ASIÕSUILO 2 - Embimbiliya - Bíblia Sagrada em Umbundu

¹ Avoyo we! Onyeño ya Yehova we! Wa tumalĩsa omõla a Siono ukãi vowelema. Ulamba wa Isareli wo kupuila posi. Keteke lionyeño yaye ka ivalukile ociliatelo caye.

² Yehova wa nyõla olonjo viosi via Yakoba, ohenda lakamue! Omo wa tema ca lua wa nyõla pe olombonge viomõla a Siono ukãi. Wa kupuila posi lesepu lia lua usoma kuenda olombiali viawo.

³ Wa topola lonyeño ya lua asualali vosi va Isareli. Kovaso ovanyãli vavo wa tiula eka liaye liondio. Wa lingila va Yakoba ondalu yelisi, ya lia cosi ca kalako.

⁴ Wa nala ohonji yaye ndunyãli; woluila eka liaye liondio oku nyõla. Vombalaka yomõla a Siono ukãi wa ipaila vana tua va sanjukilile. Wa va kuatela onyeño ndondalu.

⁵ Yehova wa linga ndunyãli, wa nyõla Isareli! Olopalasiu viavo viosi wa vi nyõla, wolumũla olombonge viosi. Wa luisila omõla a Siono ukãi okusumua lokulisiõsiõla.

⁶ Wa papulula onjo yaye ndocipundo covepia. Wa nyõla ocitumãlo colofesta viaye. Yehova wa imũla vo Siono ofesta lesambata. Omo wa tema ca lua wa pañula lepembe osoma locitunda.

⁷ Yehova wa nyehũla utala waye. Wa sepula ocitumãlo caye ci kola. Wa eca povaka ovanyãli vavo ovimbaka via ñuala olopalasiu viavo. Vonjo ya Yehova mua yevala onjuvungo ndeteke liofesta.

⁸ Yehova wa panga oku nyõla ocimbaka comõla a Siono ukãi. Wa ci seteka lukolo. Ka tiuwile eka liaye kokunyõla kuaco. Ombindikiyo locimbaka wa vi ulumuila pamosi.

⁹ Olombundi viaco via nyolẽha. Wa teya olomimbiliko viaco loku vi nyõla. Soma yavo lomãla vaye va sandokaila kolofeka viñi viñi. Ocihandeleko ca imũha. Ovaprofeto ka va mõli vali ovinjoinjoi via Yehova.

¹⁰ Akulu vomõla a Siono ukãi va tumãla posi loku ũha. Va litaila oneketela kovitue viavo loku wala ovikẽlei. Afeko va Yerusalãi va petamisila ovitue viavo posi.

¹¹ Ovaso ange a yengeta lasuẽlẽla. Utima wange wa tokotelua. Esumuo lia lua; utima wa sulila, momo omanu vange va nyõlẽha, kuenda omãla loloñaña vi ambukila volokololo vimbo.

¹² Eci va ambukila ndolongase volokololo vimbo, loku tulila ovimuẽnyo polonete violonjali viavo, oco va popia lolonjali viavo, loku lila, vati, Ombolo lovinyu hẽ vi kasi pi?

¹³ Mopia love ndati? Hu setahaisa la nye; a Mõla a Yerusalãi ukãi? Ocilãi ce hu nolẽla okuti hu lembeleka laco, a Mõla a Siono ukãi? Momo enyõlẽho liove lia lua ndokalunga. Helie o ku tumbulula vali?

¹⁴ Ovaprofeto vene vo muĩli ovinjoinjoi viuhembi, haivio viesanda. Ka vo lomboluilili okupenga kuene, hã ho sumulũhi vali. Vo lomboluili puãi ovitumasuku viuhembi viu pengisi.

¹⁵ Vosi va vinjukako vo fuãnguili loku pandula; Va sika ovilua loku kumohãila omõla a Yerusalãi ukãi, vati, Lilo olio nga imbo lia tukuiwa okuti eposo lialio lia pua atondelo, hailio esanju lioluali luosi?!

¹⁶ Ovanyãli vene vosi vo fuanguĩli; va sika ovilua; vo litakĩlĩli ovayo; va vilikiya vati, Tua li nyõla. Ewa! Lilo olio eteke tua livelele; cilo lieya; tu li lete!

¹⁷ Yehova wa linga eci a panga. Eci a lipañelele cilo wa ci linga muẽle. Wa nyõla pe, ohenda lakamue, ndeci a tukuile osimbu. Wa tava okuti ovanyãli va yolela ohali yene. Wa yukinya unene wava vo suvuki.

¹⁸ Vilikiya Yehova, a Mõla a Siono ukãi Asuẽlẽla ove a pite ndetande utanya luteke. Ku ka liweke. Ovaso ove ka a ka puyuke.

¹⁹ Pokati kuteke pasuka, loku liyula eci olondavululi vi lilendela. Esumuo liutima wove li pite kovaso a Yehova ndetande. Tulukila ovaka ove kovaso aye loku lombela omãla vove va kasi loku ambukala panyaha lonjala.

²⁰ Tala, a Yehova! Sokolola u wo lingila ndomo! Anga, akãi va lia apako avo muẽle, okuti otumãla tuavo tuopeka? O tava he okuti ovitunda lovaprofeto va ipaiwila vocitumãlo ci kola ca Yehova?

²¹ Amãlẽhe lakongo va langi posi. Afeko vange lakuenje vange va kupuiwa losipata. Ove wa va pondisa veteke lionyeño yove. Wa va ipaisa ño, ohenda lakamue.

²² Wa konga kolonele viosi evi nda yokokela, huti ño ndoku laleka ofesta! Keteke lionyeño ya Yehova ka kua kaile u o puluka, ha supipo. Vana nda va angatele vovoko loku va tekula ovanyãli va va nyõla.