ATENDELO 18 - Embimbiliya - Bíblia Sagrada em Umbundu

¹ Oco Yehova wa popia la Arone hati, Ove lomãla vove kuenda epata liene, ene vu kuete ocikele cepiso liovina via kamba vocitumãlo ci kola, haene vu kuete ocikele cepiso liovina via kamba vutunda wene.

² Vakuẽle vakuepata lia Lewi, hailio epata liaso, lavovo veye, va kale love oku ku vumba osimbu ove lomãla vove vu kasi kovaso yombalaka yovisila.

³ Va ku vumbe loku linga ovopange osi ovombalaka. Puãi ka va kamẽle kovikuata viocitumãlo ci kola ndaño kutala, sanga ovo love vosi vu fa.

⁴ Va kale lene kuenje ocikele covopange osi ombalaka yoku ñualehela la Yehova ci linga cavo. Umue wiñi ka ka amẽle kokuene.

⁵ Ene wu kala locikele cocitumãlo ci kola locikele cutala, okuti onyeño ya Suku ka yi wengukila vali va Isareli.

⁶ Tala, ku va Isareli ndopako vakuẽle va Lewi. Va tumbikiwa ku Yehova kuenje va eciwa kokuene ha va lingi upange wombalaka yoku ñualehela la Yehova.

⁷ Ove lomãla vove vu kala lovikele viutunda wene kuenje vu linga ovina viosi vi tiama kutala levi vi kasi vokati kongumbo. Owo upange wene. Ene muẽle nda wihi ocikundi cupange u. Umue wiñi nda amẽlako ipaiwa.

⁸ Yehova yu wa popia la Arone hati, Tala, eteku liene li tunda kolonepa ka vi yokiwa viovilumba vi kola va Isareli va nenela. Ovio muẽle nda eca kokuove lomãla vove ha vi lingi onepa yene oloneke ka vi pui.

⁹ Olonepa ka vi yokiwa vi upiwa kovilumba vi kola ovio vi linga viene. Ovilumba viosi vi ndumbila, okuti ovilumba viosi violomema lovilumba viosi viekandu, lovilumba viosi vieko, viosi vi kola okuti ove lomãla vove lika vu tẽla oku vi lia.

¹⁰ O vi lila viocitumãlo ci kola. Alume vakuepata liove va tẽla oku vi lia. Ene lika vu tela oku vi lia omo vi kola.

¹¹ Cikuavo ci linga cene ceci, ovilumba viosi vioku yangelisa vina vi nena nena va Isareli. Nda vi eca kokuove lokomãla vove valume kuenda komãla vove vakãi ha vi lingi onepa yene oloneke ka vi pui. Vosi va kasi vonjo yove nda va yela va tẽla oku vi lia.

¹² Ulela wosi wa velapo, lovinyu viosi via velapo kuenda olomema viosi via velapo lovaima atete va ecaeca ku Yehova, ovio nda ku iha.

¹³ Ovaima a pia tete vofeka yavo yosi, ana va nena nena ku Yehova, a linga ove. Vosi va kasi vonjo yove nda va yela va tẽla oku a lia.

¹⁴ Vo Isareli, cosi ca lumbiwa kokuange ci linga cove.

¹⁵ Olonuñulu viosi vi lumbiwa ku Yehova vi linga viove, ci kale viomanu, ci kale viovinyama. Puãi olonuñulu viomanu vi yovuiwa, lolonuñulu viovinyama ka vi yeli laviovo vi yovuiwa. Eci vi tẽla osãi oco vi yovuiwa.

¹⁶ Olombongo vioku yovola vi soka lolosiekele vitãlo viopalata. Olosiekele viaco, olosiekele viocitumãlo ci kola. Osiekele yimosi ya soka lakui avali kolongera.

¹⁷ Puãi onuñulu yongombe pamue onuñulu yomeme pamue onuñulu yohombo ka ci tava oku vi yovola omo vi kola. Osonde yavio o yi nyĩla kutala, lulela wavio u yoka ndocilumba covondalu, elemba liaco li pepa ku Yehova.

¹⁸ Puãi ositu yavio yi linga yove ndeci onete yoku yangelisa kuenda ocikalo condio vi linga viove.

¹⁹ Ovilumba viosi vi kola va Isareli va lumba lumba ku Yehova nda vi eca kokuove lokomãla vove valume kuenda komãla vove vakãi ha vi lingi onepa yove oloneke ka vi pui. Kokuove kuenda kombuto yove eci ca linga ocisila comongua. Wa ci lisili la Yehova kuenje cenda ño hũ ka ci pui.

²⁰ Kuenje Yehova wa popia la arone hati, Ku sangi ocipiñalo vofeka yavo, ndaño onepa yimue pokati kavo ku kuata. Ame muẽle ndinepa yove haime ndicipiñalo cove pokati ka va Isareli.

²¹ Va Lewi nda va iha ocipiñalo colonepa viosi viekuĩ evi va Isareli va lumba lumba. Ci linga onima yavo yupange va linga oku vumba vombalaka yoku ñualehela la Yehova.

²² Va Isareli ka veya vali ocipepi lombalaka yoku ñualehela la Yehova, sanga ci linga ekandu kuenje va fa.

²³ Puãi va Lewi va linga upange wovombalaka yoku ñualehela la Yehova kuenje va kala locikele cepiso liovina via kamba. Ci linga ocisila ka ci pui kovitumbulukila viene viosi. Pokati ka va Isareli ka va kala locipiñalo.

²⁴ Momo va Lewi nda va iha ocipiñalo conepa yekui yina va Isareli va lumba lumba ku Yehova. Oco nda va sapuila okuti pokati ka va Isareli ka va sangi ocipiñalo.

²⁵ Yehova wa popia la Mose hati,

²⁶ Sapuilavo va Lewi huti, Eci wa tambula ku va Isareli onepa yekui yi tunda kokuavo kuenje yi linga ocipiñalo cene, oco konepa yaco yekui wupiko onepa yekui, okuti onepa yekui yonepa yekui yi linga ocilumba cene coku Yehova.

²⁷ Kuenje ocilumba cene cu tendiwili ndolomema viene viopocisaselo pamue ndovinyu viokocikoselo cayuva.

²⁸ Oco lenevo wu lumba lumba ku Yehova ocilumba ci tunda kolonepa viene viosi viekui wu tambula ku va Isareli. Kuenje onepa yaco yekui yonepa yekui ya lumbiwa ku Yehova vu yevi kocitunda Arone.

²⁹ Kolombanjaile viosi vu tambula vu tepapo onepa yocilumba yina yi tiama ku Yehova. Onepa vu tepako yeyi ya velapo, haiyo yi linga ocilumba ci kola.

³⁰ Oco popia lavo huti, Eci wa tepipo ale onepa ya velapo kuenje wa yi lumbi oco onepa yi sialapo yi tendiwila va Lewi ndolomema via tunda kocimbandi pamue ndovinyu via tunda kocikoselo.

³¹ Kuenje ci tava oku vi lila kuosi vu kasi, ove la vakuanjo yove. Momo ovio onima yupange vu linga vombalaka yoku ñualehela la Yehova.

³² Kuenje nda vu tepapo onepa ya velapo loku yi lumba oco ka vu sangi vali episo liekandu. Ka ci tava oku vĩhĩsa ovina vi kola via va Isareli sanga vu fa.