रोमियों 3 - नुवो नेम (मेवड़ी नया नियम)

¹ तो पछे यहूदी वेबा को कई नफो, अन खतना को कई मोल?

² हरेक तरियाऊँ नरोई हे, काँके हाराऊँ पेली बात परमेसर का बचन यहूदियाँ ने दिदा ग्या हे।

³ कई व्यो यद्याँ वणा मूँ थोड़ाक विस्वास जोगा ने रिया हे? तो कई वाँके विस्वास जोगा ने रेबाऊँ परमेसर विस्वास जोगो ने रेई?

⁴ कदी भी अस्यान ने वेवे, यद्याँ हाराई मनक जूटा हे, तो भी परमेसर हाँचा हे। जस्यान सास्तर में लिक्यो तको हे के, “जणीऊँ थूँ थाँरी बाताँ में धरमी वेवे अन न्याव करती टेम में थूँ जे पावे।”

⁵ पण यद्याँ आपणाँ बुरा करम परमेसर की धारमिकताने सई तरियाऊँ परगट करे हे अन अणी बात पे परमेसर आपाँ पे गुस्सो करे हे तो आपाँ कई केवा के, वीं आपणाँ हाते अन्याव करे हे। यो तो मूँ मनक का रिती पे कूँ हूँ।

⁶ कदी अस्यो ने वेई, अन यद्याँ अस्यान की बात हे, तो परमेसर दनियाँ को न्याव करबा कस्यान कर सकी।

⁷ कुई अस्यान भी के सके हे के, यद्याँ मारा जूट की वजेऊँ परमेसर को हाँच हेलो वे जावे हे अन अणीऊँ वींकी मेमा हेली परगट वेवे हे, तो पछे पापी मनक का जस्यान मूँ दण्ड के जोगो ने मान्यो जाऊँ।

⁸ तो आवो पछे आपीं बुरई करा, ताँके भलई वेवे। जस्यान माकाँ बारा में कुई बुरई करन माकाँ पे दोस लगावे हे के, आपीं अस्यान केवा हा। अस्या मनक दण्ड का जोगा हे।

कुई खरा ने हे

⁹ तो पछे कई व्यो। कई आपाँ ज्यो यहूदी हा, ज्यो यहूदी ने हे, वणाऊँ हव हा, कदी हव ने हा। काँके आपाँ यहूदी अन जीं यहूदी ने हा, वाँ दुया पे पेल्याई ओ दोस लगा चुक्या हा के, वीं हाराई पाप का वंस में हे।

¹⁰ जस्यान के सास्तर लिक्यो हे के, “कुई खरो ने, एक भी ने हे!

¹¹ कुई हमजदार ने हे, ज्यो परमेसर ने होदे हे!

¹² हाराई का हाराई परमेसर का गेलाऊँ भटकग्या हे, वीं हाराई बुरा बणग्या हे, कुई भलई करबावाळो ने हे एक भी ने हे।

¹³ वाँको मुण्डा खली तकी कबर का जस्यान हे। वीं आपणी जीबऊँ छळ-कपट करे हे। वाँका होट पे हाँप को जेर भरियो तको हे।

¹⁴ वणा को मुण्डो हराप अन कड़वापणाऊँ भरिया तको हे।

¹⁵ वीं हमेस्यान मारबा का वाते त्यार रेवे हे।

¹⁶ वाँका गेला में नास अन कळेस हे।

¹⁷ वाँने सान्ती का गेला को पतो ने हे।

¹⁸ वाँकी आक्याँ में परमेसर की दरपणी ने हे।”

¹⁹ आपाँ जाणा हे के, नेम ज्यो कई केवे हे, वाँने केवे हे ज्यो नेमा का बंस में हे। अणीऊँ हाराई का मुण्डा बन्द किदा जा सके अन हारी दनियाँ परमेसर का दण्ड के जोगी वे।

²⁰ काँके नेमा का कामाँऊँ कुई भी मनक परमेसर का हामे धरमी ने बण सके हे। काँके नेमाऊँ तो पाप की ओळकाण वेवे हे।

धारमिकता विस्वासऊँ आवे हे

²¹ पण बना नेमा के परमेसर एक मनक के कस्यान आपणाँ वाते सई बणावे हे यो अबे बतायो ग्यो हे, जिंकी गवई नेम अन परमेसर का आड़ीऊँ बोलबावाळा देवे हे।

²² हाराई विस्वास्याँ का वाते ईसू मसी में विस्वास का हाते बना भेद-भाव करिया परमेसर का आड़ीऊँ मलबावाळी धारमिकता परगट किदी गी हे।

²³ काँके हाराई पाप किदो हे अन हाराई परमेसर की मेमाऊँ छेटी हे।

²⁴ पण परमेसर का अनुगरेऊँ अन छुटकाराऊँ ज्यो ईसू मसी में हे, वीं फोकट में धरमी ठेराया ग्या हे।

²⁵ ईसू मसी की मोत पे विस्वास करबाऊँ पापाँ की मापी पाबा का वाते परमेसर ईसू मसी ने एक बलीदान का रूप में दे दिदो, ईं तरियाँ परमेसर आपणी धारमिकताने परगट किदी, काँके परमेसर समता खान मनकाँ का पेल्याँ का पापाँ को दण्ड ने दिदो अन छोड़ दिदा हा।

²⁶ ताँके वो अणी टेम में आपणी धारमिकताने परगट करे, जणीऊँ वो खुद धरमी अन ईसू में विस्वास करबावाळा ने धरमी ठेराबावाळो बणे।

²⁷ तो पछे ईंमें मेपणा की कई बात ने री। वो तो खतम वेग्यो हे। यो कस्या नेमा का मस ने अन ने कस्या कामाँ का नेमा का मस, पण यो तो विस्वास का नेमा का मस वेवे हे।

²⁸ ईं वाते अबे आपाँ ईं नतीजा पे पोछ्याँ हा के, कुई भी मनक नेमा का कामाँ के जस्यान चालन ने, पण विस्वासऊँ धरमी बण सके हे।

²⁹ कई परमेसर बेस यहूदी मनकाँ कोईस हे? कई वी ज्यो यहूदी ने हे, वाँ मनकाँ को ने हे? ने, वीं ज्यो यहूदी ने हे वाँका भी परमेसर हे।

³⁰ काँके एकीस परमेसर हे, ज्यो यहूदी ने विस्वासऊँ अन ज्यो यहूदी ने हे वाँने भी वणीस विस्वासऊँ धरमी ठेराई।

³¹ तो कई, आपाँ विस्वासऊँ नेमा ने मानणा छोड़रिया हा। कदी अस्यान ने करा हा, पण आपीं तो नेमा ने ओरी पकड़या राका हा।