AMOSI 6 - Embimbiliya - Bíblia Sagrada em Umbundu

¹ Ava va kasi ño vo Siono, lohele lakamue, haivo va lipanda, vati, Tua koka omo tu kasi komunda ya Samaria, ngongo yavo! Va lisimĩla vati, Hetuko hẽ tua kemãla vofeka ya velapo? Epata lia Isareli hẽ ka liya kokuetu?

² Kuendi ko Kaline, ka li kũlĩhĩsi. Amiko ño oku pitila ko Hamati. Noke lokili ko Gati, imbo lia va Filisiti. Ovo nga va velapo, okuti ovoviali ene a sule? Ovaimbo aco nga a velapo okuti ovaimbo ene a sule,—

³ ene, vu likala oku tava okuti eteke liohali liya, kuenje vu likokela eteke liaco lungangala wene?

⁴ Ava va pekaila ño povola a posuisua lolombinga vionjamba, haivo vosayala ño loku tandavala, va lialia otumeme tuovocunda lolonale viovocimanga,

⁵ haivo va imbaimba ovisungo viesanda osimbu ohalupa yi sika, kuenje va lisovuila ovisikilo nda Daviti,

⁶ haivo va nyuila ovinyu polombasiya kuenje va liwaveka lulela wa velapo, puãi okunyõlẽha kua Yosefe ka va ku sumuĩla,— ngongo yavo!

⁷ Oco cilo, ovo tete va enda kumandekua. Lolofesta viava va tandavala ño-o vimũha.

⁸ Yehova Suku wa lisinga lokukola kuaye. Yehova Suku yovailu wa popia hati, Nda suvuka oku lituna kua Yakoba. Nyehũla olombonge viaye kuenje ngeca imbo liaye la cosi ci kasimo.

⁹ Nda vonjo yimosi mu kasi alume ekũi vosi va fa.

¹⁰ Eci umue a fa kuenje ngandiaye iñila oku upa etimba liaco oku li kenda, nda o pula umue o kasi vokati konjo, hati, Mua siala vali umue o kasi love? —u wa puliwa o kumbulula hati, Kotoko. O lungulavo hati, Uha! Ka tu ka tukule onduko ya Nala.

¹¹ Momo tala! Yehova o popia kuenje onjo yinene yi nyanyõha, lonjo yitito yi linga oneketela.

¹² Otuvalu hẽ, tu endela kovawe? Lokalunga hẽ, omunu o ka lima lolongmbe? Ene puãi wa pongoluisi esunga ha li lingi ondulu, lepako liesunga ha li lingi olunjuanjua,

¹³ haene vu sanjukila eci ka ci silivila, loku popia hoti, Ha longusu yetuko hẽ tua limuisa unene?

¹⁴ Yehova Suku yolohoka wa popia hati, Apata lia Isareli! Ndu katuili ofeka kuenje vo kangisi tunde koku iñila vo Hamati toke kolui Aramba.