AMOSI 2 - Embimbiliya - Bíblia Sagrada em Umbundu

¹ Ca popia Yehova ceci, hati, Mekonda liolohole vitatu via Moavi, ndaño vikuãla, oku tiula eyambulo lialio si kuatako. Momo va yoka akepa osoma ye Edome toke a linga ohela.

² Oco ndi tuma ondalu ku Moavi kuenje yi yoka olombonge via Keriote. Moavi yi fa pokati koku yuela. Yi fa muẽle pokati koku liyula lokusika kuolumbeta.

³ Nyõla osoma yavo. Eye muẽle lakulu vaye ndi va pondela pamosi. Oco ca popia Yehova.

⁴ Ca popia Yehova ceci, hati, Mekonda liolohole vitatu via Yuda, ndaño vikuãla, oku tiula eyambulo liavo si kuatako. Momo va nyehũla ocihandeleko ca Yehova, kuenje ka va tatele olombilo viaye Lovohembi avo a va lueyisa hao olosekulu viavo via endaile lao.

⁵ Oco ndi tuma ondalu vo Yuda kuenje yi yoka olombonge via Yerusalãi.

⁶ Ca popia Yehova ceci, hati, Mekonda liolohole vitatu via Isareli, ndaño vikuãla, oku tiula eyambulo liavo si kuatako. Momo va landisa olondingesunga lopalata, lolosuke lolohaku vivali.

⁷ Haivo va kosela voneketela yoposi ovitue violosuke, kuenje va pambuisa ambombe vonjila. Omõla ulume la isiaye va pekela lufeko umuamue kuenje onduko yange yi kola yi vĩhĩsua laco.

⁸ Kolonẽle viovotala osi va pekaila polonanga vioku yekela. Vonjo ya Suku va nyuanyua ovinyu viava va fetisua ovimbu.

⁹ Haimo lumue nda nyõla va Amori kovaso avo. Okulepa kua va Amori kua soka lokulepa kuolo-cedro. Lokupama kuavo kua soka loku kuolocarvalho. Nda nyõla epako liavo kilu, lolombombo viavo posi.

¹⁰ Kuenda vali ndo vupi vofeka ye Egito. Akũi akuãla kanyamo ndo songuili vekalasoko oku u muisi ofeka ya va Amori.

¹¹ Vamue pokati komãla vene valume nda va votola ha va lingi ovaprofeto. Vamue pokati kakuenje vene nda va nola ha va lingi va Nasiri. Ele hamoko, amãla va Isareli? Oco ca popia Yehova.

¹² Ene puãi wa nyuisi va Nasiri ovinyu. Lovaprofeto wa va handeleki, hoti, Ko ka sapuili vali ovina viya.

¹³ Tala! Ndu lamẽli vocitumãlo cene ndeci ekãlu lie yuka lovitungu li lamẽlĩwa.

¹⁴ Ukualupesi o ci tokoka oku tila. Ukuangusu o pua ongusu yaye. Lu wa pama ka popela omuenyo waye.

¹⁵ Ukuakuasa lohonji ka talama. Lukualomãi via nyanga ka lipopela. Ndaño u endela kokavalu ka popela omuenyo waye.

¹⁶ Lu wa velapo pokati kolonoi eteke liaco o tila epõlõla. Oco ca popia Yehova.