رومی ایشون 13 - کتاب مقدس به زبان مازندرانی - گویش شرقی

صاحب منصبونِ جِم اِطاعت هاکاردِن

¹ هرکس وِنه صاحب مَنصبونِ مطیع بوئه، چوون هیچ صاحب مَنصبی دَنییه که خِدائه جِم نَبوئه. صاحب مَنصبونی هم دَرِنه که خِدائه طَرِفِ جِم تَعیین بَینه.

² پَس هر کس که صاحب منصبونِ علیه بِلِند بَووه، اونچیِ علیه که خِدا تعیین هاکارده، بِلِند بَییه؛ و کِسایی که این طی کاندِنه، داوِری بونِنه.

³ چوون کِسایی که دِرِس رِفتار کاندِنه، حِکمرونونِ جِم ترسی نِدارنِنه، ولی خِلافکارون وِشونِ جِم تَرسِنِنه. خوانی صاحب منصبونِ جِم ترسی نِداری؟ پَس اونچی که دِرِسِ ره هاکان که تِ ره تَحسین کانده.

⁴ چوون وه تِ خیرِ وِسه خِدائه نوکِرِ. ولی اگه کارِ خلاف هاکانی، بَتِرس، چوون وه بیخودی شه کَمِر شمشیر نَوِسه. وه خِدائه نوکِرِ و کسیِ که خِدائه وِسه انتقام گِرنه و خِدائه غَضِبِ، خِلافکارِ سَر یارنه.

⁵ پَس آدِم وِنه نا فِقَط خِدائه غَضِبِ وِسه، بلکه وجدانِ وِسه هم مطیع بوئه.

⁶ همینِ وِسه ئه که شِما مالیات دِنِنی، چوون صاحب مَنصبون خِدائه نوکَرونِنه و این چیائه جِم مواظبت کاندِنه.

⁷ هر کسِ حَقِّ وه ره هادین: اگه مالیاتِ، مالیات هادین، اگه خَراجِ، خَراج هادین، اگه اِحترامِ، اِحترام بییِلین، و اگه حِرمَتِ، حِرمَت بییِلین.

شَریعتِ به جا بیاردِن، محبِّتِ طریق

⁸ هیچ دِینی هیچ کسِ گَردن نِدارین، اِلّا اینکه هَمش هَمدییه ره مِحَبَّت هاکانین. چوون هر کی یه نَفِرِ دییه ره مِحَبَّت هاکانه، شَریعتِ به‌جا یارنه.

⁹ چوون این اَحکام «زنا نَکِن»، «قَتل نَکِن»، «دِزّی نَکِن»، «طِمع نَکِن»، و هر حِکمِ دییه ای که بوئه، همه این کِلامِ دِله خِلاصه بونه که «شه هَمساده ره شه واری دوس دار.»

¹⁰ مِحَبَّت، شه هَمساده ره بَدی نَکانده؛ پَس مِحَبَّت شَریعتِ تِموم و کِمال به اِنجام رِسِندِنه.

¹¹ علاوه بر این شِما دوندِنی که چه زَمونه ای دِله دَرِنی. اِسا وه وَخت بَرِسیه که خوِ جِم بیدار بَووین، چوون اَلان در مقایسهِ اون مووقه ای که ایمون بیاردیمی، اَمه نِجات نزدیکتر بَییه.

¹² شو دَره تِموم بونه و روز نزیکِ. پَس بِئین تاریکیِ بَدِ کارا ره کِنار بییِلیم و نورِ زره ره دَپوشیم.

¹³ بِئین دِرِس رِفتار هاکانیم که کِسایی که روزِ روشِناییِ دِله دَرِنهِ لایق بوئه. نا عیاشی و مَستیِ دِله، نا زِنا و هوس بازیِ دِله و نا دَعوا مرافعه و حَسودیِ دِله.

¹⁴ پَس خِداوند عیسی مَسیحِ شخصیتِ یِتا لِواسِ واری دَپوشین، جِسمِ هِوا و هَوسِ وِسه تدارک نَوینین تا وه خواسه ها ره به جا بیارین.