda Arone hati, Omo ka wa nõlẽleli oku ñolisila kovaso a va Isareli, oco ka wiñisi omanu ava vofeka nda va iha.

¹³ Ovava a ovava a Meriva, ca lomboloka Okuhoya, momo va Isareli va hoya la Yehova, kuenje wa lilekisa kokuavo okuti o kola.

¹⁴ Eci Mose a kala ko Kadesi wa tuma olomunga kosoma ye Edome, hati, Manjove Isareli wa popia, hati, Wa kulĩha ohali yetu yosi.

¹⁵ Wa kulĩha ndomo olosekulu vietu via lokĩla ke Egito lomo ve Egito tua kalamo osimbu. Etu lolosekulu vietu, va Egito va tu kangisa calua.

¹⁶ Eci tua vilikiya ku Yehova, eye wa yeva ondaka yetu, wa tuma ungelo wa tu upa ve Egito. Tala, etu valo kulo ka Kadesi, imbo li kasi kongave yove.

¹⁷ Tua tuma oku ku pinga okuti o tu pitisa vofeka yove. Ka tu piti vepia ndaño vocumbo cayuva. Ka tu nyui kovava ovisimo. Tu endela velila lia Soma, ka tu pambukila kondio ndaño kepili te tua pita vofeka yove yosi.

¹⁸ Puãi Edome wo kumbulula, hati, Ka ci tava oku pita vofeka yange sanga hu tundila losipata.

¹⁹ Va Isareli va livondela la Edome, vati, Tu endela ño velila. Nda etu pamue ovinyama vietu tu nyua ovava ove, tu feta. Tava okuti tu pita loku endela ño posi. Oco lika tua pinga.

²⁰ Puãi Edome wa kumbulula hati, Ka vu piti. Kuenje Edome wa va tundila lasualali valua va malehisua.

²¹ Oco Edome wa likala oku pitisa va Isareli vofeka yaye. Oco va Isareli vo sia, va enda lonjila yiñi.

²² Kuenje va Isareli vosi va tunda ko Kadesia, veya komunda ya Horo.

²³ Yehova wa popia la Mose kuenda Arone komunda ya Horo ya kala ongave yofeka ye Edome, hati,

²⁴ Arone enda kolosekulu viaye. Omo wa sini ondaka yange kovava a Meriva, oco ka iñilila vofeka nda eca ku va Isareli.

²⁵ Pañinya Arone lomõlaye Eleasa, kuende lavo komunda ya Horo.

²⁶ Lula Arone uwalo waye, u walisa omõlaye eleasa, kuenje Arone komunda haiko a fila, enda kolosekulu viaye.

²⁷ Mose wa linga ndomo Yehova a popia. Owiñi wosi wa va mõla eci va londa komunda ya Horo,

²⁸ Mose wa lula Arone uwalo waye, wo walisa omõlaye Eleasa, kuenje Arone wa fila oko kilu liomunda. Mose la Eleasa va loka komunda.

²⁹ Eci va Isareli va mõla okuti Arone wa fa, oco va Isareli vosi va lila Arone akui atatu koloneke.