ASIÕSUILO 4 - Embimbiliya - Bíblia Sagrada em Umbundu

¹ Avoyo we! Ulu wa wunda! Ulu wa yenguluiwa wa pongoloka! Ovawe a kola a sandokaila panyãha osi.

² Akuenje va posoka va Siono, vana va sokele ndulu wa yenguluiwa,— Avoyo we! cilo va tendiwa ndolombia viotuma, ndupange wovaka olonungi violombia.

³ Ndaño olombinji vi ecaeca ovivele viavio, ha vi nyamaisa otumãla tuavio; puãi omanu vange va linga olongangala, ndolombo viovekalasoko.

⁴ Elimi lioñaña li lamẽlẽla vomẽla mekonda lienyõna. Omãla va pinga pinga okulia kuenje lomue o va iha.

⁵ Vana va lia lia vi pepa va nyõlẽhẽla volokololo. Vana va wala wala olonanga viohũsu cilo va langi kayala.

⁶ Eyambulo liomanu vange lia piãla, eli lia Sitomo li sule, imbo lina lia kupuiwa ocipikipiki, halovaka omanuko.

⁷ Olombuale viavo via yelele ndocikokoto, asenjele a sule. Atimba avo a kusukile ca lua, olokarbunkulu vi sule; eposo liatimba avo nda safira.

⁸ Cilo ovipala viavo vi tekãva, owule u sule; ka va limbokaiwa vali volokololo. Ekova liavo li nyeñenya; lia kukuta nduti.

⁹ Ava va ipaiwa losipata hise; ava va fa lonjala cĩvi vali, momo ovo vamamako oku kopa; va vetiwa lekambo liokulia.

¹⁰ Ovaka akãi vakuacikembe va teleka omãla vavo muẽle; va linga ulio wavo kotembo yenyõlẽho liomanu vange.

¹¹ Yehova ka kandangiyile onyeño yaye, wa sukumũla onyeño yaye yi tokota. Wa timĩhila vo Siono ondalu kuenje ya lia oviseveto viayo.

¹² Olosoma viokilu lieve ka via ci kolelele, ndaño olonungi viovoluali, okuti onjaki pamue unyãli o tẽla oku iñilila volombundi via Yerusalãi.

¹³ Puãi ca lingiwila okulueya kuovaprofeto vavo kuenda akandu ovitunda viavo, omo va pesila vokati kimbo osonde yava va lipua.

¹⁴ Va ñuala ñuala volokololo ndolomeke. Va liña enene losonde okuti lomue o tẽla oku lamba olonanga viavo.

¹⁵ Omanu va kaluka vati, Tundi! Wa liñi! Kuendi! Kuendi! Ko ka tu lambi! Omanu vakualofeka viosi vati, Ka va tungi vali letu.

¹⁶ Yehova eye muẽle wa va sandula, ka va vanji vali. Ovitunda ka via sangele esumbilo. Akulu ka va sangele ocame.

¹⁷ Tua vanja vanja ava va tẽla oku tu kuatisa toke ovaso ka a lete vali. Tua vanja vanja, puãi tua imbilile ovaso ofeka ka yi tẽla oku tu popela.

¹⁸ Omanu va tu kuai ño-o, okuti ka tu tẽla oku pita vali volokololo. Efulilo lietu li li ocipepi; oloneke vietu via tendiwa.

¹⁹ Ava va tu lupuisa va lupuka ca lua, olongonga vi sule. Va tu sengela kolomunda; va tu lavekela vekalasoko.

²⁰ Efuimo liovanyulu etu, okuti Ombuavekua ya Yehova, ya kuatiwila vakueve avo. Eye una tua tukuaile tuti, Vemehi liundembo waye tu kala ciwa pokati kolofeka.

²¹ Yolela ño, loku sanjuka, ofeko we Edome, wunungi yofeka ya Usi. Haimo lumue, okopo yi pitilavo kokuove, love o kolua loku sulũla uwalo, hu kala epõlõla.

²² Eyambulo liũvi wove lia telisua, a Mõla a Siono. Eye ka ku kalisa vali kumandekua. Puãi ove, a Mõla Edome, ũvi wove u yambuiwa laye, kuenje o situlula akandu ove.