اعمال رَسولان 22 - کتاب مقدس به زبان مازندرانی - گویش شرقی

¹ «ای بِرارون و ای پیِیرون، مِ دِفاعیه که اَلان شِمه عَرض رِسِندِمبه ره گوش هادین.»

² وَختی وِشون بِشنُسِنه که پولُس عبرانیونِ زِوونِ هِمراه وِشونِ وِسه گَب زَنده، ویشتر ساکت بَینه. اون وَخت پولُس بااوته:

³ «مِن یَهو‌دی مَردیمه، کیلیکیهِ تارسوسِ شَهرِ دِله دِنیا بییَمومه ولی اورشَلیمِ شَهرِ دِله گَت بَیمه. شه اَجدادِ شَریعتِ کاملاً، گامالائیلِ دَسِ بِن یاد بَییتِمه و خِدائه وِسه غیرت داشتِمه، هَمون طی که شِما همه اَمروز دارنِنی.

⁴ مِن ’اَهلِ طَریقَتِ‘ تا مَرگ، آزار بَرِسِندیمه و وِشونِ چه زِنا چه مَردی، دَسگیر کاردِمه و زِندونِ دِله دِم دامه.

⁵ کاهِنِ اَعظِم و تِمومِ یَهودِ اعضائه شورا، توندِنه این کارِ وِسه شِهادت هادِن، چوون وِشونِ جِم نامه‌هایی بِرارونِ وِسه که دَمشقِ دِله دَرِنه بَییتِمه تا اونجه بُورِم و این اَهلِ طَریقَتِ دسگیر هاکانِم و مِجازاتِ وِسه اورشَلیم بیارِم.

⁶ «ولی وَختی راهِ دِله دمَشقِ نَزیک بونِسِمه، ظِهرِ مووقه، یِدَفه یِتا گَتِ نور که آدِمِ چِشِ زوئه آسِمونِ جِم مِ دور بَتابِسه.

⁷ بِنه سَر دَکِتِمه و یِتا صدا بِشنُسِمه که مِ ره گاته: ”شائول! شائول! چه مِ ره عِذاب دِنی؟“

⁸ «بَپِرسیمه: ”خِداوندا، تِ کی ای؟“ «جِواب هِدا: مِن هَمون عیسیِ ناصریمه که تِ وه ره عِذاب دِنی.“

⁹ مِ همراهون نورِ بَدینه، ولی وه صِدا ره که مِ هِمراه گَب زوئه ره نِشنُسِنه.

¹⁰ «بااوتِمه: ”خِداوندا، چی هاکانِم؟“ «خِداوند مِ ره بااوته: ”پِرِس و دَمشق بور. اونجه اونچی که تِ وِنه اِنجام هادی ره تِ ره گانِنه.“

¹¹ از اونجه که مِن اون نورِ رووشِناییِ جِم، کور بَیمه، مِ هِمراهون مِ دسِ بَییتِنه و دَمشق بییَمومی.

¹² «دَمشق دِله، یِتا دیندارِ مَردی که وه اسم حَنانیا بییه و شَریعتِ اِنجام هِدائِنِ دِله غیرت داشته، زندگی کارده، وه تِمومِ یَهودیونِ دِله، خِشنوم بییه.

¹³ حَنانیا بییَمو و مِ پَلی اِیست هاکارده و بااوته: ”شائول برار! بینا بَواش!“ هَمون لَحظه، اَی مِ چِش سو دَکِته و وه ره بَدیمه.

¹⁴ «حنانیا بااوته: ”اَمه پییِرونِ خِدا تِ ره انتخاب هاکارده تا وه اِراده ره بَدونی و اون صالح ره بَوینی و وه دِهونِ جِم گَب هایی ره بِشنُئی.

¹⁵ چوون تِ تِمومِ مَردِمِ پَلی، وه شاهد بونی و اونچی که بَدیئی و بِشنُسی ره شِهادت دِنی.

