ATENDELO 10 - Embimbiliya - Bíblia Sagrada em Umbundu

¹ Yehova wa popia la Mose hati,

² Tunga olombeta vivali viopalata. O vi tunga loku vi tela. O kala lavio oku kovonga omanu loku katula ocilombo.

³ Eci kavali havio via sikiwa oco owiñi wosi u liongoluila kokuove kuvelo wombalaka yoku ñualehela la Yehova.

⁴ Puãi nda va sika lumuamue lika, ovasongui, okuti akulu vapata a va Isareli, oco va liongoluila kokuove.

⁵ Nda o sikila ocilunga, oco ovilombo vi kasi kutundilo vi katuka.

⁶ Eci o sikila vali ocilunga, okuti onjanja yavali, oco ovilombo vi kasi ko Sul vi katuka. Olonjanja viosi poku katuka olumbeta lu sikiwa.

⁷ Puãi eci o sika oku ongolola omanu okusika kuaco ka ku soki loku kuoku sikila ocilunga.

⁸ Omala va Arone okuti ovitunda, ovo va sika sika olombeta. Kokuene olombeta vi kala ndocisila ka ci pui kovitumbulukila viene viosi.

⁹ Vofeka yene nda wendi kovita oku yaka lovanyãli vo kangisi oco vu sika oku sikila ocilunga okuti wivalukiwa la Yehova, Suku yene, loku popelua kovanyãli vene.

¹⁰ Keteke liesanju liene laliovo, lokolofesta viene, lo kokumõleha kuolosãi viene, oco vu sika olombeta, oku sikila ovilumba viene vioku pia elisi, lovitundasonde viene viombembua. Olombeta viu wivaluisi Suku yene. Ame ndi Yehova, ame Suku yene.

¹¹ Kunyamo wavali, vosãi yavali, keteke liakuĩ avali kosãi, elende lia yeluka kotavernakulu yuvangi.

¹² Oco va Isareli va tunda vekalasoko lia Sinai oku tunda ocisoko ocisoko. Elende lia talama vekalasoko lia Parane.

¹³ Oco va tunda onjanja yatete ndondaka ya Yehova ya popiwa la Mose.

¹⁴ Epandela liocilombo ca va Yuda olio lia tunda tete. Va tunda ovisoko. Usongui wovisoko viosi via va Yuda, Nahisione, omõla a Aminadava.

¹⁵ Usongui wovisoko viosi via va Isakare, Netanele, omõla a Cuare.

¹⁶ Usongui wovisoko viosi via va Sevulono, Eliyava, omõla a Helone.

¹⁷ Eci va tungulula otavernakulu, oco omãla valume va Gerisiono lomãla valume va Merari va ambata otavernakulu kuenje va tunda.

¹⁸ Oco epandela liocilombo ca Ruvene lia tunda. Va tunda ovisoko, Usongui wovisoko viosi via Ruvene, Elicuru, omõla a Sedeyuru.

¹⁹ Usongui wovisoko viosi via va Simeone, Sielumiele, omõla a Curisiadai.

²⁰ Usongui wovisoko viosi via va Gadi, Eliyasafe, omõla a Dewele.

²¹ Oco va Kohata va tunda, va ambata ovina vi kola. Vakuavo va sokeka ale otavernakulu osimbu ka veyile.

²² Noke epandela liocilombo ca va Efarimi lia tunda. Va tunda ovisoko. Usongui wovisoko viosi via va Efarimi, Elisiama, omõla a Amihudu.

²³ Usongui wovisoko viosi via va Manase, Gamaliyele, omõla a Pedacuru.

²⁴ Usongui wovisoko viosi via va Benjamini, Avidana, omõla a Gideoni.

²⁵ Oku sulako epandela liocilombo ca va Dani lia tunda. Va tunda ovisoko. Usongui wovisoko viosi via va Dani, Ahiesere, omõla a Amisiadai.

²⁶ Usongui wovisoko viosi via va Asiere, Pagiyele, omõla a Okirana.

²⁷ Usongui wovisoko viosi via va Nafitali, Ahira, omõla a Enane.

²⁸ Oco ca kala okulikuama kua va Isareli eci va tunda ocisoko ocisoko.

²⁹ Mose yu wa popia la Hovava, omõla a Reuele u Midiane, ndatembo ya Mose, hati, Etu tu enda kuna kua popia Yehova hati, Ndu wiha. Oco enju wenda letu, tu ku linga ciwa; momo Yehova wa tukuila va Isareli eci ciwa.

³⁰ Puãi Hovava wa kumbulula hati, Si endi. Ngenda kofeka yetu ku vangandiange.

³¹ Mose wa popia hati, Avoyo, ku ka tu sie, momo ove wa kulĩha ndomo tu tunga tunga ovilombo vietu vekalasoko, o linga ovaso etu.

³² Oco nda wenda letu, ocili, cosi ciwa Yehova a tu lingila etu haico etu tu ku lingila ove.

³³ Oco va tunda komunda ya Yehova kuenje va enda ungende woloneke vitatu. Loloneke viaco vitatu ocikasia covisila via Yehova ca va pitila kovaso, oku sanda apa va puyukila.

³⁴ Utanya elende lia Yehova lia va tulamẽla posi va tundila vocilombo.

³⁵ Kuenda vali posi ocikasia ca tundila, Mose wa popia hati, A Yehova, votoka! Ovanyali vove va sanduke. Ava va ku suvuka va ku tile.

³⁶ Leci ocikasia ca talama, wa popia hati, A Yehova, tiuka kolohuluwa violohulũkãi via va Isareli.