اعمال رَسولان 17 - کتاب مقدس به زبان مازندرانی - گویش شرقی

پولس و سیلاس تِسالونیکیِ دِله

¹ پولُس و سیلاس آمْفیپولیس و آپولونیائه شهرائه جِم بُگذِشتِنه و تِسالونیکیِ شَهر بییَمونه، که اونجه یَهودیونِ عبادتگاه بییه.

² پولُس طبقِ شه عادت عبادتگاه بُورده، وه سه تا مِقدَّسِ شنبه، وِشونِ هِمراه مِقَدَّسِ نوِشته هائه جِم، بحث کارده

³ و توضیح دائه و دلیل یارده که وِنه مَسیح عِذاب بَکِشه و مِرده هائه جِم زنده بَووه. وه گاته: «این عیسی که وه ره شِما ره اِعلام کامبه، هَمون مَسیحِ موعودِ.»

⁴ وِشونِ جِم بعضیا قانع بَینه که پولس و سیلاسِ مِلحق بَووِن. و همین طی یِتا گَتِ گروه خِداپَرَسِ یونانیون و سرشناسِ زَن هائه جِم یَته خَله وِشونِ مِلحق بَینه.

⁵ ولی یَهودیون حَسودی هاکاردِنه و چَن تا شَریرِ آدِمونِ، بازارِ جِم، جَمع هاکاردِنه، اَت دسه لاتِ لوت راه دینگونه و شَهرِ دِله بَلوا هاکاردِنه. وِشون پولُس و سیلاسِ پی دا هاکاردِنِ وِسه یاسونِ سِره هجوم بَوِردِنه تا وِشونِ جَمیِّتِ دلهِ جِم بیرون بیارِن.

⁶ ولی وَختی وِشونِ پی دا نکاردِنه، یاسون و بِرارونِ جِم بَعضی دییه ره شَهرِ حاکمونِ پَلی بَکِشِندینه و داد بَزونه که «این مَردا که تِمومِ دِنیا ره زیرِ رو هاکاردِنه، اِسا اینجه بییَمونه

⁷ و یاسون، وِشونِ شه سِره بَوِرده. اینا همه، رومِ پادشاه قیصرِ دَستوراتِ جِم سَرپیچی کاندنه و مِدَّعینه که یِتا دییه پادشاه به اسم عیسی دَره.»

⁸ وَختی مَردِم و شَهرِ حاکِمون اینِ بِشنُسِنه، پریشون بَینه.

⁹ بعد یاسون و بقیهِ جِم ضمانت بَییته، وِشونِ آزاد هاکاردِنه.

پولُس و سیلاس بیریهِ شَهرِ دِله

¹⁰ بِرارون شبونه، دَرجا پولُس و سیلاسِ بیریهِ شَهر راهی هاکاردِنه. وَختی وِشون اونجه بَرِسینه، یَهودیونِ عِبادَتگاهِ دِله بُوردِنه.

¹¹ این یَهودیون اون یَهودیونِ جِم که تِسالونیکیِ دِله دَینه نَجیب‌تر بینه، وِشون اِشتیاقِ هِمراه پِیغومِ قبول هاکاردِنه و هر روز مِقَدَّسِ نوِشته ها ره خوندِسِنه تا بَوینِن پولُس و سیلاسِ گَب خِدائه کِلامِ واری هَسه یا نا.

¹² این طی، یَهودیونِ جِم یَته خَله و سرشناسِ یونانی زَن ها و مردائه جِم هم یَته خَله ایمون بیاردِنه.

¹³ وَختی تِسالونیکیِ یَهودیون بِفَهمِسِنه که پولُس بیریهِ دِله هم خِدائه کِلامِ اِعلام کانده، اونجه بُوردِنه و مَردِمِ تحریک هاکاردِنه و شَهرِ آشوب بَکِشینه.

¹⁴ بِرارون دَرجا پولُسِ دریالوِ سَمت راهی هاکاردِنه، ولی سیلاس و تیموتائوس بیریهِ دِله بَمونِسِنه.

¹⁵ اونایی که پولُسِ همراهی کاردِنه، وه ره تا آتِن بیاردِنه. بعد از اینکه پولُسِ جِم سیلاس و تیموتائوسِ وِسه دستور بَییتِنه که هر‌ چی تِندتر پولُسِ مِلحق بَووِن، اونجه جِم بوردِنه.

پولُس آتِنِ دِله

¹⁶ اون مووقه که پولُس آتِنِ دِله اون دِ نَفِرِ اِنتِظارِ کَشیه، از اینکه ویندِسه شَهر، بِت هائه جِم پِرِ، وه روحِ غُصّه بَییته.

¹⁷ اینِ وِسه، عِبادَتگاهِ دِله یَهودیون و خِداپَرَسِ یونانیون و هم هر روز شَهرِ میدونِ دِله اون مَردِمِ هِمراه هم که اونجه دَینه بَحث کارده.

