AMOSI 9 - Embimbiliya - Bíblia Sagrada em Umbundu

¹ Nda mõla Yehova yu, o tãi konẽle yutala. Kuenje wa popia hati, Veta otulukuki tuokilu toke otulukuki tuoposi tu luluma. Tu nyanyowaila kovitue viomanu vosi. Ava va supapo ndi va ponda losipata. Lomue umosi pokati kavo o tila. Lomue umosi pokati kavo o puluka.

² Ndaño va fẽla toke konjembo haiko eka liange li va kuatela. Ndaño va londa toke kilu haiko ndi va kolomõla.

³ Ndaño va lisalamisa konumbuko ya Karimeli haiko ndi va sandiliya loku vopako.

⁴ Ndaño va salama kosi yokalunga okuti si va lete haiko mañinya onyõha kuenje yi va lumana. Ndaño vambatiwa umandekua okuti ovanyãli vavo va ci lete, haiko somuĩla osipata kuenje yi va kundula. Ndi va tunguila ovaso ange oku va muisa eci cĩvi, eci ciwa hacoko.

⁵ Yehova Suku yolohoka, u o lamba ongongo kuenje yi sengeteta okuti vosi va tungamo va lila, yi tumõha ndolui Nilu, noke yi tepuluka ndolui Nilu ve Egito;

⁶ u o tunga olohondo viaye vovailu, haeye wa seveta ilu liaye posi,— u o kovonga ovava okalunga kuenje o a sukumuĩla kilu lieve,— onduko yaye Yehova.

⁷ Ene amãla va Isareli, ka wa sokeli kokuange hẽ nda va Etiopia? Oco ca popia Yehova. Siopile hẽ Isareli vofeka ye Egito, la va Filisiti ko Kafitori, la va Suria ko Kiri?

⁸ Ota! Ovaso a Ñala Yehova a kasi kuviali waco wevĩho. Ndu nyõla kilu lieve, puãi si nyõli pe epata lia Yakoba. Oco ca popia Yehova.

⁹ Momo tala! Mopia, kuenje sisa epata lia Isareli pokati kolofeka viosi, ndeci olomema vi sisiwa pombango. Haimo lumue lakamue okalumema ka kupukila posi.

¹⁰ Vakuakandu pokati komanu vange, ava va popia popia vati, Evĩho liaco ka li tu sangi ndaño oku tu wila,— vosi yavo va fa losipata.

¹¹ Eteke liaco numbulula vali onembele ya Daviti yina ya kupuka. Sitika apangu ayo. Numbulula vali ovingululu viayo. Ndi yi tunga ndokoloneke viosiãhũlu,

¹² okuti va kuata vali ava va supa ve Edome, lolofeka viosi vi tukuiwa londuko yange. Oco ca popia Yehova, u o ci linga.

¹³ Yehova wa popia hati, Ota! Kuiya oloneke okuti ukuakulima losialuwa o lisanga lukuakungula, lukuakukosa ayuva o lisanga lu o waya ombuto. Olomunda vi loka ovinyu vi sõsa. Oviwulu laviovo yi yuka lavio.

¹⁴ Numbulula vali uwa womanu vange va Isareli. Va tumbulula alunda loku tungamo. Va peka oviumbo viayuva loku nyua ovinyu viaco. Va kũlavo oviumbo loku lia epako liavio.

¹⁵ Ndi va peka muẽle vofeka yavo, kuenje ka va veyuiwa vali vofeka nda vaĩha. Oco ca popia Yehova Suku yove.