نامِه مَسیحینی عبرانی نِژادی سِه 11 - کتاب مقدس به زبان مازندرانی - گویش شرقیایمونِ هِمراه 1 اِسا ایمون، اون چیائه سَر اِطمینان هاکاردِنِ که اونا ره امید دارمی و اون چیائه جِم خاطِر جَمع بوئِنِ که چِشِ هِمراه نَوونه بَدیئِن. 2 چوون ایمونِ خاطِری بییه که قدیمی مَردِمِ خَوِری، خواریِ هِمراه تَعریف تمجید هاکاردِنه. 3 اِما ایمونِ هِمراه فَهمِمبی که جهان خِدائه کِلامِ هِمراه خَلق بَییه، جوری که اون چیا که بَدی بونه، اون چیا که بَدی نَوونهِ جِم به وجود بییَمو. 4 ایمونِ هِمراه بییه که هابیل، قِروونی ای پیشکش هاکارده که قائِنِ قروونیِ جِم ویشتر قبول بَییه که این وِسه وه خَوِری گِواهی هِدا. که وه صالحِ. خِدا وه هَدیه هائه قبول هاکاردِنِ هِمراه وه خَوِری شهادت هِدا. و هر چَن وه بَمِرده، ایمونِ خاطری هَمتی گَب زَنده. 5 ایمونِ هِمراه بییه که خَنوخ بالا بَوِرده بَییه تا مَرگِ نَوینه و وه پی دا نَییه، چوون خِدا وه ره بَوِرده. چوون قبل از اون که بالا بَوِرده بَووه، وه خَوِری گواهی هِدا بَییه که خِدا وه جِم راضیِ. 6 و بدون ایمون نَبونه خِدا ره راضی هاکاردِن، چوون هر کی خِدا ره نزیک بونه، وِنه ایمون داره که وه دَره و اونایی که وه دِمبال گِردِنِنه، پاداش گِرنِنه. 7 ایمونِ هِمراه بییه که نوح اون مووقه که اون چیائه خَوِری که هَمتی هیچ کَس نَدی بییه، خِدائه طَرِفِ جِم هِشدار بَییته، خِداترسیِ هِمراه، شه خانِوادهِ نِجاتِ وِسه یِتا کَشتی بِساته. و این طی دِنیا ره مَحکوم هاکارده و اون صالحیِ وارث بَییه که ایمونِ راهِ جِم به دَس اِنه. 8 ایمونِ هِمراه بییه که اِبراهیم اون مووقه که دَعوِت بَییه، اِطاعت هاکارده و راهی بَییه اون جایی بورده که بعد وه اِرث بونِسه؛ و بدون اینکه بَدونه کِجه شونه، راهی بَییه. 9 ایمونِ هِمراه بییه که وه بورده تا وعدهِ سرزمینِ دِله زندگی هاکانه، و یِتا غریبه واری اِسحاق و یَعقوبِ هِمراه که وه هِمراه این وعدهِ دِله هم اِرث بینه، خیمه هائه دِله زندگی هاکارده. 10 چوون اون شَهرِ چِش به راه بییه، که پِی ها دارنه که وه معمار و بنّا خِدائه. 11 ایمونِ هِمراه بییه که سارا قِوَّت بَییته که حامله بَووه با اینکه سنی وه جِم بُگذِشته بییه؛ چوون وه دونِسه کِسی که وعده هِدا وِفادارِ. 12 و این طی، یِتا مَردیِ جِم، اونِم کِسی که یِتا مِردهِ واری بییه، نَسل هایی به وجود بییَمو، که آسمونِ ستاره هائه واری و دریائه بی حدّ و حسابِ ریگِ واری، بینه. 13 وِشون همه ایمونِ دِله بَمِردِنه، بدون اینکه وعده‌ها ره بَیرِن، ولی اونا ره از دور بَدینه و سِلام بااوتِنه. و قبول هاکاردِنه که زِمینِ سَر غَریبِنه. 14 چوون اونایی که این طی گَب زندِنه، هم دوندِنه که شه وِسه یِتا وطنِ دِمبال دَرِنه. 15 اگه وِشون اون مِلکِ فکر بینه که وه جِم بیرون بییَمونه، بَردَگِردِسِنِ وِسه فرصتی داشتِنه. 16 ولی این طی که ویمبی وِشون یِتا بهترِ مِلکِ دِمبال دَینه، یعنی یِتا آسِمونی مملکت. اینِ وِسه، خِدا عار نِدارنه که وِشونِ خِدا، بااوته بَووه، چوون یِتا شَهر وِشونِ وِسه آماده هاکارده. 