AMOSI 4 - Embimbiliya - Bíblia Sagrada em Umbundu

¹ Yeveleli ondaka eyi, ene alomange violongombe via Basiane vu kasi vomunda ya Samaria, haene vu kangisa olohukũi loku keleketa olosuke, haene vu tuma vaveyene hoti, Neni. Tu nyui.

² Suku Yehova wa lisinga lokukola kuaye, hati, Tala! Oloneke viene vi kasi loku iya. Vo koki lovinunga ha vo tuali kupãla. Lava va supapo va kuatiwa lolonjolo.

³ Vu tundila papuluvi, wendi usokosoko. Vu takumuĩwa muẽle epõlõla. Oco ca popia Yehova.

⁴ Enjui ko Betele ha vu lueyelako, ko Giligali ha vu luisilapo olohole. Neni ovilumba viene omẽle komẽle. Lolonepa viene viekui vi neni neni loku pitakapo oloneke vivali.

⁵ Yoki eci ci kuete etumbisa ndocilumba colopandu. Imbi aluiya oku lipandiyila ocilumba. Ci sapuli kuosi, momo oco vu sole oku linga, ene amãla va Isareli. Oco ca popia Yehova.

⁶ Ame muẽle ndo wĩhi okuyela kuovayo vovaimbo ene osi, lokukamba ombolo vovitungilo viene viosi. Haimo ka wa tiukili kokuange. Oco ca popia Yehova.

⁷ Leci pa kambele olosãi vitatu oku ungula ame muẽle nda liwekisa ombela okuti ka yo lokeli. Kimbo eli nda lokisa ombela, kimbo likuavo sia lokisile ombela. Kepia eli ombela ya loka, kepia likuavo, oko ombela ka ya lokele, kua kukuta.

⁸ Oco ovaimbo avali pamue atatu a enda kimbo likuavo oku nyua ovava, kuenje ka a tẽlẽle. Haimo ka wa tiukili kokuange. Oco ca popia Yehova.

⁹ Ndo yambuli locikakulo lohume. Nda nyõla ovapia ene loviumbo viene viayuva. Nda nyõlãvo oviti viakuyu. Loviti violiveira via liwa lolohuma. Haimo ka wa tiukili kokuange. Oco ca popia Yehova.

¹⁰ Nda tuma pokati kene efengi lia soka leli lio ve Egito. Nda ponda akuenje vene losipata. Nda ambata otuvalu tuene. Kuenje elemba liovocilombo cene nda li yevalisa vanyũlu ene. Haimo ka wa tiukili kokuange. Oco ca popia Yehova.

¹¹ Nda kundula amue ovaimbo ene ndeci Suku a kundula Sodoma la Gomora. Kuenje ene wa soki locitonga ca popelua vondalu. Haimo ka wa tiukili kokuange. Oco ca popia Yehova.

¹² Oco, a Isareli, omo hu linga omo. Kuenje omo hu ci linga, oco, liangiliya oku lisanga la Suku yove, a Isareli.

¹³ Momo, ocili, u o tunga olomunda, loku sovola ofela, loku situlula komunu ovisimĩlo viaye,— u o sovola ongula lowelema, kuenje o pita kolonumbuko viongongo,— onduko yaye Yehova, Suku yovailu.