اِنجیلِ مَتّی 28 - کتاب مقدس به زبان مازندرانی - گویش شرقیعیسیِ دِواره زنده بَییِن 1 بَعد از مِقدَّسِ شنبه، هفتهِ اَوِّلین روز، مَریِمِ مَجدلیه و اون یِتا مَریِم مَقبَرهِ بَدیئِنِ وِسه بُوردِنه. 2 یِهویی یِتا گَتِ زِمین لَرزِه دَکِته، خِدواندِ یِتا از فِرِشته ها آسِمونِ جِم جِر بییَمو، و مَقبَرهِ سَمت بورده و سَنگِ یِتا گوشه غَلت هِدا و وه سَر هِنیشته. 3 فِرِشتهِ دیم آسِمونِ بَرقِ واری سو زوئه و وه جِمه وَرفِ واری، اِسبه بییه. 4 نِگَهوونون وَختی وه ره بَدینه تَرسِ جِم بَلِرزِسِنه، و مِردِهِ واری بَینه. 5 اون وَخت فرشته زَن ها ره بااوته: «نَتِرسین! دومبه که عیسیِ مَصلوبِ دِمبال گِردِنِنی. 6 وه اینجه دَنیه، چوون که هَمون طی که بااوته بییه، زِنده بَییه! بِئین و اونجه ای که بَخواته بییه ره، بَوینین. 7 بعد دَرجا بُورین و وه شاگِردونِ بارین: وه بَعد از بَمِردِن، زِنده بَییه و شِمه جِم قبلتر جلیل شونه و وه ره اونجه ویندینی. یاد نَکِنین این پیغومِ وِشونِ هادین.» 8 زَن ها عَجلهِ هِمراه مَقبَرِهِ جِم بیرون بییَمونه، جوری که هم بَتَرسی بینه و هم خِشال بینه، شاگِردونِ سِراغ بوردِنه تا فِرِشتهِ پیغومِ وِشونِ هادِن. 9 یِهویی عیسی وِشونِ هِمراه چِش به چِش بَییه و بااوته: «سِلام بَر شِما!» زَن ها جلو بییَمونه و وه لینگِ دِماسینه و وه ره پَرَسِش هاکاردِنه. 10 اون وَخت عیسی وِشونِ بااوته: «نَتِرسین؛ بُورین و مِ بِرارونِ بارین که جلیل بورِن. اونجه مِ ره ویندِنه.» نِگَهوونونِ خَوِر 11 وَختی که زَن ها راهِ دِله دَینه، چَن تا اَز نِگَهوونون شَهرِ دِله بوردِنه، تِمومِ این اِتِّفاقا ره، گَت گَتِ کاهِنونِ وِسه بااوتِنه. 12 وِشون بَعد از اینکه مَشایِخِ هِمراه جَمع بَینه و مشورت هاکاردِنه، سَربازونِ خَله پول هِدانه. 13 بااوتِنه: «وِنه مَردِمِ بارین وه شاگِردون شَبونه بییَمونه و اون وَخت که اِما خو دِله دَیمی، وه جَسِدِ بَدِزینه.» 14 اَگه این خَوِر فَرموندارِ گوش بَرِسه، اِما شه وه ره راضی کامبی که شِمه وِسه مُشکِلی پیش نَییه. 15 پَس نِگَهوونون پولِ بَییتِنه و طِبق اونچی که وِشونِ بااوته بَییه بییه عَمِل هاکاردِنه. و این داستان تا اَمروز یَهودیونِ دِله شایع هَسه. عیسیِ گَتِ حِکم 16 بعد اون یازدَه شاگِرد جلیل، اون کوهی که عیسی بااوته بییه، بُوردِنه. 17 وَختی عیسی ره اونجه بَدینه، وه ره پَرَسِش هاکاردِنه. ولی بَعضیا شَک هاکاردِنه. 18 اون وَخت عیسی جلو بییَمو و وِشونِ بااوته: «تِمومِ قِوَّت آسِمونِ دِله و زِمین سَر مِ ره هِدا بَییه. 19 پَس بُورین و تِمومِ قومِ شاگِرد بَسازین و وِشونِ به اسمِ پییِر، و ریکا و روح القدس غسلِ تَعمید هادین 20 و وِشونِ تَعلیم هادین که اونچی شِما ره دَستور هِدامه ره به جا بیارِن. بَدونین مِن تا آخِرِ زِمون هَمِش شِمه هِمراه دَرمبه.» |
@2024 Korpu Company