ATENDELO 17 - Embimbiliya - Bíblia Sagrada em Umbundu

¹ Yehova wa popia la Mose hati,

² Vangula la va Isareli. Tambula kokuavo olombueti, okuti epata ombueti, epata ombueti. Tambula olombueti ekuĩ la vivali, okuti kukulu wepata ombueti, kukulu wepata ombueti. Sonẽha olonduko, omunu omunu kombueti yaye.

³ Sonẽha onduko ya Arone kombueti ya Lewi, momo ukulu wepata o kala lombueti, ukulu wepata lombueti.

⁴ Eci wa soneha ale oco o vi kapa vombalaka yoku ñualehela la Yehova kovaso yocikasia covisila, oko sole oku ñualehela lene.

⁵ Oco ulume ndu nola ombueti yaye yi yova. Ndi ci lingila okuti si yevi vali okulisiõsiõla kua va Isareli ndomo va kasi loku u lisiõsuĩli.

⁶ Mose wa popia la va Isareli kuenje akulu vavo vosi vo wiha olombueti. Olombueti via tẽla ekui la vivali okuti ukulu wepata ombueti, ukulu wepata ombueti. Ombueti ya Arone ya kala pokati kolombueti viavo.

⁷ Mose wa kapa olombueti kovaso a Yehova vombalaka yoku ñualehela la Yehova.

⁸ Oco hẽla Mose wa iñila vombalaka yoku ñualehela la Yehova, kuenje tala, ombueti ya Arone, ukuepata lia Lewi, ya yova, ya tẽleha olonẽleho, kuenje ya ima olomendoa via pia.

⁹ Oco Mose wa nyañula olombueti viosi via kala kovaso a Yehova, kuenje wa vi tuala posamua oku vi lekisa ku va Isareli vosi. Va Isareli va vi vanja kuenje va nolapo u ombueti yaye, u ombueti yaye.

¹⁰ Oco Yehova wa popia la Mose hati, Kapa vali ombueti ya Arone kovaso yocikasia covisila. Oko yi kala kala ha yi lingi ondimbukiso kuava va ñualelapo. Yi kapelako okuti wimũla oku lisiõsuĩla ame okuti ka va fi.

¹¹ Mose wa ci linga. Ndeci Yehova o sapuila haico a linga.

¹² Kuenje va Isareli va popia la Mose vati, Tala, etu tu kunduka, tua nyõleha, tua nyõlẽha vosi.

¹³ Vosi va amẽla kotavernakulu ya Yehova va fa. Etu vosi tu kunduka nga?