ASIÕSUILO 3 - Embimbiliya - Bíblia Sagrada em Umbundu

¹ Ame ndimunu wa tala ohali lombueti yonyeño yaye.

² Eye wa ngambata yu wa ngendisila vowelema, vocinyi hamoko.

³ Ocili, wa ñualẽlapo. Eka liaye lia njanduluka ño-o eteke liosi.

⁴ Wa ñopisa ca lua; ekova li nyeñenya; wa neya akepa

⁵ Wa ñuala ocingonja; wa ñokela ocinguva lohali.

⁶ Wa nungisa vowelema, ndava va fa osimbu.

⁷ Wa nungisila ocimbaka okuti si tẽla oku tundamo; wa ñapa alienge a lema.

⁸ Ndaño mbilikiya, u o ñuatisa o sitikila ovatui.

⁹ Wa vindikiya onjila yange lovawe a songiwa; wa pengisa alila ange.

¹⁰ Wa ndingila ndongue yi lavekela ocinyama; pamue ndohosi ya salama.

¹¹ Wa njupa vonjila yu wa neya neya; wa mesela ca lua.

¹² Wa nalela ohonji yaye; wa suñamisila usongo waye;

¹³ Wa toma utima wange lovisongo viovohombe yaye.

¹⁴ Nda linga ocipapalelo comanu vosi; nda va lingila ocisungo eteke liosi.

¹⁵ Wa njukisa ocinguva; wa ñutisa evi vi lula.

¹⁶ Wa ñeleketisa ovayo, huti ño oku lia eseke; wa sonamisa vetiko.

¹⁷ Utima wa tokotelua; okukala ciwa kua ndimba.

¹⁸ Mopia siti, Ulamba wange wa imũha. Si lavoka vali cimue ku Yehova.

¹⁹ Ivaluka ocinguva cange lohali yange. Sokolola esumuo liange, lutima wange ndomo wa ndula.

²⁰ Utima wange u pitolola ño-o; wa petama vokati kange.

²¹ Haimo lumue ku li eci ndi ci ivaluka, kuenje ci ñokela elavoko, ceci:

²² Ocisola ca Yehova ka ci kava kava, haico ka ci pui. Ohenda yaye ka yi kuete efulilo.

²³ Olomele viosi yeyi, ndeci ekumbi. Ocili cove ca lua!

²⁴ Utima wange u popia, hati, Yehova onepa yange, eye njimba ondunge.

²⁵ Yehova o linga ohenda ava vo talamẽla lava vo sandiliya.

²⁶ Ciwa oku talamẽla eyovo lia Yehova, loku tula utima.

²⁷ Ciwa omunu oku likolisila lomi eci handi umalẽhe.

²⁸ Eci vo yi kapa a ka tumãle lika liaye loku ũha.

²⁹ A lituvike posi; lopo mbi ku li elavoko.

³⁰ A ece etama liaye ku u veta. Vo lavise ño.

³¹ Momo Yehova ka yanduluka ño hũ,

³² puãi ndaño o sumuisa omunu, noke u kuatela ohenda, momo ocisola caye ka ci pongoloka.

³³ Momo Yehova ka pangi oku talisa omunu ohali, pamue oku u suvalisa.

³⁴ Oku liatela olohute,

³⁵ pamue oku pengisa ondaka yomunu kovaso a Tõlo,

³⁶ pamue oku vilulula ondaka yaye lomunu, Yehova ka ci soli.

³⁷ Helie o popia cimue kuenje ci lingiwa nda Yehova ka ci pangele?

³⁸ Havomẽla wa Tõloko hẽ mu tunda ciwa la cĩvi?

³⁹ Omunu wokilu lieve o lisiõsiuĩla ndati eyambulo liakandu aye? Hamunuko hẽ?

⁴⁰ Tu konomuisi olonjila vietu loku vi seteka, ha tu tiuka ku Yehova.

⁴¹ Tu tulukili ku Yehova ukuailu ovitima vietu lovaka etu.

⁴² Tua lueya loku ku ñualelapo, kuenje kua tu ecelele.

⁴³ Wa livindikiya lonyeño yu wa tu lupuisa; wa ipala ño, ohenda lakamue.

⁴⁴ Wa lisikilila lelende okuti layimue ohutililo yi pita.

⁴⁵ Wa tu sokisa ndonasi pokati kolofeka, leci ci imbiwa keyala.

⁴⁶ Ovanyãli vetu vosi va tu imbula.

⁴⁷ Ocinjoko ca tu sanga; wa tu felela okueve. Epese lia kãla kuenda enyõlẽho!

⁴⁸ Vovaso ange mu tunda asuẽlẽla ndolondui viovava, omo omanu vange va nyõlẽha.

⁴⁹ Ovaso ange a loka loka asuẽlẽla, lepuyuko lakamue,

⁵⁰ toke Yehova o vanjela kilu ha ci mõli.

⁵¹ Ovaso ange a ñokela esumuo eci ndete eci ca pita lafeko vakuimbo lietu.

⁵² Ava va linga ovanyãli vange lesanda va njeva ndonjila.

⁵³ Va njimba vocitunu lomuẽnyo; va sitikilamo lovawe.

⁵⁴ Nda iñila kosi yovava, siti, Nda nyõlẽha.

⁵⁵ Kosi yocitunu nda vilikiyila onduko yove, a Yehova.

⁵⁶ Wa njeva eci nda ku vilikiya, siti, Ku ka sitikile ovatui ove evilikiyo liange.

⁵⁷ Eci nda ku vilikiya weya ocipepi. Wa popia huti, Ku ka yokoke.

⁵⁸ A Yehova, vekanga ove wa ñamẽla, wa yovola omuẽnyo wange.

⁵⁹ Wa mõla, a Yehova, ndomo va netuluila cĩvi. Netuluile ove muẽle.

⁶⁰ Wa limbuka ndomo va fetuluinya lomo va numbaila ahãla.

⁶¹ Wa yeva, a Yehova, okufuãngula kuavo, lomo va numbaika olongombo.

⁶² Ovimẽla lovisimĩlo violonjaki viange vi sakalaisa ño-o eteke liosi.

⁶³ Tala! Va tumãla, va votoka. Nda linga ocisungo cavo.

⁶⁴ A Yehova, ove o va fetuluinya ndupange wovaka ove.

⁶⁵ O va vuluisa. Esiñalo liove li va wila.

⁶⁶ O va lupuisa lonyeño hu va nyõli, okuti ka va kala vali kilu lieve.