ATENDELO 19 - Embimbiliya - Bíblia Sagrada em Umbundu

¹ Yehova wa popia la Mose kuenda Arone hati,

² Ocisila cocihandeleko Yehova o wihi ceci: Sapuila va Isareli okuti va nena kokuene onema yi kusuka ka yi kuete etime ndaño etondelo, ka ya la enda kokanga.

³ Ene vu yeca kocitunda Eleasa, kuenje yupiwa vocilombo, yi tualiwa kofeka, oko yipailua kovaso aye.

⁴ Ocitunda eleasa o yava omuine waye vosonde yaco, o yi nyila loku imba ovaso kuvelo wombalaka yoku ñualehela la Yehova. O ci linga olonjanja epanduvali.

⁵ Onema yi yokiwila kovaso aye. Ocipa caco lositu losonde laniña vi yokiwa.

⁶ Ocitunda ci nyañula uti wo-cedro, kuenda hisope leci cohula ha vi imbi vokati kelungulungu lioku yoka onema.

⁷ Eci a mãla ocitunda ci sukula uwalo waye, loku yuisa etimba liaye, noke ciñila vocilombo. Ocitunda ci vĩhĩsua toke oñolosi.

⁸ U o yoka onema layevo o sukula uwalo waye loku yuisa etimba liaye kuenje o vĩhĩsua toke oñolosi.

⁹ Omunu wa yela eye o nyomõla etiko lionema, o li kapa pamue pa yela kofeka. Li kapiwila va Isareli, okuti li tengiwa lovava, kuenje ovava aco a tengiwa letiko o-o ovava oku yelisa evĩho liekandu.

¹⁰ U o nyomõla etiko lionema o sukula uwalo waye, kuenje o vĩhĩsua toke oñolosi. Eci ku va Isareli kuenda kukombe wa tunga pokati kavo ci linga ocisila ka ci pui.

¹¹ U o lamba ocivimbi o vĩhĩsua oloneke epanduvali.

¹² Keteke liatatu kuenda keteke liepanduvali o yua vovava aco. Kovaso yaco wa yela. Puãi nda keteke liatatu kuenda keteke liepanduvali ka yui ka tẽla oku yela.

¹³ Wosi o lamba ketimba liomunu wa fa kuenje ka yui o vĩhĩsa otavernakulu ya Yehova. Omunu waco o tepiwa ku va Isareli. Omo ka vo nyilile ovava oku yelisa evĩho oco wa vĩha. Evĩho liaye haimo o kasilili lalio.

¹⁴ Eci omunu a fila vombalaka ocihandeleko caco ceci: Wosi iñila vombalaka yaco, kuenda u wosi o kasi ale vombalaka yaco, vosi yavo va vĩhĩsua oloneke epanduvali.

¹⁵ Ocikuata cosi ci kasi upulule okuti ka ca kutiwile komẽla ca vĩhĩsua.

¹⁶ Omunu nda o kasi vusenge kuenje o lamba omunu wa ipaiwa losipata, pamue ocivimbi cu wa fa ño, pamue ekepa liomunu, pamue eyambo, o vĩhĩsua oloneke epanduvali.

¹⁷ Omunu waco wa vĩhĩsua vo nyañuila petiko lina lioku yelisa evĩho liekandu, va li kapa vocikuata loku li tenga lovava eteke liaco.

¹⁸ Noke omunu umue wa yela o nyañula hisope, o yi yava vovava aco, kuenje o yi nyila kombalaka yaco lo kovikuata viosi kuenda komanu va kalako, lo komunu wa lamba kekepa, pamue ku wa ipaiwa, pamue ku wa fa, pamue keyambo.

¹⁹ Kuenda vali keteke liatatu leli liepanduvali u wa yela o nyila u wa vĩhĩsua, okuti keteke liepanduvali u wa yela o mãla oku yelisa u wa vĩhĩsua. Noke u wa vĩhĩle o sukula uwalo waye, o yua, kuenje koñolosi wa yela.

²⁰ Puãi u wa vĩhĩsua kuenje ka liyelisa upiwa ku va Isareli, momo wa vĩhĩsa ocitumãlo ci kola ca Yehova. Omo ka vo nyilile ovava oku yelisa evĩho liekandu oco wa vĩha.

²¹ Kokuavo ocisila eci ci linga ocisila ka ci pui. U o nyila ovava oku yelisa evĩho liekandu o sukula uwalo waye. Lu o lamba kovava aco o vĩhĩsua toke koñolosi.

²² Cosi ca lambiwa lu wa vĩhĩsua ci vĩhĩsuavo. Wosi o ci lamba o vĩhĩsua toke koñolosi.