ATENDELO 14 - Embimbiliya - Bíblia Sagrada em Umbundu

¹ Oco owiñi wosi wa kaluka ondaka. Uteke waco omanu va lila.

² Va Isareli vosi va lisiõsuĩla Mose la Arone. Owiñi wavo wosi wa popia lavo uti, Avoyo, hĩse nda tua filile vofeka ye Egito! Hise nda tua filile vekalasoko lilo!

³ Yehova o tu nenela nye vofeka yilo okuti tu fa losipata? Akãi vetu lomãla vetu va ka kuatiwa. Ka ca tu velelepo hẽ oku tiukila ke Egito?

⁴ Kuenje va livanguila pokati vati, Tu noli usongui, tu tiukili ke Egito.

⁵ Oco Mose la Arone va wila posi, va lituvikilapo kovaso owiñi wosi wa va Isareli.

⁶ Yehosua, omõla a Nune, la Kalembe, omõla a Yefune, haivo va kala pokati kava va ka lavuluile ofeka, va kesula uwalo wavo.

⁷ Va popia la va Isareli vosi, vati, Vofeka omo tua pita oku lavulula, ofeka yaco yiwa ca lua.

⁸ Nda Yehova o tu sanjukila o tu tuala vofeka yaco loku tu yiha; lofeka yaco ofeka yi tumõha asenjele lowiki.

⁹ Cimosi lika okuti, ko ka ñualelipo Yehova, kuenda vali ko ka yokokeli omanu vofeka yaco, momo kokuavo oko ku tunda okulia kuetu. Ombindikiyo yavo ya va tunda, kuenje Yehova o kasi letu. Ko ka va yokokeli.

¹⁰ Puãi owiñi wosi wa popia uti, Yehosua la Kalembe tu va sosola lovawe. Kuenje haico ulamba wa Yehova wa mõlẽhela ku va Isareli vosi vombalaka yoku ñualehela la Suku.

¹¹ Yehova wa popia la Mose hati, Eteke lipi omanu ava va liweka oku membula? Ndaño ndukuakuvaiha olondimbukiso via lua haimo okuliñala kuavo ku sulila eteke li pi?

¹² Ndi va veta lefengi kuenje ndi va pañula. Noke fetika vali love kuenje hu lingisa ofeka yinene haiyo ya velapo kolohõlo, okuti ovo va sule.

¹³ Noke Mose wa kumbulula Yehova hati, Nda oco o linga va Egito va ci yeva, momo omanu ava ove wa vopa pokati kavo lunene wove,

¹⁴ kuenje va Egito va ci sapula kolonungi viofeka yilo. Va yeva yeva okuti ove u Yehova o kasi pokati komanu valo. Momo ove a Yehova o muiwa iso liso. Elende liove li va tulamẽla kuenje ove muẽle o va pitila kovaso. Utanya wendela vongunje yelende, uteke wendela vongunji yondalu.

¹⁵ Kaliye, nda wipa omanu ava ndomunu umosi, oco olofeka via yeva oluhimo luove vi popia viti,

¹⁶ Omo Yehova ka tẽlele oku iñisa omanu ava vofeka a likuminya oku va iha, oco a va ipailela vekalasoko.

¹⁷ Oco kaliye ndi likutilila kokuove siti, Unene wa Ñala u lue ndeci wa likuminya huti,

¹⁸ Yehova ukuakulivala konyeño haeye ukuacisola ka ci pongoloka. Eye ecela olohole loku lueya puãi ka yovuisa ukueko. O fetuluinyila omãla ongole ya vaisiavo toke kocitumbulukila catatu leci cakuãla.

¹⁹ Ndi likutilila okuti wecela ongole yomanu ava, oku va ecela omo ocisola cove ka ci pongoloka lomo wa va ecaela ale akandu avo tunde ke Egito toke kulo.

²⁰ Oco Yehova wa kumbulula hati, Ci tava, ndi va ecela ndomo wa likutilila,

²¹ puãi, ndeci ñasi lomuenyo kuenda ndeci ulamba wa Yehova u yukisa oluali luosi,

²² momo omanu vaco vosi, ndaño va mõla ulamba wange lolondimbukiso viange nda lingila ve Egito lo vekalasoko, haimo va nyika olonjanja evi ekuĩ, kuenje ka va tavele kondaka yange,

²³ oco lomue pokati havo o mola ofeka nda likuminya oku eca kolosekulu viavo. Pokati kava va membula lomue o yi mõla.

