AMOSI 7 - Embimbiliya - Bíblia Sagrada em Umbundu

¹ Ocinjoinjoi Yehova Suku a muisa ceci, Wa kala loku sovola olohuma. Ca kala kotembo yefetikilo liokutunda kua sulako kuovikũla. Okutunda kuaco kua sulako kuovikũla kua lomboloka okutunda kuna kuiya pana okuti Soma wa kelula ale.

² Eci via kala oku mala oku lia ovikũla viofeka oco nda linga siti, A Ñala Yehova, nda likutilila kokuove. Ecela. Yakoba o talama ndati? Siti, otito calua.

³ Oco Yehova wa litiulamo, hati, Ka ciya. Oco ca popia Yehova.

⁴ Ocinjoinjoi Yehova Suku a muisa ceci, Yehova Suku wa kala loku vilikiya ondalu ha yi yambula omanu. Ya takatisa alondo. Ya kalavo loku lia ongongo.

⁵ Oco nda linga siti, A Yehova Suku, nda likutilila kokuove. Liwekako. Yakoba hẽ, o talama ndati? Siti, otito calua.

⁶ Oco Yehova wa litiulamo, hati, Eci lacovo, ka ciya. Oco ca popia Yehova.

⁷ Ocinjoinjoi Yehova a muisa ceci, Yehova wa talama ocipepi locimbaka cimue. Peka liaye pa kala opulumu.

⁸ Yehova wa mũla, hati, A Amosi, o lete nye? Nda kumbulula siti, Ndete opulumu. Oco Yehova hati, Ndi kapa opulumu pokati komãla vange va Isareli. Si va pitãhãla vali.

⁹ Olonumbuko via Isareli vi kunduka, lovitumãlo vi kola via Isareli vi nyõlẽha. Mbotokela onjo ya Yerevoama losipata.

¹⁰ Oco Amasiya, ocitunda coko Betele, wa tuma ku Yerevoama, osoma ya Isareli, hati, Amosi wa ku endela usuanji pokati ka va Isareli. Ofeka ka yi tẽla oku tumãla ciwa lolondaka viaye viosi.

¹¹ Momo eci Amosi a popia ceci, hati, Yerevoama o fa losipata. Isareli o tunda kofeka yaye, o tualiwa kumandekua.

¹² Amasiya yu wa popia la Amosi, hati, Okuavitumasuku! Kuende, Tilila kofeka ya Yuda. Oko o ka litekuila, haiko o ka imbila owanji.

¹³ Puãi lalimue vali eteke o ka imbila owanji ko Betele. Momo olio ocitumãlo ci kola ca Soma, hailio onembele yusoma waye.

¹⁴ Oco Amosi wa kumbulula Amasiya hati, Siuprofetoko. Siukuacisokoko covaprofeto. Ame ndungombo, haime ndukuaku lombuila oviti viakuyu.

¹⁵ Yehova wa njupa koku tata olomeme. Yehova wa mañinya, hati, Kuende. Ka imbe owanji komanu vange va Isareli.

¹⁶ Oco, yevelela handi ondaka ya Yehova. Ove huti, Ku ka imbe owanji woku pisa va Isareli. Ku ka kunde ondaka yi pisa onjo ya Isake.

¹⁷ Oco Yehova wa popia hati, Ukãi wove o linga omopisi vimbo. Omãla vove valume lomãla vove vakãi va fa losipata. Usenge wove u tepiwa lukolo. Love muẽle o ka fila vofeka yimue ya vĩha. Isareli upiwa kofeka yavo, o tualiwa kupãla, kumandekua.