اول تیموتائوس 4 - کتاب مقدس به زبان مازندرانی - گویش شرقی

بعضیا ایمونِ جِم بَرگِردِنِنه

¹ ولی خِدائه روح، واضح گانه که آخِرین زِمون هائه دِله، بَعضیا شه ره اون روح ها که گول زَندِنه و دِوهائه تعالیمِ، وَقف کاندِنه و ایمونِ جِم بَرگِردِنِنه،

² دِراغ زَن ها و دِرویونی این طی تعالیمِ یارنِنه که وِشونِ وِجدان بَمِرده.

³ وِشون، آروسی هاکاردِنِ مَنع کاندِنه و دَستور دِنِنه اون غِذاهایی ره نَخُرِن که خِدا خلق هاکارده تا اونایی که حَییقَتِ ایمون دارنِنه و اونِ اِشناسِنِنه، شِکر هاکاردِنِ هِمراه غِذا هائه جِم بَخُرِن.

⁴ چوون هر چی که خِدا خَلق هاکارده، خوارِ و هیچی ره نَوِسه رَد هاکاردِن، اگه شِکر هاکاردِنِ هِمراه قبول بَووه،

⁵ چوون که خِدائه کِلام و دِعائه هِمراه تَقدیس بونه.

⁶ اگه این چیا ره بِرارونِ یاد هادی، مَسیحْ عیسیِ نوکِر بونی، که ایمونِ کِلامِ دِله و خوارِ تَعلیم که اونِ دِمبال دَری تَربیت بونی.

⁷ داستان هائه جِم که کفر آمیز و پوچِ شه ره دور دار، بلکه شه ره دینداریِ وِسه تربیت هاکان.

⁸ چوون هر چَن تربیت هاکاردِن اَت کم تَنِ وِسه فایده‌ دارنه، ولی دینداری همه چیِ وِسه فایده دارنه، چوون هم این زندگی ره وَعده دِنه، هم زندگی ای که اِنه ره.

⁹ این گَبِ بونه اِطمینان هاکاردِن و هر بابتِ جِم کاملاً قابلِ قبولِ

¹⁰ چوون اِما اینِ وِسه زَحمِت کَشِمبی و تَقِلّا کامبی، چوون اِما شه امیدِ، زنده خِدائه سَر بییِشتیمی که تِمومِ آدِمونِ نجات‌دهنده ئه، بخصوص اونایی که ایمون دارنِنه.

¹¹ این چیا ره حِکم هاکان و تَعلیم هاده.

¹² نییِل تِ جَوونی ره هیچ‌کی کِچیک بِشماره، بلکه گَب بَزوئِنِ دِله، کِردارِ دِله، مِحبّتِ دِله، ایمونِ دِله و پاکیِ دِله، تِمومِ ایموندارونِ وِسه سرمخش باش.

¹³ تا مِن بِیِّم، شه ره اینِ وَقف هاکان که خِدائه کِلامِ مَردِمِ وِسه بَخونی و وِشونِ تَشویق هاکانی و تعلیم هادی.

¹⁴ اون عَطایی که تِ دِله دَره ره بی‌اعتنایی نَکِن، عَطایی که نَبِوّتِ هِمراه به دَس بیاردی، اون مووقه که مَشایخِ شورا تِ سَر دَس بییِشتِنه.

¹⁵ این چیا ره اِنجام هاده و شه ره اونِ وَقف هاکان تا تِ تَرقی همه وِسه مَعلوم بَووه.

¹⁶ خوار تِ حِواس، شه ره و اون تعلیمی که دِنی ره، بوئه. اینِ دِله پابرجا باش، چوون این کارِ هِمراه هم شه ره و هم اونایی که تِ گَبِ اِشنُنِنه ره نِجات دِنی.