کولُسیان 4 - کتاب مقدس به زبان مازندرانی - گویش شرقی

¹ ای اربابون، شه نوکِرونِ هِمراه عدل و اِنصافِ هِمراه رِفتار هاکانین، چوون دوندِنی شِما هم یِتا اَرباب، آسِمون دِله دارنِنی.

² هَمِش دِعائه دِله استوار بوئین و دِعائه دِله شِکر هاکاردِنِ هِمراه، شِمه حِواس جَمع بوئه.

³ و همزِمون اَمه وِسه هم دِعا هاکانین، تا خِدا یِتا دَر کِلامِ وِسه اَمه وِسه واز هاکانه تا بَتونیم مَسیحِ رازِ اِعلام هاکانیم. اون رازی که اونِ خاطِری زِندونِ دِله دَرِمبه

⁴ دِعا هاکانین که بَتونِم هَمون طی که لایقِ اونِ واضح بارِم.

⁵ اون مردِمی که کلیسائه بیرون دَرِنه هِمراه، حکیمانه رِفتار هاکانین و هر وَختِ جِم خوار استفاده هاکانین .

⁶ شِمه گَب ها هَمِش فیضِ جِم پِر و سنجیده بوئه، تا بَدونین هر کیِ چی طی جِواب هادین.

آخِرین سِلام ها

⁷ تیخیکوس شِما ره مِ اَحوال جِم، کاملاً باخَوِر کانده. وه عزیزِ برار و وِفادارِ نوکِر و خِداوندِ دِله مِ هِمراه هم خِدمتِ.

⁸ وه ره شِمه پَلی راهی کامبه تا اَمه اَحوالِ جِم باخَوِر بَووین، و تا شِما ره دلگرم هاکانه.

⁹ وه اونیسیموسِ هِمراه، اَمه عزیز و وِفادارِ بِرار که یِتا از شِمائه، شِمه پَلی اِنه. وِشون شِما ره هر اونچی که اینجه اِتفاق کَفِنهِ جِم باخَوِر کاندِنه.

¹⁰ آریستارخوس که مِ هِمراه زِندونِ دِله دَره، شِمه وِسه سِلام رِسِندِنه؛ همین طی هم مَرقُس، بَرنابائه عمو پِسِر، شِمه وِسه سِلام دارنه. که قبلاً وه خَوِری شِما ره سفارش هاکاردِمه که هر وَخت شِمه پَلی بِیّه، گرمیِ هِمراه وه ره قبول هاکانین.

¹¹ عیسی که یوستوس هم وه ره گانِنه، شِمه وِسه سِلام رِسِندِنه. مِ همکارونِ میون، خِدائه پادشاهیِ کارِ دِله، فِقَط اینا، خَتنه بَیّه مَردا هَسِنه، و وِشون مِ تسلّیِ باعث بینه.

¹² اِپافْراس که یِتا از شِما و مَسیحْ عیسیِ نوکرِ، شِمه وِسه سِلام دارنه. وه هَمِش دِعائه دِله خِدائه جِم خوانه که شِما اون آدِمونِ واری که بالغ و خاطِر جمع هَسِنه، پا بر جا بَمونین، و خِدائه ارادهِ جِم کاملاً اِطاعت هاکانین.

¹³ مِن شاهدِمه که وه شِمه وِسه و اونایی که لائودیکیه و هیراپولیس دِله دَرِنهِ وِسه، سَخت زحمت بَکِشیه.

¹⁴ عزیزِ دکتر لوقا و دیماس شِمه وِسه سِلام رِسِندِنِنه.

¹⁵ اَمه بِرارون و خواخِرون، لائودیکیه دِله و همین طی نیمفا و کلیسایی که این زِنائه سِره دِله بر پا بونه ره سِلام بَرِسونین.

¹⁶ و وَختی که این نامه شِمه میون بَخوندِسه بَییه، لائودیکیه کلیسائه دِله هم بَخوندِسه بَووه؛ و شِما هم مِ نامه ره که لائودیکیهِ وِسه بَنوِشتِمه ره بَخونین.

¹⁷ و آرخیپوسِ بارین: «مِواظِب باش تا خدمتی ره که خِداوندِ دِله تِ ره بِسپارِسه بَییه ره کامل اِنجام هادی.»

¹⁸ مِن، پولُس، این سلامِ شه دَسِ هِمراه نِویسِمبه. مِ زَنجیلا ره این زِندونِ دِله شه یاد بیارین. فِیض شِمه هِمراه دَووه.