ATENDELO 1 - Embimbiliya - Bíblia Sagrada em Umbundu

¹ Keteke liatete, kosãi yavali, kulima wavali tunde kokutunda ke Egito oco Yehova wa popia la Mose vekalasoko lia Sinai, vombalaka yoku ñualehela laye, hati,

² Tendi ocikoti cosi ca Isareli, ci tendi epata epata, imo imo, onjo onjo. Alume vaco vu va tenda omunu omunu londuko yaye.

³ Ove la Arone vu tenda muẽle va Isareli vosi va tẽla oku enda kovita, okuti alume vosi tunde kuava va kuete alima akui avali.

⁴ Kuenje kepata epata ku noliwa osekulu yimue yi kuete ale epata liaye muẽle, oku u kuatisi.

⁵ Olonduko vialume vo kuatisi vievi: ko Ruvene, Elicuru, omõla a Sedeyuru.

⁶ Ko Simeone, Sielumiele, omõla a Curisiadai.

⁷ Ko Yuda, Nahisione, omõla a Aminadava.

⁸ Ko Isakare, Netanele, omõla a Cuare.

⁹ Ko Sevulono, Eliyava, omõla a Helone.

¹⁰ Komãla va Yosefe, ke Efarimi, Elisiama, omõla a Amihudu. Ko Manase, Gamaliyele, omõla a Pedacuru.

¹¹ Ko Benjamini, Avidana, omõla a Gideoni.

¹² Ko Dani, Ahiesere, omõla a Amisiadai.

¹³ Ka Asiere, Pagiyele, omõla a Okirana.

¹⁴ Ko Gadi, Eliyasafe, omõla a Dewele.

¹⁵ Ko Nafitali, Ahira, omõla a Enane.

¹⁶ Ava ovo va nõlĩwa kocikoti ca va Isareli, haivo olosekulu viapata avo muẽle, haivo akulu pokati kocikoti ca Isareli.

¹⁷ Mose la Arone va pañinya alume va tukuiwa olonduko,

¹⁸ kuenje keteke liatete kosãi yavali oco vongolola va Isareli vosi. Va lisonehisa epata epata, imo imo. Tunde kuava va kuete akuĩ avali kalima kua supa va lisonehisa omunu omunu londuko yaye.

¹⁹ Ndeci Yehova a sapuila Mose, haico a va tendela vekalasoko lia Sinai.

²⁰ Va Ruvene, nuñulu ya Isareli, vovaimo avo, epata epata, ndocikoti ca sekulu yavo, alume vosi va kuete akuĩ avali kalima kuenda kua supa, okuti vava va tẽla oku enda kovita, haivo va tendiwa lolonduko omunu omunu,

²¹ poku tendiwa va tẽla akuĩ akuãla kolohũlũkãi kolohũlũkãi epandu lovita vitãlo viomanu. Ovo va Ruvene.

²² Va Simeone, vovaimo avo, epata epata, ndocikoti ca sekulu yavo, alume vosi va kuete akuĩ avali kalima kuenda kua supa, okuti vava va tẽla oku enda kovita, haivo va tendiwa lolonduko omunu omunu,

²³ poku tendiwa va tẽla akuĩ atãlo kolohũlũkãi kolohũlũkãi ecea lovita vitatu viomanu. Ovo va Simeone.

²⁴ Va Gadi, vovaimo avo, epata epata, ndocikoti ca sekulu yavo, alume vosi va kuete akuĩ avali kalima kuenda kua supa, okuti vava va tẽla oku enda kovita, haivo va tendiwa lolonduko omunu omunu,

²⁵ poku tendiwa va tẽla akuĩ akuãla kolohũlũkãi vitãlo lovita epandu lakuĩ atãlo komanu. Ovo va Gadi.

²⁶ Va Yuda, vovaimo avo, epata epata, ndocikoti ca sekulu yavo, alume vosi va kuete akuĩ avali kalima kuenda kua supa, okuti vava va tẽla oku enda kovita, haivo va tendiwa lolonduko omunu omunu,

²⁷ poku tendiwa, va tẽla akuĩ epanduvali kolohũlũkãi kolohũlũkãi vikuãla lovita epandu viomanu. Ovo va Yuda.