¹⁸ رَواقی و اپیکوریِ فیلسوفونِ جِم بعضیا هم وه هِمراه بحث کاردِنه. وِشونِ جِم بعضیا گاتِنه: «این مِفتِ گَب زَن چی خوانه باره؟» بَقیه گاتِنه: «انگاری غَریبِ خِدایونِ تبلیغ کانده.» چوون پولُس، عیسی و مِرده هائه زِنده بَیِّنِ خَوِری وِشونِ وِسه گَب زوئه.

¹⁹ بعد پولُسِ بَییتنه، ’آریوپاگوسِ‘ دِله که یِتا کِچیکِ تپه، آتِنِ دِله بییه و مَردِم اونجه جَمع بونِسِنه بَوِردِنه و وه ره بااوتِنه: «تومبی بَدونیم این جدیدِ تعلیمی که تِ دِنی، چیه؟

²⁰ تِ گَب اَمه گوش عجیب اِنه. پَس خوامبی وه مَعنی ره بَدونیم.»

²¹ تِمومِ آتِنیون و غریبه هایی که اونجه زندگی کاردِنه، کاری نِداشتنه به جِز این که شه وَختِ تازه عقایدِ گَب بَزوئِنِ سَر بییِلّن.

²² پَس پولُس «آریوپاگوسِ» میون اِیست هاکارده و بااوته: «ای آتِنِ مَردا، مِن شِما ره هر لَحاظِ جِم خَله دیندار بَدیمه.

²³ چوون وَختی که شَهرِ دِله گِردِسِمه و اونچی ره که شِما پَرِسش کاردینی ره بَدیمه، یِتا قِروونگاه پی دا هاکاردِمه که اونِ سَر بَنوِشته بَییه بییه: ”تَقدیم به خِدایی که هَمتی بِشناسی نَییه “. اِسا مِن اونچیِ که شِما اونِ نِشناسِنِنی و پَرَسِش کاندینی ره شِما ره اِعلام کامبه.

²⁴ «خِدایی که دِنیا و هر اونچی، اونِ دِله دَره ره خَلق هاکارده، آسِمون و زِمینِ صاحابِ، و مَعبِدایی که آدِمیِ دَسِ جِم بِساته بَییهِ دِله زندگی نَکانده.

²⁵ آدِمیِ دَس نَتونده وه ره خِدمِتی هاکانه، جوری که گانی یه چیِ مِحتاج بوئه، چوون شه وه ئه که تِمومِ آدِمونِ زندگی و نَفَس و هر چیِ دییه ره بِبَخشیه.

²⁶ وه تِمومِ مَردِمِ یِتا آدِمِ جِم به وجود بیارده تا تِمومِ زِمینِ دِله زندگی هاکانِن؛ و وِشونِ وِسه تعیین بَییه وَخت و وِشونِ زندگیِ مَحَلِ حَد و حدودِ تعیین هاکارده.

²⁷ تا مَردِم خِدائه دِمبال بَگِردِن و شاید وه دِمبال بورِن، وه ره پی دا هاکانِن، هر چَن خِدا اِما هیچ کِدومِ جِم دور نییه.

²⁸ چوون وه دِله ئه که زندگی و حرکِت و هَستی دارمی؛ هَمون طی که شه شِمه شاعرونِ جِم بعضیا هم بااوتِنه که حَییقَتاً وه نَسلِ جِم هَسِنه.

²⁹ «اِسا که خِدائه نَسلِ جِم هَسیمی، خوار نییه این طی فکر هاکانیم که خِدابییَن، طِلا یا نِقره یا سَنگِ واریِ، یِتا مجسمه واری که آدِمیِ هنر و خیالاتِ هِمراه، بَتِراشی بَییه بوئه.

³⁰ قَدیم، خِدا این طی نادونیِ جِم چِش پوشی کارده. ولی اَلان تِمومِ مَردِمِ، اِسا هر جا که دَرِنه ره دستور دِنه که توبه هاکانِن.

³¹ چوون که وه یِتا روزِ تعیین هاکارده که اونِ دلهِ اون آدِمِ طریق که مَعین هاکارده، دِنیا ره عِدالَتِ هِمراه داوِری کانده، و وه ره مِرده هائه جِم زنده هاکاردِنِ هِمراه، همه ره این جَریانِ جِم مِطمَئِن هاکارده.»

³² وَختی وِشون مِرده هائه زِنده بَیِّنِ خَوِری، بِشنُسِنه، بَعضیا پوزخن بَزونه، ولی بَقیه بااوتِنه: «اِما اَی هم تِ جِم این جَریانِ خَوِری اِشنُمبی.»

³³ پَس پولُس وِشونِ جَمع جِم بورده.

³⁴ ولی چَن نَفِر وه ره مِلحق بَینه و ایمون بیاردِنه. و وِشونِ میون دیونیسیوس، که ’آریوپاگوسِ‘ دَسهِ جِم بییه، یِتا زِنا به اسم داماریس، و چَن نَفِر دییه هم، اون دَسهِ جِم بینه.