ASIÕSUILO 5 - Embimbiliya - Bíblia Sagrada em Umbundu

¹ Ivaluka, a Yehova, eci tua pita laco. Tala hu vanji epembe lia tu sanga.

² Ocipiñalo cetu ca eciwa kakombe; olonjo vietu via tambuiwa la vakualofeka viñi.

³ Tua linga olosiwe, voTate va fa; voMai va linga ovimbumba.

⁴ Ovava tu nyuanyua tu a feta. Olohui tu kuata kuata te oku landa.

⁵ Omi yeyi posingo, tua sipatiwa. Tua kava; ka va tava okuti tu puyuka.

⁶ Tua litumbika ku ve Egito la va Asuria, ha tu mõli ombolo yu tu tẽla naito.

⁷ VoTate va lingile akandu, yu kaveko vali, letu tua lundikiwa lakandu avo.

⁸ Apika va tu viala, kuenje u o tu yovola povaka avo ka ku li.

⁹ Tu kuata kuata ombolo yetu lohele yokufa, mekonda liosipata yovekalasoko.

¹⁰ Ekova lietu lia sanya ndofolono, omo onjala ya lua enene.

¹¹ Vo Siono akãi va pekelaisua, haico afeko vovaimbo a Yuda.

¹² Obmbuale via nyoñamaisua lovoko avo; akulu ka va sanga sanga esumbilo.

¹³ Akuenje vanene va pangaisua oku sula; akuenje vatito va yengenga omo va tuikiwa ovitele vi lema violohui.

¹⁴ Akongo ka va tumãla vali kolombundi. Akuenje va liweka oku sika loku imba ovisungo.

¹⁵ Esanju liovitima vietu lia imũha. Okupiluka kuetu kua pongoloka oku lila.

¹⁶ Ekolowa lia kupuka kutue wetu. Ngongo yetu we! momo tua linga cĩvi,

¹⁷ oco tua velela kutima; oco muẽle ovaso etu a vuvalela.

¹⁸ Momo omunda Siono ya linga elunda; olombulu vi lehõlako.

¹⁹ Puãi, a Yehova, ove o viala ño hũ; ocalo cove ci tumãla toke kovitumbulukila viosi.

²⁰ Nye o tu ivalela ño-o? Nye o tu yandulukila osimbu ya lua?

²¹ Tu tiule, a Yehova, ha tuiya kokuove, oco tu tumbuluke. Tu muise vali ongusu ndoloneke vionahũlu.

²² Ale wa tu inasi ño? pamue onyeño o tu kuetele ya pitahãla?