اعمال رَسولان 13 - کتاب مقدس به زبان مازندرانی - گویش شرقی

بَرنابا و شائولِ سفر، انجیل پِیغومِ وِسه

¹ اَنطاکیهِ کلیسائه دِله پِیغَمبِرون و مَلِّمون دَینه: بَرنابا، شَمعونِ مَعروف به نیجِر، لوکیوسِ قیرَوانی، مَنائِن که هیرودیسِ حاکمِ ناتَنی بِرار بییه و شائول.

² مووقه ای که وِشون روزه بینه و دَینه خِداوندِ پرسِش کاردِنه، روح القدُس بااوته: «بَرنابا و شائولِ کاریِ که مِن وِشونِ اونِ وِسه دَعوت هاکاردِمه، سیوا هاکانین.»

³ اون وَخت، بعد از روزه و دِعا، اون دِتائه سَر دَس بییِشتِنه و وِشونِ سَفِرِ وِسه راهی هاکاردِنه.

برنابا و شائول قبرسِ دِله

⁴ این طی، اون دِتا که روح القُدُسِ طَرِفِ جِم بَفرِسی بَییه بینه، سِلوکیهِ بندر بُوردِنه و اونجه جِم کَشتیِ هِمراه قبرس بَرِسینه.

⁵ وَختی سَلامیسِ شَهرِ دِله بُوردِنه، یَهودیونِ عبادتگاه هائه دِله خِدائه کِلامِ اِعلام هاکاردِنه. اونا یوحنائه معروف به مَرقُس هم شه هِمراه بَوِردِنه تا وِشونِ کُمِک هاکانه.

⁶ وِشون تِمومِ جزیره ره بَگِردِسِنه تا پافوسِ شَهر بَرِسینه. اونجه یِتا یَهودی مَردی که وه اسم بارْ‌یِشوع بییه ره بَدینه، که دِراغی پِیغَمبِر و جادوگر بییه.

⁷ وه رومِ فرموندار ’سِرگیوس پولُسِ‘ رَفِق بییه. فَرموندار که عاقلِ مَردی بییه، بَرنابا و شائولِ شه ‌پَلی دَعوِت هاکارده، چوون خواسه خِدائه کِلامِ بِشنُئه.

⁸ ولی اون جادوگر - که وه اسم مَعنی عالم بییه- وِشونِ هِمراه مخالفت هاکارده و تَقِلّا کارده نییِله فرموندار ایمون بیاره.

⁹ ولی شائول، که وه ره پولُس هم گاتِنه، روح القدسِ جِم پِر بَییه، اون مَردیِ چشِ دِله ره هارِشیه و بااوته:

¹⁰ «تِ ای ابلیسِ وَچه، تِ ای تِمومِ خواری هائه دِشمِن، ای که مَکر و فریبِ جِم پِری! اینِ جِم که خِداوندِ راستِ راه ها ره وَل هاکانی، دَس نَکِشِنی؟

¹¹ بَدون که خِداوندِ دَس، تِ بَزوئِنِ وِسه تِ سَرِ وَر دَره. اِسا کور بونی و تا چَن وَخت اِفتابِ نَویندی.» دَرجا، وه چِشا تیره و تار بَییه، شه دور چَرخ گِته و یه نَفِرِ دِمبال گِردِسه که وه دَسِ بَیره و راهِ وه ره سِراغ هاده.

¹² وَختی فَرموندار این جَریانِ بَدیئه، ایمون بیارده، چوون تعلیمی که خِداوندِ خَوِری دانهِ جِم بِهت هاکارده بییه.

پولُس و بَرنابا اَنطاکیهِ دِله

¹³ پولُس و وه هَمراهون دریائه راهِ جِم، از پافوس، پِرجه بوردِنه که پامفیلیهِ مَنطقهِ دِله بییه. ولی اونجه یوحنائه معروف به مرقس وِشونِ جِم سیوا بَییه و اورشَلیم بَردَگِردِسه.

¹⁴ ولی وِشون پِرجهِ جِم رَد بَینه و اَنطاکیهِ پیسیدیهِ مَنطقه بَرِسینه. مِقدَّسِ شَنبهِ روز، عِبادَتگاهِ دِله بییَمونه و هِنیشتِنه.

¹⁵ بعد از اینکه تورات و پِیغَمبِرونِ نوِشته ره بَخوندِسِنه، عِبادَتگاهِ رَئیسون وِشونِ وِسه پیغوم بَفرِسینه و بااوتِنه: «بِرارون، اگه گبی دارنِنی که مَردِمِ تَشویق کانده، بارین.»

