ATENDELO 15 - Embimbiliya - Bíblia Sagrada em Umbundu

¹ Yehova wa popia la Mose hati,

² Sapuila va Isareli huti, Eci wiñili vofeka ndu wihi omu wu tunga,

³ kuenje wupi kocunda cologombe pamue kocunda colomeme ho lumbila Yehova ocilumba covondalu, pamue coku pia elisi, pamue coku yoka, okuti vu tẽlisa ohuminyo, pamue weci ocilumba cocipango, pamue ceci colofesta viene, oku lingila Yehova elemba li pepa

⁴ oco, u o nena ocilumba caye eca ku Yehova ocilumba colomema conepa yekuĩ yefa yosema ya fina ya tengiwa lonepa yakuãla yohine yulela.

⁵ O pongiyavo onepa yakuãla yohine yovinyu viocilumba cokunyua. Onepa yaco yovinyu yi lumbilua kumuamue locilumba coku pia elisi leci coku yoka. Yi lumbiluavo lotumeme okuti okameme ka lumbilua lonepa yovinyu.

⁶ Nda wa nena ocitupi comeme o pongiyavo olonepa vivali viekui viefa liosema ya fina kuenje o yi tenga lonepa yatatu yohine yulela. Eci ci linga ocilumba colomema cendela pamosi locilumba cocitupi.

⁷ Leci o nena ocilumba cokunyua o lumbavo onepa yatatu yohine yovinyu, elemba liaco li pepa ku Yehova.

⁸ Eci o nena onale ha yi lingi ocilumba coku pia elisi, pamue coku yoka pamue coku tẽlisa ohuminyo yocisila pamue cocitundasonde combembua ku Yehova,

⁹ oco o lumbavo kumue lonale yaco ocilumba colomema colonepa vitatu viekuĩ viosema ya fina ya tengiwa lomeyu yohine yulela.

¹⁰ O lumbavo omeyu yohine yovinyu ha yi lingi ocilumba cokunyua. Ovinyu viaco o vi yoka omo elemba liaco li pepa ku Yehova.

¹¹ Oco ci lingiwila olonale viosi lovitupi viosi violomeme lomãla vosi volomeme lomãla vosi volohombo, ocinyama ocinyama.

¹² Oco o linga lovinyama viosi o lumba, ocinyama ocinyama.

¹³ Olonyitiwe eci vi lumba ocilumba covondalu, okuti elemba liaco li pepa ku Yehova, vi linga ovina evi ndoco.

¹⁴ Ndaño ukombe umue wa tunga lene, pamue ocingendeleyi cimue ci kasi pokati kene osimbu ci yongola oku lumba ocilumba covondalu, elemba liaco li pepa ku Yehova, ci tava, a lumbe ndove.

¹⁵ Owiñi wene wosi u kala locihandeleko cimosi, ci kale ene, ci kale ukombe wa tunga lene. Ocihandeleko caco cenda ño-o hũ kovitumbulukila viene viosi, ka ci pongoloka. Ndeci ene vu kasi haico ci kala ukombe wene kovaso a Yehova.

¹⁶ Ocihandeleko cene locisila cene leci cukombe wa tunga lene ci linge cimuamue.

¹⁷ Yehova wa popia la Mose hati,

¹⁸ Sapuila va Isareli huti, Eci wiñili vofeka omo ndu tuali,

¹⁹ leci wu lia okulia kuovofeka, oco ve tepela Yehova onepa yaye.

²⁰ Ekende limue liocitiva cene catete vu li eca ndocilumba, vu li eca ndocilumba ci tunda kocimbandi.

²¹ Kocitiva cene catete ku tunda ocilumba ci lumbiwa ku Yehova toke kovitumbulukila viene viosi.

²² Puãi nda wu lueya, kuenje ko lingi ovihandeleko evi viosi Yehova a popia la Mose,

²³ okuti viosi Yehova o sapuili kuenje via popiwa la Mose, tunde keteke Yehova a handeleka, toke kovitumbulukila viene viosi,

²⁴ nda ca lingiwa lonumbi, omo owiñi ka wa kulĩhĩle ocihandeleko caco, oco owiñi wosi u lumba onale yongombe ndocilumba coku pia elisi, elemba liaco li pepa ku Yehova. Onale yaco o yi lumbila kumue locilumba colomema locilumba cokunyua ndocihõlo caco, kuenda kumue locitupi cohombo ndocilumba cekandu.

²⁵ Ocitunda ci likutilila va Isareli vosi oku tuvika ekandu liavo, kuenje va ecelua momo va lueyele onumbi, kuenje va nenela okulueya kuavo ocilumba, va nena ku Yehova ocilumba covondalu kuenda ocilumba cavo cekandu va lingila Yehova.

²⁶ Oco va Isareli vosi va ecelua, ndaño ukombe wa tunga pokati kavo, momo omanu vosi va lueyele onumbi.

²⁷ Nda omunu umue o lueya onumbi o lumba omange yohombo yunyamo ndocilumba cekandu.

²⁸ Oco omunu wa linga ekandu lioku lueya onumbi, ocitunda cu likutilila oku tuvika ekandu liaye kuenje omunu waco ecelua.

²⁹ Vu kala locihandeleko cimuamue cu o lueya onumbi, ci kale onyitiwe ya va Isareli, ci kale ukombe wa tunga lavo.

³⁰ Puãi omunu wa lueya ocipango, ci kale onyitiwe, ci kale ukombe, yu wa tomba Yehova, omunu waco o tepiwa ku vakuavo.

³¹ Omo a pembula ondaka ya Yehova, kuenda wa sama ocihandeleko caye, oco omunu waco o tepiwa muẽle, ekandu liaye liu pekela eye muẽle.

³² Eci va Isareli va kala vekalasoko va sanga ulume o tiaña olohui eteke liesambata.

³³ Ava vo sanga o tiaña olohuĩ vo nena ku Mose la Arone kuenda owiñi wosi.

³⁴ Oco vo yika, momo ka ca tukuiwile handi eci ca sunguluka oku linga laye.

³⁵ Yehova wa popia la Mose hati, Omunu waco ipaiwa. Owiñi wosi u tunda vocilombo, wenda laye kofeka haiko vo sosuila lovawe.

³⁶ Kuenje owiñi wosi wa tunda vocilombo, u tuala kofeka kuenje u sosola lovawe toke o fa ndeci Yehova a sapuila Mose.

³⁷ Yehova wa popia la Mose hati,

³⁸ Sapuila va Isareli huti, Tongeli olonjenje kasũsu uwalo wene, kuenje tongihinyi kolonjenje viosi ukolo wonoloti. Ci lingaingi kovitumbulukila viene viosi.

³⁹ Oco poku vanja vanja kolonjenje viene wivaluki ovihandeleko viosi via Yehova okuti vu vi linga, kuenje ka vu kuama vali ocipululu covaso ene pamue olonjongole viovitima viene vina viu kokeli oku linga akandu.

⁴⁰ Oco wivaluki ovihandeleko viange viosi okuti vu vi linga kuenje vu kola ku Suku yene.

⁴¹ Ame ndi Yehova ame Suku yene, ame muẽle ndo wupi vofeka ye Egito okuti ndinga Suku yene. Ame ndi Yehova ame Suku yene.