اِفِسُسیان 6 - کتاب مقدس به زبان مازندرانی - گویش شرقیپییِر مار و وچون 1 ای وَچون، خِداوندِ دِله شه پییِرمارِ جِم اِطاعت هاکانین، چوون دِرِسِ کار اینِ. 2 «شه پییِرمارِ اِحترام بییِل»، که این اَوِّلین حکمِ که وعدهِ هِمراهِ: 3 «تا خِشوَخت بَووی و زِمینِ سَر درازِ عمر داری» 4 ای پییِرون، شه وَچونِ غِیظِ بالا نیارین، بلکه وِشونِ خِداوندِ تَعلیم و تربیتِ هِمراه گَت هاکانین. نوکِرون و اَربابون 5 اِی نوکِرون، شه زِمینی اَربابونِ تَرسِ لرزِ هِمراه و جان و دِل هِمراه، اِطاعت هاکانین، هَمون طی که اِنگار مَسیح ره اِطاعت کاندینی. 6 و این هم، نا فِقَط اون مووقه که شِما ره اِشِنِنه، اونایی واری که آدِمیِ راضی هاکاردِنِ دِمبال دَرِنه، بلکه مَسیحِ نوکِرون واری که خِدائه اِراده ره جان و دِلِ هِمراه به‌جا یارنِنه. 7 خوارِ نیِّتِ هِمراه خِدمِت هاکانین، هَمون طی که اِنگاری خِداوندِ خِدمِت کاندینی نا آدِمِ، 8 دوندِنی، هر کی که خوارِ کار هاکانه، اونِ جِوابِ خِداوندِ جِم گِرنه، چه نوکِر بوئه، چه آزاد. 9 اِی اَربابون، شه نوکِرونِ هِمراه همین‌طی رِفتار هاکانین، و وِشونِ خط و نِشون بَکِشییَنِ جِم دَس بَکِشین، چوون دوندِنی، وه که هم وِشونِ اَربابِ و هم شِمه اربابِ، آسمونِ دِله دَره، و وه هیچ کسِ میون فرق نییِلنه. خِدائه اَسلحه 10 سرآخِر، خِداوندِ دِله، و اون قِوَّتِ دِله، که وه قِدرَتِ جِم اِنه، قَوی بَووین. 11 خِدائه اَسلحه ره کامل دَپوشین تا بَتونین اِبلیسِ حُقّه هائه جلو هِرسین. 12 چوون اَمه جَنگ، جِسم و خونِ هِمراه یعنی آدِمِ هِمراه نییه، بلکه اِما رئیسونِ علیه، قِدرت هائه علیه، و اون تاریکیِ نیروهائه علیه که این دِنیائه سَر حاکِمِنه، و شَریرِ روحانی لشگرهائه علیه،که آسِمونی جاهائه دِله دَرِنه، جَنگِمبی. 13 پَس خِدائه اَسلحه ره کامل دَپوشین، تا شرِّ روزِ دِله بَتونین قایم هِرسین، و بَتونین بعد از اینکه همه چی اِنجام بَییه، پایدار هِرسین. 14 پَس قایم هِرسین، هَمون طی که حَییقَتِ کَمِروَندِ دَوِسِنی و شه صالحیِ زره ره شه تَن دَکاردینی 15 اِنجیلِ صِلح و سِلامتی ره یِتا کوشِ واری دَپوشین، اون طی که اِنگاری اونِ اِعلامِ وِسه آمادِنی. 16 هر وضعِ دِله، ایمونِ سِپَرِ بَیرین، تا بَتونین اونِ هِمراه، اون شَریرِ، تِمومِ تَش دارِ تیرها ره دَکوشین. 17 نِجاتِ کِلاهخودِ شه سَر بییِلین و روحِ شمشیر که هَمون خِدائه کِلامِ ره، شه دَس بَیرین. 18 و هَمش، هر جور دِعا و خواهشِ هِمراه، خِدائه روحِ دِله دِعا هاکانین و هَمینِ وِسه بیدار و هوشیار بوئین و هَمش پایداریِ هِمراه تِمومِ مِقَدَّسینِ وِسه دِعا هاکانین. 19 مِ وِسه هم دِعا هاکانین، تا هَر وَخت شه دِهونِ گَب بَزوئِنِ وِسه واز کامبه، اون کِلامِ قِوَّت مِ ره هِدا بَووه تا اِنجیلِ رازِ، دِل و جِرأتِ هِمراه اِعلام هاکانِم، 20 هَمون اِنجیل که اونِ سَفیرِمه، هر چَن زنجیلِ دِله! دِعا هاکانین که اونِ جِرأتِ هِمراه، اون طی که وه لایقِ، اِعلام هاکانِم. سَر آخِر 21 اینِ وِسه که مِ حالِ روزِ جِم خَوِردار بوئین و بَدونین چی کامبه، تیخیکوس، که عزیزِ بِرار و خِداوندِ دِله وِفادارِ خادِمِ، همه چی ره شِما ره گانه. 22 مِن وه ره این منظورِ وِسه شِمه پَلی راهی هاکاردِمه تا اَمه حالِ روزِ جِم خَوِردار بَووین و تا وه، شِما ره دِلگرم هاکانه. 23 خِدائه پییِرِ طَرِف جِم و خِداوند عیسیِ مَسیحِ طَرِفِ جِم، بِرارونِ وِسه صِلح و سِلامتی و با ایمونِ مِحَبَّت بوئه. 24 وه فِیض تِمومِ کِسایی هِمراه که اَمه خِداوند عیسی مَسیحِ، اون مِحبَّتی هِمراه که از بین نَشونه، دوس دارنِنه. |
@2024 Korpu Company