¹⁶ پولُس اِیست هاکارده و دَسِ هِمراه اشاره هاکارده، بااوته: «ای یهودی مَردِم و شِما اِی خِداترسون، گوش هادین!

¹⁷ این یَهودِ قومِ خِدا، اَمه پییِرونِ انتخاب هاکارده و اَمه قومِ اون مووقه ای که وِشون مصرِ مِلکِ دِله غَریب بینه ره سَر بِلِند هاکارده و قِوَّتِ هِمراه وِشونِ اون مِلکِ جِم بیرون بیارده،

¹⁸ و نَزیکِ چهل سال صَحرائه دِله وِشونِ تِحَمُّل هاکارده.

¹⁹ وه بعد از اینکه هفتا قومِ که کَنعان دِله دَینه ره از بین بَوِرده اونائه مِلکِ، وِشونِ اِرثیه هِدا.

²⁰ این جریان حدود چهار صد و پنجاه سال طول بَکِشیه. «بعد از اون خِدا، تا سَموئیلِ پِیغَمبِرِ دوره، داوَرونِ وِشونِ هِدا.

²¹ بعد وِشون یِتا پادشاه بَخواسِنه و خِدا، شائول، قِیسِ ریکا، بِنیامینِ قَبیلهِ جِمِ وِشونِ هِدا، که چِهل سال حکومت هاکارده.

²² بعد از این که شائول برکِنار بَییه، داوودِ انتخاب هاکارده تا وِشونِ پادشاه بَووه، و وه خَوِری شِهادت هِدا و بااوته: مِن داوود یِسیِ ریکا ره مَردی بَدیمه که خَله مِ دِل نیشِنه؛ وه تِمومِ مِ خواسه ره به‌جا یارنه.“

²³ «خِدا طِبق شه وَعده، این مَردیِ نَسلِ جِم یَهودِ قومِ وِسه یِتا نِجات دَهنده یعنی عیسی ره بیارده.

²⁴ قبل از اینکه عیسی بیِّه، یحیی، تِمومِ یَهودِ مَردِمِ وِسه تووبهِ غسلِ تعمیدِ اِعلام کارده.

²⁵ وَختی یحیی شه خِدمِتِ تموم کارده، بااوته: ”مِ ره کی دوندِنی؟ مِن وه نیمِه؛ بلکه وه بعد از مِن اِنه و مِن حَتّی لایق نیمِه وه کوشِ بَندِ واز هاکانِم.“

²⁶ «ای بِرارون، ای ابراهیمِ وَچونِ نَسل، و ای خِداترسونی که شِمه میون دَرِنه! این نِجاتِ پِیغوم، اَمه وسه بَفرِسی بَییه.

²⁷ چوون اورشَلیمِ مَردِم و وِشونِ گَت گَتِ، عیسی ره نِشناسینه و پیغمبِرونِ بااوته ها ره که هر مِقدَّسِ شنبه وِشونِ وِسه بَخوندِسه بونِسه ره نِفَهمِسِنه. وِشون وه مَحکوم هاکاردِنِ هِمراه پِیغَمبِرونِ بااوته ها ره به انجام بَرِسانینه.

²⁸ با اینکه وِشون هیچ دَلیلی، وه بَکوشتِنِ وِسه پی دا نکاردِنه، پیلاتُسِ جِم بَخواسِنه وه ره اِعدام هاکانه.

²⁹ و وَختی تِموم اونچی ره که وه خَوِری بَنوِشته بَییه بییه ره اِنجام هِدانه، وه ره صلیبِ جِم جِر بیاردِنه، مَقبَره دِله بییِشتِنه.

³⁰ ولی خِدا وه ره مِرده هائه جِم زِنده هاکارده.

³¹ خَله روزا عیسی شه ره اونایی وِسه که وه هِمراه جَلیلِ جِم اورشَلیم بییَمو بینه، ظاهر هاکارده که اَلانِم وِشون، قومِ وِسه وه شاهِدونِنه.