²⁸ Va Isakare, vovaimo avo, epata epata, ndocikoti ca sekulu yavo, alume vosi va kuete akuĩ avali kalima kuenda kua supa, okuti vava va tẽla oku enda kovita, haivo va tendiwa lolonduko omunu omunu,

²⁹ poku tendiwa, va tẽla akuĩ atãlo kolohũlũkãi kolohũlũkãi vikuãla lovita vikuãla viomanu. Ovo va Isakare.

³⁰ Va Sevulono, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu,

³¹ poku tendiwa, va tẽla akuĩ atãlo kolohũlũkãi kolohũlũkãi epanduvali lovita vikuãla viomanu. Ovo va Sevulono.

³² Va Yosefe okuti va Efarimi, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu,

³³ poku tendiwa, va tẽla akuĩ akuãla kolohũlũkãi lovita vitãlo viomanu. Ovo va Efarimi.

³⁴ Va Manase, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita haivo va tendiwa lolonduko omunu omunu;

³⁵ poku tendiwa va tẽla akuĩ atatu kolohũlũkãi kolohũlũkãi vivali lovita vivali viomanu. Ovo va Manase.

³⁶ Va Benjamini, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu,

³⁷ poku tendiwa va tẽla akuĩ atatu kolohũlũkãi kolohũlũkãi vitãlo lovita vikuãla viomanu. Ovo va Benjamini.

³⁸ Va Dani, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu,

³⁹ poku tendiwa va tẽla akuĩ epandu kolohũlũkãi kolohũlũkãi vivali lovita epanduvali viomanu. Ovo va Dani.

⁴⁰ Va Asiere, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu;

⁴¹ poku tendiwa va tẽla akuĩ akuãla kolohũlũkãi kohũlũkãi yimosi lovita vitãlo viomanu. Ovo va Asiere.

⁴² Va Nafitali, vovaimo avo, epata epata, ndocikoti colosekulu viavo, vakuanyamo akuĩ avali kuenda kua supa, vosi va tẽla oku enda kovita, haivo va tendiwa lolonduko omunu omunu;

⁴³ poku tendiwa va tẽla akuĩ atãlo kolohũlũkãi kolohũlũkãi vitatu lovita vikuãla viomanu. Ovo va Nafitali.

⁴⁴ Ava ovo va tendiwa. Mose la Arone va va tenda, kuenje va kuatisiwa lakulu vana ekuĩ la vavali va nõlĩwa pokati ka va Isareli, haivo olosekulu vi kuete ale apata avio muẽle.

⁴⁵ Oco ocikoti cosi ca Isareli ca tendiwa, ca tendiwa epata epata. Alume vosi va Isareli va kuete akuĩ avali kalima kuenda kua supa okuti va tẽla oku enda kovita,

⁴⁶ vosi yavo va tẽla ovita epandu kolohũlũkãi kolohũlũkãi vitatu lovita vitãlo lakuĩ atãlo komanu.

⁴⁷ Epata lia Lewi puãi ka lia tendiwile pokati kavo.

⁴⁸ Momo Yehova wa popia la Mose hati,

⁴⁹ Va Lewi ovo lika ku tendi, ku va sonehisa pokati ka va Isareli,

⁵⁰ puãi weca ku va Lewi ocikele coku tata ombalaka yovisila lovikuata viaco viosi kuenda ovina viosi vi tiama kokuayo. Va ambayata ombalaka lovikuata viayo viosi, haivo va lingainga upange wayo, locilombo cavo ci ñuala ombalaka.

⁵¹ Eci ombalaka yovisila yi sondoluiwa va Lewi va yi tamulula. Nda umue wiñi ama ocipepi ipaiwa.

⁵² Va Isareli va tamulula olombalaka viavo ocisoko ocisoko. Omunu omunu o kala kocilombo cavo kepandela liavo.

⁵³ Ocilombo ca va Lewi puãi ci ñuala ombalaka yovisila okuti ku va Isareli ka kuiya onyeño. Va Lewi va kala locikele coku tata ombalaka yovisila.

⁵⁴ Cosi eci va Isareli va ci linga, okuti ndeci Yehova a sapuila Mose haico va linga.