AMOSI 1 - Embimbiliya - Bíblia Sagrada em Umbundu

¹ Olondaka via Amosi, u wa kala pokati kovangombo va Tekoa, vina a muĩla Isareli koloneke via Usiya osoma ya Yuda, lokoloneke via Yerevoama omõla a Yowasi osoma ya Isareli. Wa vi mõla konyima yanyamo avali yokuiya kuondindimo.

² Wa popia hati, Yehova o kumba kumba vo Siono, o yevisa ocileñi condaka yaye vo Yerusalãi. Ovisenge viovangombo vi lisiõsiõla. Onumbuko ya Karameli yuvuka.

³ Ca popia Yehova ceci, hati, Mekonda liolohole vitatu via Damasko, ndaño vikuãla, oku tiula eyambulo lialio si kuatako. Omo va sãsõla Gikada lovipi viutale.

⁴ Oco ndi tuma ondalu konjo ya Hasahele, kuenje yi yoka olombonge via Benhadadi.

⁵ Ndi teya usiakãla wa Damasko. Njipãilẽla olonungi vekungu lia Avene. Njipãilãvo u o kuete epangati liuviali wa Betedeni. Omanu va Suria va tualiwa kumandekua ko Kiri. Oco ca popia Yehova.

⁶ Ca popia Yehova ceci, hati, Mekonda liolohole vitatu via Gasa, ndaño vikuãla, oku tiula eyambulo lialio si kuatako. Momo va tuala ofeka yosi kumandekua kuenje va va eca ku Edome.

⁷ Oco ndi tuma ondalu kocimbaka ca Gasa kuenje yi yoka olombonge vialio.

⁸ Ñundula olonungi via Asidode. Ñundulavo u o kuete epangati liuviali wa Asikelone. Mongoluila eka liange ke Ekerone. Lava va supa ku va Filisiti va nyõlẽha. Oco ca popia Ñala Yehova.

⁹ Ca popia Yehova ceci, hati, Mekonda liolohole vitatu via Turo, ndaño vikuãla, oku tiula eyambulo lialio si kuatako. Momo va eca ofeka yosi ke Edome. Ka va ivalukile vali ocisila cumanji.

¹⁰ Oco ndi tuma ondalu kocimbaka ca Turo kuenje yi yoka olombonge vialio.

¹¹ Ca popia Yehova ceci, hati, Mekonda liolohole vitatu via Edome, ndaño vikuãla, oku tiula eyambulo lialio si kuatako. Momo wa lupuisa manjaye losipata, kuenje wa imbapo ohenda yosi. Lonyeño yaye ya nyanyõha olonjanja viosi. Lokutema kuaye kua endaele ño-o hũ,

¹² Oco ndi tuma ondalu ko Temane kuenje yi yoka olombonge via Bosare.

¹³ Ca popia Yehova ceci, hati, Mekonda liolohole vitatu viomãla va Amone, ndaño vikuala, oku tiula eyambulo lialio si kuatako. Momo va tola olomisi via va Gileada ha va amisako ongave yavo muẽle.

¹⁴ Oco ndi siakãla ondalu vocimbaka ca Raba kuenje yi yoka olombonge vialio. Yi vi yoka loku liyula keteke liovita, lehunguhungu veteke liocipepe.

¹⁵ Kuenje osoma yavo yenda kumandekua, eye muẽle kumue lakulu vaye. Oco ca popia Yehova.