17 ایمونِ هِمراه بییه که اِبراهیم اون مووقه که آزمود بَییه، اِسحاقِ پیشکَش هاکارده؛ و وه که وعده‌ها ره بَییته بییه قبول هاکارده که شه یِتا ریکا ره قِروونی هاکانه، 18 همونی که وه ره بااوته بَییه: «تِ نَسل اِسحاقِ جِم بااوته بونه» 19 اِبراهیم این طی فکر هاکارده که خِدا تونده، اِسحاقِ، مِرده هائه جِم زنده هاکانه، و بونه بااوتِن که اِبراهیم این طی اِسحاقِ مَرگِ جِم پَس بَییته. 20 ایمونِ هِمراه بییه که اِسحاق، یَعقوب و عیسو ره آیندهِ چیائه جِم بَرکَت هِدا. 21 ایمونِ هِمراه بییه که یَعقوب اون مووقه که دَییه مِرده، یوسِفِ هر کِدوم از ریکائونِ بَرکَت هِدا و هَمون طی که شه عَصا ره تکیه هِدا بییه، سِجده هاکارده و پَرَسِش هاکارده. 22 ایمونِ هِمراه بییه که یوسِف اون مووقه که داشته مِرده، بنی‌اِسرائیلِ بوردَنِ جِم، مصرِ جِم خَوِر هِدا و شه اِستِکاهائه خَوِری وصیت هاکارده. 23 ایمونِ هِمراه بییه که اون مووقه که موسی دِنیا بییَمو، وه پییِر مار وه ره سه ماه جا هِدانه، اینِ وِسه که بَدینه اون قشنگِ وَچه ئه؛ و پادشاهِ حکمِ جِم نَتِرسینه. 24 ایمونِ هِمراه بییه که وَختی که موسی گَت بَییه، نِخواسه فِرعونِ کیجائه ریکا بااوته بَووه. 25 وه حاضر بَییه که خِدائه قومِ هِمراه ذلیل بَووه، تا اینکه یه مدّت گِناهِ خِشی هائه جِم کیف هاکانه. 26 و اون سرکوفت که مَسیحِ خاطِری بییه ره یِتا گنج، مصرِ گنجهائه جِم گتتِر بِشمارِسه، چوون وه اون پاداشِ دِمبال دَییه. 27 ایمونِ هِمراه بییه که موسی مصرِ جِم بیرون بییَمو و پادشاهِ غیظِ جِم نَتِرسیه، وه طاقت بیارده چوون اونی که نَوونه بَدیئنِ، ویندِسه 28 ایمونِ هِمراه بییه که موسی پِسَخ و خون دَپاشییَنِ به‌جا بیارده تا اون فرشته که اَوِّلین وَچونِ هِلاک کارده، اِسرائیلِ اَوِّلین وَچونِ سَر دَس نییِله. 29 ایمونِ هِمراه بییه که اِسرائیلِ قوم سِرخِ دریائه میون، یِتا خِشکِ زِمینِ واری رَد بَینه؛ ولی وَختی مِصریون تَقِلّا هاکاردِنه که هَمون کارِ هاکانِن، اوه دِله غرق بَینه. 30 ایمونِ هِمراه بییه که اَریحائه شَهرِ دیفارا بعد از اینکه اِسرائیلِ قوم هَفت روز اونائه دور بَگِردِسِنه، له بورده. 31 ایمونِ هِمراه بییه که فاحشه راحاب اونایی هِمراه که نافرمان بینه بَکوشته نَییه، چوون وه جاسوسونِ گرمیِ هِمراه قبول هاکارده. 32 دییه چی بارِم؟ چوون دییه وَخت دَنییه جِدعون و باراق و شَمشون و یَفتاح و داوود و سَموئیل و پِیغَمبِرونِ خَوِری گَب بَزِنِم، 33 که ایمونِ هِمراه، مملکت ها ره فتح هاکاردِنه، عِدالَتِ برقِرار هاکاردِنه، و وعده‌ها ره به‌دَس بیاردِنه؛ شیرهائه دِهونِ دَوِسِنه، 34 تَشِ اَلوکِ دَکوشتِنه و شَمشیرِ دَمِ جِم جان در بَوِردِنه؛ وِشونِ ضعف ها، قِوَّت بَییه، جَنگ دِله قِددار بَینه و اَجنبی هائه لشکریونِ تار و مار هاکاردِنه. 35 زَن ها، شه مِرده ها ره زنده پی دا هاکاردِنه. بعضیا عِذاب بَکِشینه و آزادی ره قبول نکاردِنه، تا اَت کَش دییه یِتا بهترِ زندگیِ وِسه زِنده بَووِن. 36 بَعضیا مسخره بَینه و شِلاق بَخُردِنه، و حَتَّی زَنجیلِ هِمراه دَوِسه بَینه و زندون دَکِتِنه. 37 وِشون سَنگسار بَینه، اَرّهِ هِمراه دِ تیکه بَینه و شَمشیرِ هِمراه بَکوشته بَینه. گَسفِن و بِزِ پوسِ دَپوشی بینه، فقیر و مصیبت بَکِشی و ذلیل و آواره بَینه. 38 وِشون که دِنیا وِشونِ لیاقتِ نِداشته، صحراها و کوه ها، و غارها و زِمینِ چاک هائه دِله، آواره بَینه. 39 همه وِشون با اینکه وِشونِ ایمونِ خاطِری بییه که وِشونِ خَوِری خوارِ شِهادت ها هِدا بَییه وَعده ره به دَس نیاردِنه. 40 چوون خِدا یِتا بهترِ چی اَمه وِسه حاضر هاکارده بییه، تا بدون اِما وِشون کامل نَووِن. |
@2024 Korpu Company