AMOSI 3 - Embimbiliya - Bíblia Sagrada em Umbundu

¹ Amanu va Isareli, yeveleli kondaka eyi Yehova a wasi layo, Ene, apata liosi ndo wupi vofeka ye Egito, ondaka yange kokuene yeyi,

² Ene lika ndo kũlĩhi kapata osi o kilu lieve, oco ndu yambuili olohole viene viosi.

³ Vavali hẽ, va endela pamosi nda ka va likapele utima umosi?

⁴ Ohosi he, yi kumba kumba vusenge nda ka ya kuatele cimue ocinyama? Eyove liohosi hẽ, li litetela veleva liayo nda ka li kuete cimue?

⁵ Okanjila hẽ, ka kupukila vonjanjo posi apa ka va tele? Upeto hẽ, u tifuka posi nda ka kua sengele cimue?

⁶ Ci tava hẽ, oku sikila olumbeta vimbo kuenje omanu ka va lisaluka? Ũvi hẽ, u wila vimbo nda ha Yehovako wa ci panga?

⁷ Ocili, Ñala Yehova ka lingi cimue te tete o situlula ocisimĩlo caye kovakuenje vaye ovaprofeto.

⁸ Ohosi ya kumba, helie ka yokoka? Suku Yehova wa popia, helie ka imbi owanji?

⁹ Sapuli kolombonge vioko Asuria, lokolombonge viofeka ye Egito, hoti, Liongoluili kilu liolomunda via Samaria. Vanji ovama a kasi vokati kayo, lakangiso a kasimo.

¹⁰ Yehova wa popia hati, Ava va yukisa olombonge viavo levi via pundiwa lungangala ka va kũlĩha oku linga esunga.

¹¹ Oco Ñala Yehova wa popia hati, Ku kala unyãli o ñuala ofeka ocingonja, haeye o nyõla ovimbaka viove, kuenje olombonge viove vi pundiwa.

¹² Ca popia Yehova ceci, hati, Ndeci ungombo a popela komẽla wohosi ovolu avali pamue okacinimbu ketũi, haico omãla va Isareli, ava va kasi vo Samaria, va popelua, okuti vambata okanẽle komangu pamue ongunji yula.

¹³ Ca popia Yehova, Suku Ukualohoka, ceci, hati, Yeveleli! Imbi owanji woku pisa epata lia Yakoba.

¹⁴ Momo eteke njambuila Isareli olohole viaye njambulavo ovotala a Betele. Olombinga viutala vi tetiwa, vi kupukila posi.

¹⁵ Lonjo yokuenye lonjo yondombo viosi ndi vi nyõlẽla pamuamue. Olonjo via posuisua lolombinga violonjamba vi nyõlẽha. Oco olonjo viulamba vi fulila. Oco ca popia Yehova.