रोमियों 6 - नुवो नेम (मेवड़ी नया नियम)

पाप का वाते मरणो अन मसी का वाते जीवणो

¹ तो पछे आपाँ कई केवाँ? कई आपाँ पाप करता रेवा, ताँके परमेसर की दया बड़ती रेवे?

² कदी ने, आपाँ ज्यो पाप का वाते मरग्या हा, तो पाप में कस्यान जीवाँ?

³ कई थाँ ने जाणो हो आपाँ, ज्यो ईसू मसी में बतिस्मो लिदो हे, वींकी मोत कोईस बतिस्मो लिदो हे।

⁴ तो वींकी मोत को बतिस्मो लेबाऊँ आपाँ भी वींके हातेईस गाड़्या ग्या हा, ताँके जस्यान परमेसर की मेमा की तागत का मस मसी ने मरिया तकाऊँ जिवाया हा वस्यानीस आपाँ भी एक नुवो जीवन जीवाँ।

⁵ यद्याँ आपाँ वींके जस्यान की मोत में वींके हाते एक वेग्या हा, तो वींके पाच्छा जीव उठबा में भी वींके हाते एक वे जावाँ।

⁶ काँके आपाँ ओ जाणा हा के, आपाँ आपणो पुराणो जीवन ईसू का हाते हूळी पे चढा दिदो हो, ताँके पापऊँ भरी आपणी देह नास वे जावे। अन आपाँ आगे पाप का दास ने बण्या रे सका।

⁷ काँके ज्यो मरग्यो, वींने पापऊँ छुटकारो मलग्यो हे।

⁸ अन यद्याँ आपाँ मसी का हाते मरग्या, तो आपणो विस्वास हे के, आपाँ वींके हाते जीवाँ भी।

⁹ आपाँ जाणा हा के, मसी जिंने मरिया तकाऊँ जिवायो ग्यो हो, वो पाछो कदी ने मरी हे। अन वींपे मोत को ज्योर कदी ने चाली।

¹⁰ ज्या मोत वो मरियो हो, वाँका पाप का वाते एक दाण हे, पण अबे जस्यान को जीवन वो जीरियो हे वो परमेसर का वाते जीरियो हे।

¹¹ अस्यान थाँ थाँका वाते भी होचो के, थाँ भी पाप का वाते मर चुक्या हो, पण परबू ईसू मसी में परमेसर का वाते जीरिया हो।

¹² ईं वाते थाँकी नास वेबावाळी देह पे पाप की मरजी ने पुरी करबा का वाते पाप को जोर मती चालबा दो। जणीऊँ थाँ पाप की मरजी में कदी ने चालो।

¹³ थाँका देह का अंग ने अधरम का सादन वेबा वाते पाप का हाताँ में मती दिज्यो, पण मरिया तका मेंऊँ जी उटबावाळा के जस्यान परमेसर का हाताँ में दिज्यो। अन थाँकी देह का अंगा ने धारमिकता का सादन वेबा वाते परमेसर ने हूँप दो।

¹⁴ थाँका पे पाप को राज ने वेई, काँके थाँ नेमा का टेके ने जीवो हो, पण परमेसर की दया का टेके जीवो हो।

धारमिकता का दास

¹⁵ आपाँ नेमा के टेके ने हा, पण परमेसर की दया में जीवाँ हा, तो कई आपाँ करा? कई आपाँ पाप कराँ? ने कदी भी ने कराँ।

¹⁶ कई थाँने ओ ने पतो कई, जद्याँ थाँ किंका हाताँ में खुद ने दास का जस्यान हूँपो हो, तो थाँ वाँकी आग्या मानबा का वाते वाँका दास हो। तो पछे पलई थाँ पाप का दास बणो ज्यो मोत का आड़ी ले जावे हे अन पलई आग्या मानबावाळा बणो, ज्याँ थाँने धारमिकता का आड़ी लेजाई।

¹⁷ पण परमेसर को धन्नेवाद वे के, थाँ ज्यो पाप का दास वेबा पे भी थाँ वणी हिक ने मानी, ज्या थाँने हूँपी गी ही।

¹⁸ थाँने पापऊँ छुटकारो मलग्यो हे अन थाँ धारमिकता का दास बणग्या हो।

¹⁹ थाँ थाँके देह की कमजोरी का मस हाराई बाताँ ने हमज ने सको हो, ईं वाते मूँ थाँने ईं बाताँ बोलचाल की भासा में हमजारियो हूँ। पेल्याँ थाँ थाँकी देह का अंग ने असुद अन अधरम बड़ाबा का वाते एक दास का रूप काम लेता हा। पण अबे थाँ वस्यानीस थाँका देह का अंग ने दास वेबा का वाते धारमिकता का हात में हूँप दो, ज्याँ थाँने खरईपणा में ले जावे हे।

²⁰ काँके थाँ जद्याँ पाप का दास हा, तो धारमिकता को थाँका पे कुई जोर ने हो।

²¹ जणा बाताँऊँ थाँने आज हरम आवे हे वींको थाँने कई फळ मल्यो? काँके वींको आकरी फळ मोत हे।

²² पण अबे थाँने पापऊँ छुटकारो मलग्यो ग्यो हे अन परमेसर का दास बणा दिदा ग्या हो, तो ज्या खेती थाँ करिया हो, वाँ थाँने परमेसर का आड़ी खरईपणा में लेजाई। जिंको आकरी फळ अनंत जीवन हे।

²³ काँके पाप को मोल तो मोत हे पण आपणाँ परबू ईसू मसी में परमेसर को वरदान अनंत जीवन हे।