AMOSI 8 - Embimbiliya - Bíblia Sagrada em Umbundu

¹ Ocinjoinjoi Yehova Suku a muisa ceci, Nda mõla ohumba yapako ondombo.

² Eye wa mula hati, A Amosi, o lete nye? Nda linga siti, Ndete ohumba yapako ondombo. Oco Yehova a popia lame, hati, Efulilo lieya komanu vange va Isareli. Si va pitahãla vali.

³ Eteke liaco ovisungo vionembele vi pongoloka oku litetela. Ovivimbi vi lova. Vinasiwa ekukutu kolonẽle viosi. Oco ca popia Ñala Yehova.

⁴ Yeveleli ondaka eyi, ene vu yongola oku kosa olosuke loku takatisa olohũkũi viofeka,

⁵ hoti, Otembo yipi osãi yokaliye yi pita okuti tu landa olomema? Otembo yipi esambata li pita okuti tu talika otiliku ha tu tepulula konjongo yefa loku vokinya kosiekele, loku liaña lolombalãsa viuhembi,

⁶ ha tu landi ohukũi lopalata lolosuke lolohaku vivali, loku landisa onukutuiya yotiliku?

⁷ Yehova wa lisinga ocisingo lulamba wa Yakoba, hati, Sivalako vali ndaño cimosi covilinga viavo.

⁸ Ofeka hẽ, ka yi ci lulumĩla? Vosi va tungamo hẽ, ka va lili? Ka yi tumoha hẽ ndolui Nilu? Ka yi lisengi he loku tepuluka vali ndolui Nilu ve Egito?

⁹ Yehova Suku wa popia hati, Eteke liaco fisila ekumbi pongunji. Nena owelema pokati kutanya.

¹⁰ Mongoluisa olofesta viene ha vi lingi vioku lila, lovisungo viene ha vi lingi vioku litetela. Ndu walisi ovikẽlẽi. Nena avangu kovitue viene viosi. Ci linga ndoku lilila omõla ulume wongunga, kuenje efulilo liaco ndeteke liohali yalua.

¹¹ Yehova Suku wa popia hati, Kuiya oloneke eci muisa ofeka onjala, onjala yokulia hayoko, pamue enyona liovava halioko, te onjala yoku yeva olondaka via Yehova.

¹² Va tungayala tunde kokalunga toke kokalunga, tunde ko Norte toke kutundilo. Va ñuala ñuala ha va sangi ondaka ya Yehova puãi ka va yi sangi.

¹³ Eteke liaco afeko va posoka kuenda akuenje vambuka lenyona.

¹⁴ Ava va lisinga la Asima ya Samaria vati, Ndomo Suku yove a kasi lomuenyo, a Dani, kuenda vali vati, Ndomo onjila ya Bereseva yi kasi lomuenyo, ava va ci linga va kupuka, loku votoka vali lakamue.