ATENDELO 2 - Embimbiliya - Bíblia Sagrada em Umbundu

¹ Yehova wa popia la Mose kuenda Arone hati,

² Va Isareli va tunge ovilombo viavo omunu omunu kepandela liavo, okuti kepandela li kuete ondimbukiso yolosekulu viavo. Va tunge ocilombo okuti ci ñuala ombalaka yoku ñualehela la Yehova kuenje ovivelo viaco viosi vimbe ovaso kombalaka.

³ Ava va tunga kutundilo wekumbi ovo vakuepandela liocilombo ca Yuda. Va tunga ocisoko ocisoko. Usongui wa va Yuda, Nahisione, omõla a Aminadava.

⁴ Owiñi waye ndomo wa tendiwa wa tẽla akuĩ epanduvali kolohũlũkãi kolohũlũkãi vikuãla lovita epandu.

⁵ Ava va tunga konẽle yaye yimue, va Isakare. Usongui wa va Isakare, Netanele, omõla a Cuare.

⁶ Owiñi waye ndomo wa tendiwa wa tẽla akuĩ atãlo kolohũlũkãi kolohũlũkãi vikuãla lovita vikuãla.

⁷ Ava va tunga konele yaye yikuavo, va Sevulono. Usongui wa va Sevulono, Eliyava, omõla a Helone.

⁸ Owiñi waye ndomo wa tendiwa wa tẽla akuĩ atãlo kolohũlũkãi kolohũlũkãi epanduvali lovita vikuãla.

⁹ Vakuacilombo ca Yuda vosi, ndomo va tendiwa, va tẽla ocita lakuĩ ecelãla kolohulukãi kolohũlũkãi epandu lovita vikuãla. Ovo va votoka tete vocilombo.

¹⁰ Konẽle yoko Sul ku kala epandela liocilombo ca Ruvene. Va tunga ocisoko ocisoko. Usongui wa va Ruvene, Elicuru, omõla a Sedeyuru.

¹¹ Owiñi waye ndomo wa tendiwa wa tẽla akuĩ akuãla kolohũlũkãi kolohũlũkãi epandu lovita vitãlo.

¹² Ava va tunga konẽle yaye yikuavo va Simeone. Usongui wa va Simeone, Sielumiele, omõla a Curisiadai.

¹³ Owiñi waye ndomo wa tendiwa wa tẽla akuĩ atãlo kolohũlũkãi kolohũlũkãi ecea lovita vitatu.

¹⁴ Ava va tunga konẽle yaye yikuavo va Gadi. Usongui wa va Gadi, Eliyasafe, omõla a Rauele.

¹⁵ Owiñi waye ndomo wa tendiwa wa tẽla akuĩ akuãla kolohũlũkãi kolohũlũkãi vitãlo lovita epandu lakuĩ atãlo.

¹⁶ Vakuacilombo ca Ruvene vosi ndomo va tendiwa ya tẽla ocita lakuĩ atãlo kolohũlũkãi kolohũlũkãi yimosi lovita vikuãla lakuĩ atãlo. Ovo va kuama kuama va Yuda.

¹⁷ Oco ombalaka yoku ñualehela la Yehova yi tunda locilombo ca va Lewi pokati kovilombo. Ndeci va tunga haico va tunda, omunu omunu vocisoko caye kepandela liavo.

¹⁸ Kutakelo ku kala epandela liocilombo ce Efarimi. Va tunga ocisoko ocisoko. Usongui wa va Efarimi, Elisiama, omõla a Amihudu.

¹⁹ Owiñi waye ndomo wa tendiwa wa tẽla akuĩ akuãla kolohũlũkãi lovita vitãlo.

²⁰ Konẽle yimue, yaye ku kala va Manase. Usongui wa va Manase, Gamaliyele, omõla a Pedacuru.

²¹ Owiñi waye ndomo wa tendiwa wa tẽla akuĩ atatu kolohũlũkãi kolohũlũkãi vivali lovita vivali.

²² Konẽle yikuavo yaye ku kala va Benjamini. Usongui wa va Benjamini, Avidana, omõla a Gideoni.

²³ Owiñi waye ndomo wa tendiwa wa tẽla akuĩ atatu kolohũlukãi kolohũlũkai vitãlo voita vikuãla.

²⁴ Vakuacilombo ce Efarimi vosi ndomo va tendiwa va tẽla ocita colohũlũkai kolohũlũkai ecelãla locita. Ovo va kuama kuama va Lewi.

²⁵ Konẽle yoko Norte ku kala epandela liocilombo ca Dani. Va tunga ocisoko ocisoko. Usongui wa va Dani, Ahiesere, omõla a Amisiadai.

²⁶ Owiñi waye ndomo wa tendiwa wa tẽla akuĩ epandu kolohũlukai kolohũlũkai vivali lovita epanduvali.

²⁷ Va tunga konẽle yimue yaye va Asiere. Usongui wa va Asiere, Pagiyele, omõla a Okirana.

²⁸ Owiñi waye ndomo wa tendiwa wa tẽla akui akuãla kolohũlũkai kohũlukãi yimosi lovita vitãlo.

²⁹ Konẽle yaye yikuavo ava va tunga va Nafitali. Usongui wa va Nafitali, Ahira, omõla a Enane.

³⁰ Owiñi waye ndomo wa tendiwa wa tẽla akui atãlo kolohũlũkai kolohũlũkai vitatu lovita vikuãla.

³¹ Vakuacilombo ca Dani vosi ndomo va tendiwa va tẽla ocita lakuĩ atãlo kolohũlũkai kolohũlũkai epanduvali lovita epandu. Ovo vakuakusiala konyima lapandela avo.

³² Ava ovo va Isareli ndomo va tendiwa epata epata, vosi va kala vovilombo haivo va tendiwa ocisoko ocisoko, va tẽla ovita epandu kolohũlũkai, kolohũlukai vitatu, lovita vitãlo lakuĩ atãlo.

³³ Va Lewi puãi ka va tendiwile pokati ka va Isareli, ndomo Yehova a sepuila Mose.

³⁴ Cosi eci va Isareli va ci linga ndeci Yehova a sapuila Mose haico va tungila ovilombo kapandela avo; kuenje haico va endaenda okuti va tepisua epata epata, kuenje omunu omunu wa enda la vakuanjo yaye.