²⁴ Puãi ukuenje wange Kalembe, omo a kala lutima wiñi kuenje wa ñuama ocili, eye ndu tuala vofeka omo a iñilile ale. Ombuto yaye oyo yi tungamo.

²⁵ Kaliye, omo va amaleke la va Kanana va tunga volomuva oco omẽle tiukili kekalasoko oku enda lonjila yenda ko Kalunga Kakusuka.

²⁶ Yehova yu wa popia la Mose kuenda Arone hati,

²⁷ Okulisiõsuĩla kuomanu ava va tatama ku liweka eteke lipi? Nda yeva okulisiõsiõla kua va Isareli ndomo va lisiõsuĩla.

²⁸ Popia lavo huti, Ca popia Yehova ceci, hati, Ndeci ñasi lomuenyo, ocili, eci wa popi lame nda ci yeva, oco ndu lingi.

²⁹ Vekalasoko lilo omo mu siala ovivimbi viene. Ene vosi wa sonehiwi okuti vosi vakuanyamo akuĩ avali kuenda kua supa haene wa lisiõsuĩli,

³⁰ pokati kene lomue iñila vofeka nda likuminya okuti ndu tungisimo, te Kalembe, omõla a Yefune, la Yehosua, omõla a Nune.

³¹ Puãi omãla vene vatito ava wa lombololi hoti, Va kuatiwa, ovo ndi va iñisa kuenje ovo va kulĩha ofeka ene wa pembuli.

³² Ene puãi, ovivimbi viene vi siala mũlo vekalasoko.

³³ Omãla vene va linga angombo vekalasoko akuĩ akuãla kanyamo. Va talela olukonyo luene ohali toke vosi wa fi kuenje ovivimbi viene vi siala vekalasoko.

³⁴ Koku tenda, oloneke wa ka lavuluili ofeka akuĩ akuãla vi soka lanyamo vu yambuiwa, okuti akuĩ akuãla. Kuenje wu limbuka ndomo nda liamũha lene.

³⁵ Ame ndi Yehova nda popia. Eci oco ndingila omanu ava va tatama haivo va ñatukila. Mũlo vekalasoko omo va taka haimo va fila.

³⁶ Ovalume vana Mose a tumĩle oku lavulula ofeka, haivo va tiuka kuenje va wengula owiñi wosi oku lisiosiola omo va tukuila ofeka yaco oluhimo luvĩ,

³⁷ ovalume vaco va tukuila ofeka oluhimo luvĩ, va fa lefengi kovaso a Yehova.

³⁸ Puãi kovalume va ka lavuluile ofeka yaco, Yehosua, omõla a Nune, la Kalembe, omõla a Yefune, va supapo lomuenyo.

³⁹ Mose wa sapuila va Isareli vosi olondaka evi kuenje omanu va lila ca lua.

⁴⁰ Va pasuka omẽle ociteketeke, va londa komunda yimue kuenje vati, Ocili tua linga ekandu puãi haimo lumue, kua ca. Tuenda muẽle kofeka Yehova wa likuminya oku tu iha.

⁴¹ Puãi Mose wa popia hati, Vu nyõlela nye ocihandeleko ca Yehova? Oco ka ci koki oku enda ciwa.

⁴² Ko ka lamani sanga vu yuliwa lovanyali vene omo yehova ka kasi lene.

⁴³ Momo va Amaleke la va Kanana va kasi kovaso yene, kuenje wu kupuiwa losipata. Omo wa tinduki poku kuama Yehova oco yehova ka kala vali kumue lene.

⁴⁴ Puãi ndaño ocikasia covisila via Yehova ka ca tundile vocilombo kuenda Mose layevo ka tundile, haimo va amela losiata oku londa omunda.

⁴⁵ Oco va Amaleke la va Kanana, ava va tunga komunda yaco, va loka, kuenje va va yula, va va lupuisa toke ko Horima.