اول تیموتائوس 2 - کتاب مقدس به زبان مازندرانی - گویش شرقی

همه ره دِعا هاکانین

¹ پَس، قبل از هر چی، خوامبه که خواسه ها، دِعاها، شفاعتها و شِکر هاکاردِن ها تِمومِ مَردِمِ وِسه به‌جا بیارده بَووه،

² پادشاهون و صاحاب منصبون وِسه، تا بَتونیم آرووم و راحت زندگی داریم. که هر لحاظِ جِم دیندار و وقارِ هِمراه بوئه

³ این اَمه نِجات دَهِنده خِدائه نَظِر، خوار و وه بابِ دِلِ

⁴ که خوانه همهِ مَردِم نِجات بَیرِن و حَییقَتِ بِشناسِن.

⁵ چوون فِقَط یِتا خِدا دَره و خِدا و آدِمون میون هم فِقَط یِتا واسطه دره، یعنی اون انسان که مَسیحْ عیسی ئه؛

⁶ وه که شه جانِ هِدائِنِ هِمراه، تِمومِ آدِمونِ آزادی ره بَخریه. این حَییقَت خوارِ وَخت شهِادت هِدا بَییه،

⁷ چوون مِن اینِ وِسه تعیین بَیمه تا غیرِ یَهودیونِ وِسه یِتا تَعلیم دَهنده و یِتا رسول و یِتا مَلِّم، ایمون و حَییقَتِ دِله بوئِم - حَییقَتِ دَره گامبه و دِراغ نَزِمبه.

⁸ پَس مِ آرزو اینِ که مَردها همه جا دِعا هاکانِن، و مِقدَّسِ دَسا ره بی غیظ و دَعوا مرافعه بالا بَوِرِن.

⁹ همین طیم خوامبه که زَن ها آبرومندانه لِواس شه تَن دَکُنِن و نجابت و حیائه هِمراه، نا گیس هاکارده میِ هِمراه، یا طِلا و مِروارید، یا گِرون قیمت لِواسائه هِمراه،

¹⁰ بلکه خوارِ کارائه هِمراه، هَمون طی که اون زَن هائه لایقِ که دینداریِ ادعا ره دارنِنه.

¹¹ زِنا وِنه ساکت بوئه و کاملِ اطاعتِ هِمراه تَعلیم بَیره.

¹² مِن نییِلمه که یِتا زَن تَعلیم هاده یا یِتا مَردِ سَر تِسلّط داره؛ بلکه وِنه ساکت بوئه.

¹³ چوون آدِم، اَوِّل خَلق بَییه و بعد حوا.

¹⁴ و آدِم گول نَخورده، بلکه زَن بییه که گول بَخُرده و نافرمون بَییه.

¹⁵ ولی زَن، وچه بیاردِنِ هِمراه، نِجات گِرنه، اگه ایمون و مِحَبَّت و مِقَدَّس بییَنِ دِله، نجابتِ هِمراه بَمونه.