دوم تیموتائوس 3 - کتاب مقدس به زبان مازندرانی - گویش شرقی

آخِرین روزا

¹ ولی اینِ بَدون که آخِرین روزائه دِله، سختِ روزگاری اِنه.

² چوون مَردِم خود شیفته، پولدوس، مَغرور، متکبّر، ناسزاگو، شه پییِر مارِ جِم اِطاعت نَکاندِنه، ناشِکر، ناپاک،

³ بی‌عاطفه، کینه ای، تِهمت زَن، بی‌بندِبار، وحشی، خواریِ دِشمِن،

⁴ خیانتکار، بی ملاحظه و غرور وِشونِ بَییته. که عیاشی ره خِدائه جِم ویشتر دوس دارنِنه

⁵ ظاهراً دیندارِنه، ولی اونِ قِوَّتِ انکار کاندِنه. این طی آدِمائه جِم دوری هاکانین.

⁶ چوون وِشونِ میون کِسایی دَرِنه که مَردِمِ سِره دِله راه پی دا کاندِنه، بی عَقلِ زَن ها ره اسیر کاندِنه، که گِناهونِ بارِ بِن دِلا بَینه و جورواجورِ هِوا و هَوِس، وِشونِ هر طَرِف کَشِنه،

⁷ این زَن ها هَمِش تَعلیم گِرنِنه، ولی هیچ وَخت نَتوندِنه حَییقَتِ بِشناسِن.

⁸ هَمون‌ طی که یَنّیس و یَمْبْریس موسیِ هِمراه مخالفت هاکاردِنه، این مردها هم که وِشونِ فکر خِرابِ و وِشونِ ایمون رَدِّ، حَییقَتِ هِمراه مخالفت کاندِنه.

⁹ ولی وِشون به جایی نَرِسِنِنه، چوون وِشونِ نادونی تِمومِ مَردِمِ وِسه دیار بونه، هَمون طی که اون دِ تا آدِمِ نادونی هم برمِلا بَییه.

تِمومِ مِقدَّسِ نوشته ها خِدائه الهامِ

¹⁰ ولی تِ، مِ تَعلیم و مِ رِفتار و مِ هدف و مِ ایمون و مِ صَبر و مِ مِحَبَّت و مِ طاقتِ از نزدیک شاهد بیئی

¹¹ و اون رَنج و آزار اذیّتی که اَنطاکیه، قونیه و لِستْرهِ شهرهائه دِله مِ سَر بییَمو و اون رَنج و آزار اذیّتیِ که طاقت بیاردِمه، ولی خِداوند تِمومِ این چیائه جِم نِجات هِدا.

¹² راس راسی، تِمومِ اونایی که بِخوائِن مَسیحْ عیسیِ دِله دینداریِ هِمراه زندگی هاکانِن، عِذاب کَشِنِنه؛

¹³ ولی شَرورِ آدِمون و شیّادون بدیِ دِله بَدتِر بونِنه؛ گول زَندِنه و گول خوارنِنه.

¹⁴ ولی تِ اونچیِ دِله که یاد بَییتی و اونِ ایمون بیاردی پابرجا باش، چوون دوندی اونا ره کیا جِم یاد بَییتی،

¹⁵ و چی طی از وَچِگی مِقدَّسِ نوِشته ها ره دونِسی که تونده تِ ره حِکمت هاده و ایمونِ طریق که مَسیحْ عیسیِ دِله دَره، نِجاتِ بَرِسه.

¹⁶ تِمومِ مقدّسِ نوشته ها خِدائه الهامِ، و تَعلیم و سَراکو و اِصلاح و تربیتِ وِسه، صالحیِ دِله فایده دارنه،

¹⁷ تا مَردِ خِدا کامل بَووه و هر خوارِ کارِ وِسه آماده.