³² «اِسا اِما این خَوِرِ خِشِ شِما ره دِمبی که خِدا اونچی که اَمه پییِرونِ وَعده هِدا بییه ره،

³³ عیسیِ زنده هاکاردِنِ هِمراه، اَمه وِسه که وه وَچونِمی وفا هاکارده. هَمون‌طی که دِوّمین مزمورِ دِله بَنوِشته بَییه: ”تِ مِ ریکائی؛ اَمروز، مِن تِ ره مولود هاکاردِمه.“

³⁴ «خِدا وه ره مِرده هائه جِم زِنده هاکارده تا دییه فِسادِ بَرنَگِرده، خِدا این طی بااوته: «‌”مِن مِقَدَّس و مطمئنِ برکاتِ که داوودِ وَعده هِدا بَییه، شِما ره دِمبه.“

³⁵ و همین طی هم یِتا دییه مزمورِ دِله گانه: «تِ نییِلنی تِ مِقَدَّس، فسادِ بَوینه.“

³⁶ «داوود بعد از اون که خِدائه ارادهِ هِمراه شه دورهِ مَردِمِ خِدمِت هاکارده، بَمرده و شه اَجدادِ مِلحق بَییه و فسادِ بَدیئه.

³⁷ ولی اونی که خِدا وه ره زنده هاکارده، فِسادِ نَدیئه.

³⁸ «پَس، ای بِرارون، بَدونین که این مَردیِ طریق گِناهونِ آمِرزش شِما ره اِعلام بونه.

³⁹ اِسا هر کی عیسی ره ایمون بیاره، وه تِوَسُط صالح بِشمارِسه بونه، هر اونچیِ دِله که نَتونِسینی موسیِ شَریعَت تِوَسُط صالح بِشمارِسه بَوّین.

⁴⁰ پَس مواظب بوئین پیغمبِرونِ این بَنوِشته شِمه سَر نَییه که گانه:

⁴¹ «هارِشین، ای کِسایی که مسخره کاندینی، بِهت هاکانین و نابود بَووین، چوون شِمه روزگارِ دِله کاری کامبه، که هر چی اونِ شِمه وِسه تَعریف هاکانِن هیچ وَخت باوِر نَکاندِنی.“

⁴² وَختی پولُس و بَرنابا عِبادَتگاهِ جِم بیرون شینه، مَردِم وِشونِ جِم خواهش هاکاردِنه که شنبه بعدی هم این جَریانِ خَوِری وِشونِ وِسه گَب بَزِنِن.

⁴³ بَعدِ از اینکه جَمیِّت، عِبادَتگاهِ جِم بوردِنه، یَته خَله یَهودیون و اون خداپَرِسِ مَردِم که یَهودی بَییه بینه، پولُس و بَرنابائه دِمبال راه دَکِتِنه. پولُس و بَرنابا این دَسهِ هِمراه گَب بَزونه و وِشونِ تَشویق کاردنه که خِدائه فِیضِ دِله اِدامه هادِن.

⁴⁴ شنبه بعدی، حِدوداً، تِمومِ شَهرِ مَردِم جَمع بَینه تا خِداوندِ کِلامِ بشنُئِن.

⁴⁵ ولی وَختی یَهودیون جَمیِّتِ ها ره بَدینه، حَسودیِ جِم پِر بَینه و بی‌ حِرمتیِ هِمراه هر چی پولُس گاته ره مخالفت هاکاردِنه.

⁴⁶ اون وَخت پولُس و بَرنابا جرأتِ هِمراه بااوتِنه: «لازم بییه خِدائه کِلام قبل از همه شِمه وِسه بااوته بَووه. ولی وَختی اونِ رد هاکاردینی و شه ره اَبدی زندگیِ لایق نَدونِسینی، پَس اَلان اِما غیریهودیونِ سَمت شومبی.

⁴⁷ چوون خِداوند اِما ره این طی بااوته که: ”مِن تِ ره غیر یَهودیونِ وِسه نور بِساتِمه، تا نِجاتِ دِنیائه چهار سوک بَرِسونی. “

⁴⁸ وَختی غیرِ یَهودیون اینِ بِشنُسِنه، خِشال بَینه و خِداوندِ کِلامِ حِرمت بییِشتِنه؛ و اونایی که اَبدی زندگی وِسه انتخاب بَییه بینه، ایمون بیاردِنه.

⁴⁹ این طی خِداوندِ کِلام تِمومِ اون مَنطقهِ دِله دَپیته.

⁵⁰ ولی یَهودیون، متعصب و سَرشناس زَن ها و شَهرِ مَردا که رَهبِر بینه ره تحریک هاکاردِنه و وِشون، پولُس و بَرنابا ره آزار اذیّت هاکاردِنه. پَس پولُس و بَرنابا ره اون مَنطقهِ جِم بیرون هاکاردِنه.

⁵¹ وِشون هم اون شَهرِ خاکِ شه لینگائه جِم، بَتِکاندینه و قونیهِ شَهر بُوردِنه.

⁵² شاگِردون روح القدس و خِشالیِ جِم پِر بینه.