AMOSI 5 - Embimbiliya - Bíblia Sagrada em Umbundu

¹ Apata lia Isareli, yeveleli ondaka ñasi loku vu lisiõsũila layo.

² Ufeko Isareli wa kupuka, ka katuka vali. Vofeka yaye muẽle vo yandulukila. Lu u votola kemo.

³ Ca popia Yehova Suku ceci, hati, Vimbo nda mua tunda ohulukãi mu sialela ocita kepata lia Isareli. Vimbo nda mua tunda ocita mu sialela ekũi kepata lia Isareli.

⁴ Ca popia Yehova lepata lia Isareli ceci, hati, Sandiliyi ame kuenje vu kala lomuenyo.

⁵ Puãi ko ka sandi Betele. Ko ka iñili vo Giligali. Ko ka endi ko Bereseva. Momo Giligali li enda kumandekua, kuenda Betele li puapo.

⁶ Sandiliyi Yehova kuenje vu kala lomuenyo, sanga iya, o yoka onjo ya Yosefe londalu, lu o yima vo Betele ka mu kala.

⁷ Ene vu pongoluisa esunga ha li lingi ondulu, kuenje wimbi posi esunguluko.

⁸ Sandiliyi u wa lulika Pleiades la Orion, una o pongoluisa owelema wuteke ho lingi ongula yomẽle, haeye o tekãvĩsa utanya ho lingi uteke, haeye o kovonga ombela yokilu, kuenje o yi lokisila kilu lieve,— onduko yaye Yehova.

⁹ Eye o nyõla ocipikipiki ava va pama cokuti okunyõlẽha kuaco ku veta ombonge.

¹⁰ Va suvuka u o pisila vombundi. Va nyehũla u o popia popia ocili.

¹¹ Oco, omo vu kosa ohukui kuenje vu u fetisa osevo yinene yotiliku, oco wa litungili olonjo viovawe a songiwa. Puãi ka vu kalamo. Wa kũli oviumbo viwa viayuva puãi ka vu nyui ovinyu viaco.

¹² Momo nda kũlĩha okulova kuolohole viene. Nda kũlĩhavo akandu ene okuti anene. Omo vu talisa ohali vakuesunga, vu tambula ovitukiko, lolosuke viya kokuene vu vi tiuwiya.

¹³ Oco, kotembo yaco, u wa lunguka ũha, omo otembo yaco yi kala lãvi.

¹⁴ Sandiliyi esunga, evĩho halioko, okuti vu kala lomuenyo. Kuenje Yehova Suku yovailu o kala lene ndeci wa popi.

¹⁵ Suvuki evĩho. Soli esunga. Kali lesunga kolombundi, sanga Yehova Suku yovailu o linga ohenda ocisupe ca Yosefe.

¹⁶ Oco, ca popia Yehova, Soma yovailu, eye Ñala, ceci, hati, Mu kala oku lila valila osi. Volokololo viosi va litetela, vati, Avoyo we! Avoyo we! Va kovonga olongunja okuti vi lila, la vakualonambi okuti va litetela.

¹⁷ Voviumbo viosi viayuva mu kala oku lila, momo ame mita pokati kene. Oco ca popia Yehova.

¹⁸ Ene vu livela eteke lia Yehova, ngongo yene! Nye vu yonguila eteke lia Yehova? Li kala liowelema, haliutanyako.

¹⁹ Li soka ndulume o tila ohosi kuenje ongue yi tokeka laye, pamue ndulume iya konjo yaye, o kuatelela kocimano leka, kuenje onyõha yu lumana.

²⁰ Eteke lia Yehova ka li kala hẽ liowelema, utanya hawoko? Ka li kala hẽ lowelema wa kãla okuti ocinyi ka mu kala?

²¹ Nda suvuka olofesta viene. Nda vi nyehũla muẽle. Si sanjukila olohongele viene vioku fendela.

²² Ndaño vu ndumbila ovilumba viene vioku yoka levi violomema, si vi tambula. Lovilumba viene viombembua eci vu lumba ovinyama via netisua, si vi sanjukila.

²³ Onjuela yovisungo viene yi kale kupãla lame. Si yevelela kokusika kuovisikilo viene.

²⁴ Puãi esunga li pite pite ndovava, lesunguluko ndolui ka lu takata.

²⁵ Apata lia Isareli, wa nenaile nga ovilumba lolombanjaile anyamo ana akũi akũala wa kali vekalasoko?

²⁶ Vu yelula Soma yene Sakuti, kuenda Kayuma, ociteka columbungululu lua linga Suku yene. Ovio oviteka wa vi litungili.

²⁷ Oco ndu tuali kumandekua oku pitahãla ko Damasko. Oco ca popia Yehova, onduko yaye Suku Ukualohoka.