اول تیموتائوس 5 - کتاب مقدس به زبان مازندرانی - گویش شرقی

تَعلیم ها، کلیسائه وِسه

¹ پیرِمَردی ره سَراکو نَکِن، بلکه وه ره شه پییِرِ واری تَشویق هاکان، و جوونون هم شه بِرارون واری،

² و پیرِ زَن ها ره مارائه واری، و جِوونِ زَن ها ره شه خواخِرونِ واری، تِمومِ پاکیِ دِله.

³ بیوه‌زَن ها ره اگه راس راسی بی‌کسِنه، حِرمت بییِل.

⁴ ولی اگه یِتا بیوه‌زِنا وَچون و نوِئون دارنه، وِشون اَوِّل وِنه یاد بَیرِن که شه خانِوادهِ مِواظِبت هاکاردِنِ هِمراه، شه دینداری ره سِراغ هادِن و این‌طی شه دِینِ، شه پییِر مار و شه اَجدادِ وِسه به جا بیارِن، چوون این خِدا ره راضی کانده.

⁵ اونی که راس راسی بیوه و بی‌کسِ، خِدا ره امید دارنه و شو و روز دِعائه دِله و خِدائه کُمِک بَییتِنِ جِم مشغولِ.

⁶ ولی اگه یِتا بیوه‌زِنا عیاشیِ دِله زندگی کانده، با اینکه زندئه، بَمِرده.

⁷ این چیا ره هم حِکم هاکان، تا وِشونِ زندگیِ دِله هیچی دَنی بوئه که اونِ وِسه سَرکوفت بَخُرِن.

⁸ ولی اگه یه نَفِر شه فامیلون، مخصوصاً شه خانِوادهِ احتیاجاتِ دِمبال دَنی بوئه، شه ایمونِ انکار کانده و یِتا بی ایمونِ جِم بَد‌تِرِ.

⁹ فِقَط اون بیوه‌زَن هائه اسمِ بَنویس که شصت سالِ جِم ویشتَرِنه و اَت کَش شی هاکارده بوئن.

¹⁰ و خوارِ کارائه اِنجام هِدائِنِ دِله معروف بوئه، یعنی شه وَچونِ گَت هاکارده بوئه، غریب‌نواز بوئه، مقدّسینِ لینگا ره بَشُسه بوئه، دَردمَندون جِم مِراقبت هاکارده بوئه، و شه ره هر جور خوارِ کارِ وِسه وَقف هاکارده بوئه.

¹¹ ولی جوون ترِ بیوه‌زَن هائه اسمِ نَنویس، چوون وَختی که وِشونِ هِوا و هَوس، وِشونِ مَسیحِ جِم دور هاکانه، خوانِنه شی هاکانِن.

¹² اینِ وِسه، مَحکوم بونِنه چوون شه اَوِّلین ایمونِ لینگِ بِن بییِشتِنه.

¹³ به علاوه، وِشون تَنبلی ره یاد گِرنِنه، این سِره اون سِره شونِنه؛ نا فِقَط تنبلی، بلکه تِتِک بتِک گر و فضولِ بونِنه، و اون چیایی که نَوِسه بارِنِ گانِنه.

¹⁴ پَس مِ نَظِر اینِ که جوونترِ بیوه‌ زَن ها، شی هاکانِن، وَچه بیارِن و خانه داری هاکانِن و دِشمِنِ فرصت نَدِن که تِهمت بَزِنه.

¹⁵ چوون اَلان هم بَعضیا شیطانِ دِمبال بوردِنه و گمراه بَینه.

¹⁶ اگه یِتا ایموندارِ زِنا، شه فامیلونِ دِله بیوه داره، وِنه شه وِشونِ کُمِک هاکانه تا کلیسائه سَر بار نَبوئِن و کلیسا بَتونه اون بیوه‌زن هایی ره کُمِک هاکانه که راس راسی بی‌کَسِنه.

¹⁷ مشایخی که خوار رهبری هاکارده بوئِن، دِ بِرابر حِرمتِ لیاقت دارنِنه، مخصوصاً اونایی که موعظه و تعلیمِ وِسه زَحمِت کَشِنِنه.

¹⁸ چوون توراتِ کتابِ دِله گانه: «گویی که دَره خَرمن کاندهِ دِهونِ نَوِند» و «کارگر وِنه شه دَسمِزِ بَیره.»

¹⁹ هیچ تِهمتیِ کلیسائه یِتا از رهبرونِ علیه قبول نَکِن، مگه اینکه دِ یا سه تا شاهد دَووِه.

²⁰ اونایی که گِناهِ دِله پافِشاری کاندِنه ره، همهِ پَلی سَراکو هاکان تا بَقیه بَتِرسِن.

²¹ خِدا و مَسیحْ عیسی و اِنتخاب بَییه فرشته هائه حِضور، تِ جِم خواهش کامبه که این قانونا ره بدونِ هیچ غرضی، رعایت هاکانی و هیچ کاری ره طَرِفداریِ سَر نَکِنی.

²² اینِ وِسه که یه نَفِرِ خِدمِتِ تعیین هاکانی، عجله نَکِن و بَقیهِ گِناهونِ دِله شَریک نَواش، شه ره پاک دار.

²³ دییه فِقَط اوه نَخور، بلکه شه مِعده و شه ناخِشیهایی که هَمش دارنیِ وِسه اَت کم شِراب بَخور.

²⁴ بَعضی آدِمونِ گِناهون دیارِ و پیش پیش داوِری بَیِّنِ وِسه شونِنه، ولی بَقیه آدِمونِ گِناهون دیرتر دیار بونه.

²⁵ پَس خوارِ کارا هم مَعلومِ و حَتَّی اونایی که مَعلوم نییه ره نَوونه جا هِدا داشت.