¹⁶ اِسا چیه اِنتِظارِ کَشِنی؟ پِرِس و وه اسمِ بَخون و غسلِ تَعمید بَیر و شه گِناهونِ جِم پاک بَواش!“

¹⁷ «وَختی اورشَلیم بَردَگِردِسمه و مَعبدِ دِله دَیمه دِعا کاردِمه، خَلسه دِله بوردِمه

¹⁸ و خِداوندِ بَدیمه که بااوته: ”عَجِله هاکان و هر چی زودتر اورشَلیمِ جِم بور، چوون وِشون تِ شِهادتِ مِ خَوِری قَبول نَکاندِنه.“

¹⁹ «مِن بااوتِمه: ”خِداوندا، وِشون شه دوندِنه که مِن عبادتگاه هائه دِله شیمه و اونایی ره که تِ ره ایمون داشتِنه ره زِندونِ دِله دِم دامه و زومه.

²⁰ وَختی تِ شاهد اِستیفانِ خونِ شَندینه، مِن شه اونجه اِیست هاکارده بیمه، اون کارِ هِمراه موافق بیمه و وه قاتلونِ لِواسِ مِواظب بیمه.“

²¹ خِداوند مِ ره بااوته: ”بور؛ چوون مِن تِ ره دورِ دورِ جاها، غیرِ یَهودیونِ پَلی فِرِسِندِمبه»

²² مَردِم تا اینجه پولُسِ گَبِ گوش دانه، ولی وَختی اینِ بااوته، شه صِدا ره بِلِند هاکاردِنه، داد بَکِشینه: «زِمینِ، این طی آدِمِ جِم پاک هاکانین نَوِسه اِجازه هِدا این طی آدِم زِنده بَمونه!»

²³ اون مووقه که وِشون شونگِ هِمراه شه قواها ره شه سَرِ وَر تکون دانه و خاک بِلِند کاردِنه،

²⁴ فَرمونده دَستور هِدا پولُسِ قَلعه بَوِرِن، شِلّاق بَزِنِن و وه جِم بازخواس هاکانِن تا مَعلوم بَووه چی وِسه مَردِم این طی وه علیه داد کَشِنِنه.

²⁵ وَختی که پولسِ شِلّاق بَزوئِنِ وِسه وَسِّنه، پولُس اَفسِری که اونجه اِیست هاکارده بییه ره بااوته: «قانون، شِما ره این اِجازه ره دِنه یه نَفِرِ که رومِ تابعیتِ دارنه ره بی اینکه محاکِمه هاکانین شِلّاق بَزِنین؟»

²⁶ اون افسر وَختی اینِ بِشنُسه، فرموندهِ پَلی بُورده و وه ره بااوته: «تِ دَره چی کاندی؟ این مَردی رومِ تابعیتِ دارنه!»

²⁷ فَرمونده پُولُسِ پَلی بییَمو و وه جِم بَپِرسیه: «بار هارِشِم، تِ رومِ تابعیتِ دارنی؟» پولُس جِواب هِدا: «اَره، دارمه.»

²⁸ بعد فَرمونده بااوته: «مِن این تابعیتِ به‌دس بیاردِنِ وِسه، خَله بَها هِدامه.» پولُس وه جِواب بااوته: «ولی مِن این تابعیتِ هِمراه دِنیا بییَمومه!»

²⁹ وِشون که قِرار بییه وه جِم بازخواس هاکانِن، دَرجا شه ره کِنار بَکِشینه. فَرمونده هم که بِفَهمِسه بییه یِتا رومی ره دستگیر هاکارده، بَتِرسیه.

پولُس یَهودِ شورائه پَلی

³⁰ فِردائه اون روز، وَختی فَرمونده خواسه دقّتِ هِمراه بِفَهمه که چه یَهودیون پولُسِ مِتّهم هاکاردِنه، وه ره زِندونِ جِم آزاد هاکارده و دَستور هِدا گَت گَتِ کاهِنون و تِمومِ یَهودِ شورائه اعضا جَمع بَووِن. بعد، پولُسِ جِر بیارده تا وِشونِ روب رو حاضر بَووه.