ASIÕSUILO 1 - Embimbiliya - Bíblia Sagrada em Umbundu

¹ Tali imbo lie yukile omanu, ndomo lia siala upolokoso. Imbo lia kemãlẽle pokati kolofeka lia linga ndocimbumba! Imbo lia kaile nda nasoma pokati kovaimbo akuavo lia linga ukuakulambula!

² Kuteke li lila lila locinguva ca lua; kocipala ku lokaila asuẽlẽla. Pokati kava vo sola ondembeleki ka pa li. Akamba vaye vo ñualelapo; vo lingila ovanyãli.

³ Yuda wa tualiwa kofeka yamãle, ha sipatiwa kuenda oku vumbisua. Wa tunga pokati kolofeka. Utima puãi ka wa sangele omangu. Ava vo lupuisile vo kuata pokati kokusipatiwa kuaye.

⁴ Alila oko Siono a nyumãla, momo ka ku li ava va endaenda kolofesta. Kolombundi vialio ka ku li omanu. Ovitunda vialio vi tula tula ovimuenyo. Afeko valio va sumua. Imbo lie yuka ocinguva.

⁵ Ovanyãli valio vo tulamẽla, vakuaku li suvuka va sumulũha. Momo Yehova wa li talisila ohali okuhuka kualio kua lua. Ovanyãli valio va tuala omãla valio kumandekua.

⁶ Omõla a Siono ukãi wa pumba; ulamba waye wosi wo tunda. Olosoma viaye via linga ndolosonge ka via sangele ovililo. Via pua ongusu; vi tila ño ava va va lupuisa.

⁷ Keteke liolohali viayo lupongo wayo Yerusalãi wa ivaluka ovina viaye via posoka, vina a kala lavio tunde nunde. Eci omanu vaye va kuatiwa lovanyãli, kuenje oñuatisi ka kua kaile, oco ovanyãli vaye vo yola epembe; eci a kupuka vo fuãnguila.

⁸ Yerusalãi wa lueya cĩvi, oco wa vihĩla. Vosi vana vo sumbile vo sepula omo va mõla epõlõla liaye. Ocili, eye muẽle o leña leña, loku pukuka.

⁹ Eliño liaye lia vihĩsa olonanga viaye, puãi ka sokoluile enyõlẽho liya, oco okukupuka kuaye ku linga usumba, londembeleki ka kuete. A Yehova, tala ndomo nda mõla ongongo, momo unyãli wa yula!

¹⁰ Unyãli wolõla ovaka aye ha kuati ovina viaye viosi via posoka. Ocili, wa mõla vakualofeka va iñila vonjo yaye yi kola, vana ove wa handeleka okuti ka va ka iñile pokati komanu vove.

¹¹ Omanu vaye vosi va tula tula ovimuẽnyo poku sanda okulia. Va eca ovina viavo via velapo oku tĩla ha va sangi okulia, oco va tate omuẽnyo. Tala, a Yehova, vanja ndomo nda pembuiwa.

¹² Ko ci sokololi hẽ, ene vosi wu pitiko? Vanji, ho limbuka nda ku li vali esumuo ndeli liange lia mbuila, lina Yehova a muisa keteke lionyeño yaye ya kãla.

¹³ Wa ndowila ondalu yokilu, ya kuata kakepa ange. Wa nyanyumuila owanda kolomai viange; wa niuwiya konyima; wa sia ño, nda fa okamunyemunye. Ongusu ya mua eteke liosi.

¹⁴ Olohole viange via ñuta ndomi; eka liaye lia vi pandeka; via litañula ha vi ñueka posingo; wa njupa ongusu yange. Yehova wa ngeca povaka a vana okuti si tẽla oku tamalãla lavo.

¹⁵ Yehova wa pembula olonoi viange via kala lame; wa imba oluiya luoku ñatuila owiñi, oco amalehe vange va sasuiwe. Yehova wa kosa omõla a Yuda ukãi, ndoku kosela vocikamẽlo cayuva.

¹⁶ Ovina viaco ndi vi lilila; ovaso ange a sukumũla asuẽlẽla, momo ondembeleki yi kasi ocipãla lame, u o halĩsa keko. Omãla vange va linga olosiwe, momo unyãli wa yula.

¹⁷ Siono olõla ovaka aye, puãi ondembeleki ka ku li. Yehova wa tukuila ava va lisungue la Yakoba oku linga ovanyãli vaye. Va tenda Yerusalãi ndocina ci koka onyanya.

¹⁸ Eci Yehova a linga cesunga, momo nda hukila ovihandeleko viaye. Amanu vosi, yeveleli. Vanji ohali yange! Afeko vange lakuenje vange va tualiwa kumandekua.

¹⁹ Nda kovongele vakuacisola cange, puãi va ñemba. Ovitunda viange lakulu vange va nyõlehẽla vimbo osimbu va sanda okulia ha va tati omuẽnyo.

²⁰ Tala, a Yehova, momo nda yambuka; utima wange wa tokotelua, wa liketika vokati kange, omo nda huka ca lua. Vimbo osipata yi kesa kesa. Vonjo mu li okufa.

²¹ Njevelele ndomo ñenya ñenya, lu o ndembeleka ka ku li. Ovanyãli vange vosi va yeva ongongo yange yu va sanjuka omo ove wa ci linga. Eteke wa tukula liye, oco va kale ndame!

²² Ovilinga viavo vĩvi vi limbukiwe love. Linga lavo ndeci wa ndingila olohole viange. Nula nula ovimuẽnyo. Utima wange wa pua ongusu.