اعمال رَسولان 6 - کتاب مقدس به زبان مازندرانی - گویش شرقی

هَفت نَفِر خِدمتِ وِسه انتخاب بونِنه

¹ اون روزا که شاگِردون ویشتر بونِسنه، یَهودیونِ یونانی زِوون،‌ یَهودیونِ عِبرانی زِوونِ جِم شکایت داشتِنه که وِشونِ بیوه‌زَن ها ره سَر چِش نَینه و وِشونِ هر روزه غذائه سَهمِ دِرِس نَدِنِنه.

² پَس اون دِوازَه رَسول، تِمومِ شاگردونِ شه پَلی صدا هاکاردِنه و بااوتِنه: «دِرِس نییه که اِما مَردِمِ غِذا هِدائِن وِسه، خِدائه کِلامِ تَعلیم هِدائِنِ وِل هاکانیم.

³ ای بِرارون، اینِ وِسه، شه میون هَفت نَفِر که خِش نومِنه و خِدائه روح و حِکمتِ جِم پِرِنه ره انتخاب هاکانین تا وِشونِ این کارِ سَر بییِلیم

⁴ ولی اِما شه ره دِعا هاکاردِن و خِدائه کِلامِ خِدمِت وِسه وَقف کامبی.»

⁵ اونچی که رسولون بااوتِنه همه نَظِر خوار بییَمو و این آدِمونِ انتخاب هاکاردِنه: اِستیفان، مَردی که روح‌القُدُس و ایمونِ جِم پِر بییه، فیلیپُس، پْروخُروس، نیکانُر، تیمُن، پارمِناس و نیکُلائوس که اَنطاکیهِ دِله یَهودی بَییه بییه.

⁶ این مَردا ره رسولونِ پَلی بیاردِنه و رسولون وِشونِ وِسه دِعا هاکاردِنه و وِشونِ سَر دَس بییِشتِنه و اونا ره این خِدمتِ سَر بییِشتِنه .

⁷ پَس خِدائه کِلام همه جا اِعلام بونِسه و اورشَلیمِ دلهِ شاگِردون، یَته خَله بونِسنه و یَهودِ کاهِنونِ جِم یِتا گَتِ جَمیَّت، ایمون بیاردِنه.

استیفان دستگیر بونه

⁸ استیفان، فِیض و قِوَّتِ جِم پِر بییه و قومِ دِله خَله عجیبِ کارا و معجزات کارده.

⁹ اون مووقه چَن نَفِر، یِتا عبادتگاه جِم، که اونِ اسم «آزاد بَییه هائه عبادتگاه» بییه، که قیرَوانِ یَهودیونِ جِم و اسکندریه و کیلیکیه و آسیائه مَنطقهِ جِم هم بینه، استیفانِ هِمراه بَحث هاکاردِنه.

¹⁰ ولی استیفان اون حِکمَت و خِدائه روحِ هِمراه که گَب زوئه، هیچ کَس نَتونِسه وه روب رو اِیست هاکانه.

¹¹ پَس وِشون یِواشکی چَن نَفِرِ خلوتِ جا بَوِردِنه و وِشونِ تحریک هاکاردِنه تا بارِن: «اِما بِشنُسیمی که استیفان موسیِ پِیغَمبِر و خِدا ره کُفر گاته.»

¹² وِشون مَردِم و مشایخ و توراتِ مَلّمونِ، استیفانِ علیه پِر هاکاردِنه و اونا استیفانِ سَر دَکِتِنه، وه ره بییتِنه و شورائه پَلی بَوِردِنه.

¹³ وِشون چَن تا دِراغی شاهد هم بیاردِنه که گاتِنه: «این آدِم این کارِ جِم دَس نَکِشِنه و هَمِش مِقَدَّسِ مَعبِد و شَریعتِ، بد گانه.

¹⁴ چوون اِما شه بِشنُسیمی که گاته این عیسیِ ناصری این مَعبِدِ له دِنه و رَسم و رَسومی ره که موسی اِما ره هِدا ره عَوِض کانده.»

¹⁵ هَمون مووقه، تِمومِ اونایی که شورائه دِله نیشته بینه اِستیفانِ زِل بَزو بینه و بَدینه که استیفانِ دیم یِتا فِرشتهِ دیمِ واری بَییه.