रोमियों 2 - नुवो नेम (मेवड़ी नया नियम)

परमेसर को न्याव

¹ ईं वाते हे न्याव करबावाळा पलई थूँ कुई भी वे, थाँरा नके कई आळको ने हे, काँके जणी काम का वाते थूँ किंने दूजाँ ने दोसी माने हे, वणीऊँस थूँ आपणाँ खुद ने भी दोसी केवाड़े हे, काँके जणा कामाँ को थूँ न्याव करे हे वाँने थूँ खुद भी करे हे।

² अन आपाँ जाणा हा के, ज्यो मनक अस्या काम करे हे वाँको परमेसर आपणाँ हाँच का हस्याबूँ न्याव करी।

³ पण थूँ ज्यो ईं हाराई काम करबावाळा को न्याव करे हे अन थूँ खुदई ईं काम करे हे, तो थूँ कई होचे के, थूँ परमेसर का न्यावऊँ बंच जाई?

⁴ कई थूँ वींकी दया अन वींकी सेण समता अन धिरजपणा ने बेकार हमजे हे? अन कई थूँ ओ ने जाणे हे के, परमेसर की दया थने पापऊँ मन फेरवा का आड़ी ले जावे हे।

⁵ पण थाँ आपणाँ गाटा अन कदी पछतावो ने करबावाळा मन के वजेऊँ परमेसर का गुस्सा ने आपणाँ वाते त्यार कररिया हो। वो गुस्सो थाँरा पे वीं दन पड़ी जदी परमेसर को हाँचो न्याव परगट वेई।

⁶ परमेसर एक-एक ने आपणाँ करमा जस्यान फल देई।

⁷ थोड़ाक मनक ज्यो धीरजऊँ हमेस्यान भला काम करता आरिया हे अन मेमा, मान अन अनंत जीवन की खोज में हे वाँने परमेसर अनंत जीवन देई।

⁸ पण दूजाँ ज्यो हवारती हे, हाँचने कोयने माने, पण बुरई करे हे, वाँका पे परमेसर को गुस्सो अन रीस पड़ी।

⁹ हरेक मनक पे दुक अन अबकी टेम आई ज्यो बुरई का गेला पे चाले हे। पेली यहूदी मनकाँ पे अन पछे जी यहूदी ने हे वाँका पे।

¹⁰ अन ज्यो कुई भला काम करे हे, वाँने मेमा, मान अन सान्ती मली। पेली यहूदी मनकाँ ने अन पछे ज्यो यहूदी ने हे वाँने।

¹¹ काँके परमेसर किंको पकसपात ने करे हे।

¹² ईं वाते जीं बना नेमाने जाणन पाप करे, वीं बना नेमा के नास वेई, अन जीं नेमा ने जाणन पाप करे, वाँको दण्ड नेमा के जस्यान वेई।

¹³ काँके परमेसर की देकणी में नेमा ने हूणबावाळा धरमी ने हे, पण नेमा के जस्यान चालबावाळाइस धरमी ठेरिया जाई।

¹⁴ पछे जीं यहूदी ने हे, ज्याँका नके नेम ने हे, तद्याँ भी वीं आपणाँ वेवारऊँ नेमा की बाताँ पे चाले हे, तो नेम वाँका नके ने वेबा पे भी वाँका वाते वीं खुदई नेम वेई।

¹⁵ वीं आपणाँ कामऊँ यो बतावे हे के, नेम वाँके काळजा की कोर पे लिक्या तका हे। अन वाँकी अंतर-आत्मा ईं बात की गवई देवे हे। अन वाँका बच्यार वाँने कदी अपरादी बतावे हे अन कदी निरदोस बतावे हे।

¹⁶ ईं बाताँ वणी दन वेई जद्याँ परमेसर मूँ हूँणऊँ वीं हव हमच्यार का जस्यान ईसू मसीऊँ मनकाँ के छाने की बाताँ को न्याव करी।

यहूदी अन नेम

¹⁷ थूँ खुद ने यहूदी माने हे अन नेमा पे विस्वास करे हे अन परमेसर की वजेऊँ मेपणो करे हे,

¹⁸ अन थूँ परमेसर की मरजी जाणे हे अन हव बाताँ की हामी भरे हे, काँके नेमाऊँ थने हिकायो ग्यो हे।

¹⁹ थूँ ओ माने हे के, थूँ आंदा मनकाँ की आक्याँ हे अन जतरा अन्दारा में हे, वाँका वाते थूँ ज्योती हे।

²⁰ अन बना हमजवाळा ने हिकाबावाळो, अन बाळकाँ को गरू, काँके नेमाऊँ थने हारोई ग्यान अन हाँच मल्यो हे।

²¹ ईं वाते थूँ ज्यो ओरा ने हिकावे हे, वो आपणाँ खुद ने काँ ने हिकावे? थूँ चोरी ने करबा को परच्यार करे हे, अन खुदई चोरी काँ करे हे?

²² थूँ केवे के, कुकरम ने करणो अन खुदई कुकरम काँ करे हे, थूँ ज्यो मूरत्याऊँ रिस्याँ बळे हे, खुदई मन्दर को धन काँ लुटे हे?

²³ थूँ ज्यो नेमा का बारा में मेपणो करे हे, कई नेमाने ने तोड़न, थूँ परमेसर को अपमान काँ करे हे?

²⁴ जस्यान के सास्तर में लिक्यो तको हे के, “थाँकी वजेऊँ ज्यो यहूदी ने वाँ मनकाँ में परमेसर का नाम को अपमान किदो जावे हे।”

²⁵ यद्याँ थूँ नेमा पे चाले, तो थने खतनाऊँ नफो हे, पण यद्याँ थूँ नेमाने तोडे़, तो थूँ खतनावाळो वेन भी बना खतनावाळा के जस्यान मान्यो जाई।

²⁶ यद्याँ किंको खतनो ने व्यो हे अन वो नेमा पे चाले हे, तो कई परमेसर वीं बना खतनावाळा ने हाँचो खतना किदा तका में ने घणी?

²⁷ थूँ जिंका नके नेम लिक्या तका हे अन थाँरो खतनो भी व्यो हे। अतरो व्या केड़े भी थूँ ज्यो नेमा ने तोड़े हे। ईं वजेऊँ वो मनक जिंको देह का हस्याबूँ खतनो ने व्यो हे अन ज्यो नेमा को पालण करे हे, वो थने गुनेगार ठेराई।

²⁸ ज्यो बारणे का रूपऊँ यहूदी हे, वीं हाँची में यहूदी ने हे। देह को खतनो हाँचो खतनो ने हे।

²⁹ पण हाँचो यहूदी वोईस हे, ज्यो मन में हे, अन हाँचो खतनो वोईस हे, ज्यो आत्माऊँ मन को खतनो हे, ने के, लिक्या तका नेमा को। अस्या मनकाँ की बड़ई मनकाँऊँ ने पण परमेसर का आड़ीऊँ वेवे हे।