نامِه مَسیحینی عبرانی نِژادی سِه 7 - کتاب مقدس به زبان مازندرانی - گویش شرقی

مِلْکیصِدِقِ کهانت

¹ چوون که این مِلْکیصِدِق، سالیمِ شَهرِ پادشاه و خِدائه مِتعالِ کاهِن بییه. وه اِبراهیم که پادِشاهونِ شکست هِدا بییه ره بَدیئه و وه ره بَرکَت هِدا.

² و اِبراهیم هر چی که داشتهِ جِم، وه ره ده‌ یک هِدا. وه اسم مَعنی، اَوِّل «صالحیِ پادشاه» و بعد «سالیمِ پادشاه»، یعنی «صِلح و سِلامتیِ پادشاه» هَسه.

³ این مِلْکیصِدِق پییِر مار نِدارنه و نا وه شجره نامه معلومِ و نا وه زندگیِ اَوِّلین روزا و نا آخِرین روزا معلومِ، ولی خِدائه ریکائه واری، وه تا اَبد کاهِن موندِنه.

⁴ هارِشین که وه چَنده گَتِ آدِمی بییه که اِبراهیم، اِسرائیلِ قومِ پییِر، غنایمِ جِم وه ره ده یک‌ هِدا!

⁵ و طبقِ موسیِ شَریعتِ حِکم، لاویِ وَچون که کاهِن بونِنه، وِنه یَهودِ قومِ جِم که وِشونِ بِرارونِنه ده ‌یک بَیرِن، هر چَن وِشون هم ابراهیمِ نَسلِ جِم هَسِنه.

⁶ ولی این مِلْکیصِدِق که وِشونِ نَسلِ جِم نییه، ابراهیمِ جِم ده‌ یک بَییته و ابراهیمِ که وعده‌هائه صاحِب بییه ره بَرکَت هِدا.

⁷ و بی شک، اونی که بَرکَت دِنه اونی که بَرکَت گِرنهِ جِم گَتتِرِ.

⁸ یَت ور، کِسایی که از بین شونِنه ده یک گِرنِنه؛ ولی یَت ور دییه، اونی که وه خَوِری شهادت هِدا بَییه که زنده ئه، ده یک گِرنه.

⁹ حَتّی تومبی باریم شه لاوی هم که دَه‌ یک گِته، ابراهیمِ طریق دَه‌ یک هِدا.

¹⁰ چوون اون مووقه که مِلْکیصِدِق ابراهیمِ بَدی بییه، لاوی هَمتی دِنیا نییَمو بییه

عیسی مِلْکیصِدِقِ هِمراه مقایسه بونه

¹¹ اِسا اگه کامل بَیِّن، لاویِ کاهنونِ رَدهِ طریق اِنجام بونِسه، دییه چه احتیاجی بییه یِتا دییه کاهِن مِلْکیصِدِق رَدهِ جِم بِیّه، عوض این که هارونِ رَده جِم بوئه؟ چوون لاویِ کهانتِ دورهِ دِله، شَریعَت، یَهودِ قومِ هِدا بَییه

¹² چوون اگه کهانتِ خِدمِت عَوِض بَووه، ناچاراً شَریعَتِ قانون هم عَوِض بونه.

¹³ چوون کِسی که این چیا وه خَوِری بااوته بَییه، یِتا دییه طایفه جِم هَسه که اون طایفهِ جِم هیچ وَخت هیچ کس قِروونگاهِ دِله خِدمِتِ نَکارده؛

¹⁴ چوون معلومِ اَمه خِداوند یهودائه نَسلِ جِم بییه و موسی اون طایفهِ جِم کهانتِ خَوِری هیچی نااوته.

¹⁵ این اونجه ویشتر دیار بونه، که وَختی یِتا دییه کاهِن مِلْکیصِدِقِ واری بِیّه،

¹⁶ وه نا شَریعتِ اون حِکمِ جِم، که وه نَسلِ ربط دارنه، بلکه اون زندگیِ قِوَّتِ جِم، که از بین نَشونه، کاهِن بونه.

¹⁷ چوون وه خَوِری مزمورِ کِتابِ دِله این طی شِهادت هِدا بَییه که: «تِ تا اَبد کاهِن هسی، مِلْکیصِدِقِ ردهِ دِله.»

¹⁸ چوون یَت وَر، اون اَوِّلین حِکم، اینِ وِسه که ضعیف و بی فایده بییه ره کِنار بییِشتِنه،

¹⁹ چوون شَریعَت هیچی ره کامل نَکارده. ولی از اون طَرف، یِتا بهترِ امیدِ اِما ره بِشناسِندیه که اونِ طریق، خِدا ره نزیک بومبی.

²⁰ و این بدون قَسِم نَیّه! چوون کِسایی که قبلتر کاهِن بَینه، بدون این که قَسِم بَخُرِن، کاهِن بَینه

²¹ ولی این یِتا کاهِن بَییه، قَسِمی هِمراه، که وه طریق وه ره بااوته: «خِداوند قَسِم بَخُرده و وه نَظِر عَوِض نَوونه: ”تِ تا اَبد کاهِن هسی“.»

²² این، عیسی ره یِتا بهتَرِ عَهدِ ضامِن کانده.

²³ قدیمی کاهنونِ تعداد یَته خَله بییه، چوون مَرگ نییِشته، شه خِدمتِ اِدامه هادِن.

²⁴ ولی عیسی تا اَبد کاهِنِ، چوون تا اَبد زنده ئه.

²⁵ پَس عیسی تونده اونایی که وه طریق خِدا ره نزدیک بونِنه ره کاملاً نِجات هاده، چوون وه هَمِش زنده ئه تا وِشونِ وِسه شِفاعت هاکانه.

²⁶ چوون راس راسی این به جا بییه که اِما این طی کاهِنِ اَعظِم داریم، که مِقدّس، بی گِناه، بی‌عیب، گناهکارونِ جِم سیوا، و جِلال بَییته، آسمونونِ جِم بالاترِ.

²⁷ وه دییه کاهنونِ اَعظِم واری، نیاز نِدارنه که هر روز، اَوِّل شه گِناهونِ وِسه و بعد قومِ گِناهونِ وِسه، قِروونی هاکانه. چوون اَت کَش همیشه وِسه اینِ اِنجام هِدا، اون مووقه که شه ره قِروونی هاکارده.

²⁸ چوون شَریعَت، آدِمونِ وِشونِ ضعفائه دِله، کاهِنِ اَعظِم بَیِّنِ وِسه تعیین کانده، ولی اون قَسِمِ کلمه ها که بَعدِ شَریعَت بییَمو، اون ریکا ره تعیین هاکارده، که تا اَبد کامل بَییه.