ATENDELO 12 - Embimbiliya - Bíblia Sagrada em Umbundu

¹ Miriama la Arone va sokola Mose omo a tambula ukãi u Kusi, momo ocili wa kuela muẽle u Kusi.

² Va popia vati, Yehova nga wa popia lika la Mose? Ka popelevo letu? Yehova wa ci yeva.

³ Kaliye Mose ulume womboka cimue, omanu vosi kilu lieve va sule.

⁴ Yehova yu wa popia ocipikipiki la Mose kuenda Arone la Miriama, hati, Katatu kene enjui kombalaka yoku ñualehela lame. Oco va tunda, veya.

⁵ Yehova yu wa loka vongunji yelende, wa talama kuvelo wombalaka, kuenje wa kovonga Arone la Miriama. Ovo va amako kavali kavo.

⁶ Yehova wa popia hati, Kaliye, yeveleli olondaka viange. Eci pokati kene pa kasi uprofeto, ame Yehova ndi lisitulula kokuaye vocinjoinjoi, mopia laye vonjoi.

⁷ Hacoko ukuenje wange Mose. Eye wa kolelua vonjo yange yosi.

⁸ Eci ca lomboloka oco mopia laye omẽla lomẽla, si popi laye asende. Kuenje eye o mõla muẽle Yehova. Oco hẽ, nye ka co lingilili usumba oku sokola ukuenje wange Mose?

⁹ Oco onyeño ya Yehova ya va wengukila kuenje wa enda.

¹⁰ Eci elende lia katuka kombalaka, oco tala, Miriama wa linga ukuavilundu, wa yela pe. Arone yu wa vanja Miriama ndomo a linga ukuavilundu.

¹¹ Oco Arone wa popia la Mose hati, A Ñala yange, ku ka tu yambuile uveke wetu pamue ekandu tua linga.

¹² Miriama ka ka kale ndocivimbi, pamue ndu wa citiwa tupu ositu yaye yalua ya nyõlẽha ale.

¹³ Mose wa vilikiya Yehova hati, A Suku, hu pinga okuti u sakula.

¹⁴ Puãi Yehova wa kumbulula Mose hati, Nda isiaye wo siyilile kocipala ka co lingisile osõi oloneke epanduvali? A likalele oloneke epanduvali kupãla locilombo. Kovaso yaco ci tava oku u nena vali kocilombo.

¹⁵ Oco Miriama a likalela kupãla locilombo oloneke epanduvali. Omanu ka va votokele ungende toke Miriama a neniwa vali vocilombo.

¹⁶ Eci a neniwa oco omanu va tunda ko Haceroti kuenje va tunga ocilombo vekalasoko lia Parane.