तीतूस 3 - नुवो नेम (मेवड़ी नया नियम)

मसी को चालचलन

¹ थूँ मनकाँ ने आद अवाड़ के, राज करबावाळा अन अदिकारी को क्यो माने। अन हरेक तरियाँ का भला काम करबा का वाते त्यार रेवो।

² वाँने केज्ये के, वीं किंकई का बारा में बुरो ने बोले, पण हाराई का हाते हव वेवार राकन हली-मलीन सान्तीऊँ रेवे।

³ काँके मसी ने मानबाऊँ पेल्याँ आपाँ भी बना ग्यान का, केणो ने मानबावाळा, भटक्या तका अन हरेक तरियाँ की मो-माया का गुलाम हाँ। आपणो जीवन बुरई अन मेपणाऊँ भरियो हे। अन आपाँ एक-दूजाऊँ दसमणी राकता हाँ।

⁴ पण आपाँने बंचाबावाळा परमेसर की करपा अन परेम मनक का वाते परगट करियो ग्यो,

⁵ यो ईं वाते ने व्यो के, आपाँ धरम का काम कररिया हा, पण आ वाँकी करपाइस ही के, वो आपाँने पुवितर आत्मा का आड़ीऊँ बंचावे, ज्या आपाँने धोन नुवो जनम अन नुवो जीवन देवे हे।

⁶ परमेसर आपाँने छुड़ाबावाळा ईसू मसी का आड़ीऊँ आपणाँ पे भरपुरीऊँ पुवितर आत्मा देवे हे।

⁷ वीं करपाऊँईस आपाँ परमेसर का हामे सई ठेरा हा, जणीऊँ कदी ने खतम वेबावाळा जीवन का वारिस वेवा, जिंकी आपाँ आस राका हाँ।

⁸ आ हाँची बात हे। मूँ छावूँ हूँ के, अणी मामला में थूँ खासतोर जोर देन के, जणीऊँ परमेसर पे विस्वास करबावाळा भला काम करता रेवे। ईं बाताँ मनकाँ का वाते हव अन नफा की हे।

⁹ बेकार की बाताँऊँ, वंसावल्या की गणतीऊँ, लड़ई-जगड़ाऊँ अन नेमा का बारा में लड़बाऊँ बंचन रेवो, काँके ईं बाताँ बेकार अन बना मतलब की हे।

¹⁰ फुट नाकबावाळा मनकाँ ने चेता अन जद्याँ वो एक दाण में ने माने तो वाँने दूजी दाण का चेता तद्याँ वीं दूजी दाण भी ने माने, तो वाँकाऊँ अलग वेजा।

¹¹ थूँ ओ जाणे हे के, अस्यान का मनक हाँचऊँ भटकग्या हे अन वाँका पाप वाँने गलत साबत करे हे।

आकरी हिकावण

¹² जद्याँ मूँ अरतिमास कन तुखिकुस ने थाँरा नके खन्दाऊँ। अन वाँके पूगताई थूँ फटाकऊँ मारा नके निकुपुलिस नगर में अई जाज्ये, काँके हियाळा-हियाळा में वटेईस रेवा की मनसा किदी हे।

¹³ थूँ वकील जेनास अन अपुलोस का हाते वाँका यातरा का वाते जरूत की चिजाँ बांद दिज्ये, जणीऊँ वाँने कणी भी बात की गटी-कमी ने वेवे।

¹⁴ आपणाँ मनकाँ ने दूजाँ की जरूत पुरी करबा का वाते, पूरा मनऊँ हव काम करबा में टेम बिताणो छावे, अन वाँने बेकार को जीवन ने जीवणो छावे।

¹⁵ मारा हण्डाळ्याँ का आड़ीऊँ थने नमस्कार लिकूँ हूँ। विस्वास में वेबाऊँ जीं भई आपणाँऊँ परेम राके हे, वाँने माँकी आड़ीऊँ नमस्कार केज्ये। परमेसर की दया थाँ हाराई पे बणी तकी रेवे।