اول تیموتائوس 3 - کتاب مقدس به زبان مازندرانی - گویش شرقی

کلیسائه ناظِرون و شماسون

¹ این گَبِ بونه اِعتماد هاکاردِن: که اگه یه نَفِر آرزو داره که کلیسائه نظارتِ کارِ داره، خوارِ کارِ دِمبال دَره.

² پَس، یِتا ناظِر وِنه هیچی وه زندگیِ دِله دَنی بوئه که اونِ خاطِری سَرکوفت بَخُره، یِتا زِنا داره، هوشیار بوئه شه دَمِ داره، با آبِرو بوئه، مِهمون‌ دوس بوئه و بَتونه تَعلیم هاده؛

³ نا عرِق خوار، نا زورگو، بلکه آروم بوئه؛ و نا جَنگی، یا پولدوس.

⁴ وه وِنه شه خانِواده ره خوار بَچِرخونه و شه وَچونِ جوری بار بیاره که تِمومِ احترامِ هِمراه وه جِم اِطاعت هاکنِن.

⁵ چوون اگه کِسی نَدونه که چی طی وِنه شه خانِواده ره بَچِرخونه، چی طی تونده خِدائه کلیسائه مِراقب بوئه؟

⁶ و تازه ایمون نیارده بوئه، نَکِنه مَغرور بَووه و اِبلیسِ واری مَحکوم بَووه.

⁷ به علاوه، وه وِنه اون مَردمی میون که کلیسائه بیرون دَرِنه هم، خِشنوم بوئه تا رِسوا نَووه و اِبلیسِ تَله نَکِفه.

⁸ همین طی کلیسائه شماسون وِنه باوقار بوئِن؛ دِ رو نَبوئِن، شِرابِ گرفتار نَبوئِن و نادِرِسِ سودِ حِرصِ نَزِنِن.

⁹ وِشون وِنه ایمونِ رازِ، یِتا پاکِ وجدانِ هِمراه دارِن.

¹⁰ و وِشون وِنه اَوِّل آزمود بَووِن و بعد اگه ثابت هاکاردِنه که بی عیبِنه، بییِلین شَماسیِ کارِ دِله خِدمِت هاکانِن.

¹¹ همین‌ طی، وِشونِ زَن ها هم وِنه باوقار بوئِن، تِهمت نَزِنِن، بلکه هوشیار بوئِن و همه چیِ دِله وِفادار بوئِن.

¹² هر کِدوم از شَماسوِن، وِنه یِتا زِنا داره و شه وَچون و خانِواده ره خوار بَچِرخونه

¹³ چوون اونایی که شِماسونِ مقامِ دِله که خوار خِدمِت هاکارده بوئِن، یِتا خوارِ مقام گِرنِنه و اون ایمونِ دِله که مَسیحْ عیسیِ دِله ئه، گَتِ اِطمینان به دَس یارنِنه.

¹⁴ امید دارمه که خَله زود تِ پَلی بِیِّم، ولی اینا ره تِ وِسه نِویسِمبه،

¹⁵ تا اگه مِ بییَموئِن عَقِب دَکِته، بَدونی که خِدائه خانوادهِ میون که زِنده خِدائه کلیسا و حَییقَتِ سِتون و پِی هَسه، چی طی وِنه رِفتار هاکارد.

¹⁶ راس راسی که دینداریِ راز خَله گَتِ: وه که جِسمِ دِله ظاهر بَییه، خِدائه روحِ طَریقِ جِم تایید بَییه، فرشته ها وه ره بَدینه، قومهائه میون اِعلام بَییه، دِنیائه دِله وه ره ایمون بیاردِنه، جِلالِ هِمراه، بالا، بَوِرده بَییه.